Read Batak Simalungun JEREMIA 43 Bible Online

JEREMIA 43 - Batak Simalungun bible

JEREMIA 43

¹Jadi dob ihatahon si Jeremia hubani na mabuei ai haganup hata ni Jahowa, Naibata ni sidea, ai ma songon na tinonahkon ni Jahowa, Naibata ni sidea hu bani, sipadasonni hubani sidea,

²gabe roh ma si Asarya anak ni si Hosaya, ampa si Johanan anak ni si Kareah, ampa sagala dalahi na jungkat, nini sidea ma dompak si Jeremia, “Ladung do na hinatahonmu; sedo Jahowa, Naibatanami marsuruh ho mangkatahon, ʻUlang hanima laho hu Masir laho marianan ijai!ʼ

³tapi si Baruk, anak ni si Neriya do marsuruh ho mangimbang hanami, laho mangondoskon hanami hu tangan ni halak Kasdim, ase ibunuh hanami, atap iboban hanami tarbuang hu Babel.”

⁴Ase seng ra si Johanan, anak ni si Kareah, ampa haganup kopala ni tentara ampa haganup simbuei ai manangihon sora ni Jahowa, ase totap marianan i tanoh Juda.

⁵Jadi roh ma si Johanan, anak ni si Kareah, ampa haganup kopala ni tentara mangarahkon haganup teba-teba ni Juda, na roh mulak marianan i tanoh Juda humbani haganup bangsa-bangsa pambuangan ni sidea,

⁶paramangon, parinangon, boru ni raja ampa haganup halak, na tinadingkon ni si Nebusaradan, kopala ni parjaga ai mangkasomani si Gedalya, anak ni si Ahikam, anak ni si Sapan; sonai homa Nabi Jeremia ampa si Baruk, anak ni si Neriya. [526]

⁷Jadi laho ma sidea hu tanoh Masir, ai seng ra sidea manangihon sora ni Jahowa. Das ma sidea hu Tahpanhes. [527]

⁸Dob ai roh ma hata ni Jahowa hubani si Jeremia i Tahpanhes,

⁹“Boan ma bani tanganmu batu banggal anjaha ponopkon ma ai ibagas tanoh bani dalan masuk hu rumah ni Parao i Tahpanhes, ididah dalahi-dalahi na hun Juda,

¹⁰anjaha hatahon ma bani sidea: sonon do hata ni Jahowa Zebaot, Naibata ni Israel, ʻTonggor ma, suruhon-Ku ma na mangalopi si Nebukadnesar, raja ni Babel, juakjuak-Kai, anjaha pajongjongonni ma paratasni i atas batu na Huponopkon on, anjaha paherbangonni do lampolampo harajaonni i atas ni.ʼ [528]

¹¹Maningon roh do ia anjaha patundukonni do tanoh Masir; ondoskononni do hu hamatean na dob tinontuhon hu hamatean, hu habuangan na dob tinontuhon hu habuangan, hubani podang na dob tinontuhon bani podang. [529]

¹²Nahitanni do apuy ibagas rumah ni sisombah-sombahon ni Masir; tutungonni ma ai atap boanonni deba hu habuangan; hutuanni ma Masir, songon pangkutui ni parmahan bani hiouni; anjaha marsonang-sonang do ia mulak hunjai. [530]

¹³Ropukonni do tiang batu na i Betsemes na i tanoh Masir, anjaha tutungonni do rumah ni naibata-naibata ni Masir.”