Read Batak Simalungun JEREMIA 44 Bible Online

JEREMIA 44 - Batak Simalungun bible

JEREMIA 44

¹On do hata na roh hubani si Jeremia pasal haganup halak juda, na marianan i tanoh Masir, ai ma i Migdol, i Tahpanhes, i Mempis ampa i tanoh Patros, nini, [531]

²“Sonon do hata ni Jahowa Zebaot, Naibata ni Israel, ʻIdidah hanima do haganup hasedaon na Huparoh hubani Jerusalem ampa hubani haganup huta-huta ni Juda. Tonggor ma, halong do ai nuan, seng dong na marianan ijai,

³halani hajahaton na hinorjahon ni sidea, laho mamuhoi ringis-Ku marhitei na laho sidea manutung dahupa anjaha ibalosi naibata na legan, na so tinanda ni sidea, age hanima, age ompungnima,

⁴age pe Husuruh marulak-ulak bannima juakjuak-Ku, nabi-nabi ai, mangkatahon: Ulang bahen hanima habutakon, na Huhagigihon in.ʼ [532]

⁵Tapi seng itangihon sidea, anjaha seng ipaeleng pinggolni, laho surut humbani hajahaton ni sidea, anjaha ase ulang manutung dahupa bani naibata na legan.

⁶Halani ai durus do gilang-Ku pakon ringis-Ku, anjaha gara i huta-huta ni Juda ampa bani dalan-dalan na i Jerusalem; gabe halong anjaha tarulang do ai ronsi sadari on. [533]

⁷On pe sonon do hata ni Jahowa, Naibata Zebaot, Naibata ni Israel, ʻMase ma iparroh hanima hamagouan banggal on bannima, gabe bois hun tongah-tongahnima, hun tongah-tongah ni Juda, paramangon ampa parinangon, dakdanak pakon na inumon, gabe seng dong na teba humbennima?ʼ

⁸Mase ma ipuhoi hanima ringis-Ku marhitei pambahenan ni tangannima, ai ma manutung dahupa bani naibata na legan i tanoh Masir, hadasannima ai, laho manginsolat ijai, gabe bois hanima, gabe siburaan ampa sirisa-risaon i tongah-tongah ni bangsa-bangsa na i tanoh on?

⁹Ai domma lupa hanima bani hajahaton ni ompungnima, bani hajahaton ni raja-raja ni Juda, bani hajahaton ni jolma ni sidea, bani hajahatonnima sandiri ampa bani hajahaton ni jolmanima, ai ma na binahen ni sidea i tanoh Juda ampa alaman ni Jerusalem?

¹⁰Seng ipaunduk sidea uhur ni sidea ronsi sadari on, anjaha seng mabiar sidea, anjaha seng mardalan sidea domu hu bani titah-Ku ampa aturan-Ku na Hubere bannima ampa bani ompungnima.

¹¹Halani ai sonon do hata ni Jahowa Zebaot, Naibata ni Israel, ʻTonggor ma, dompakkonon-Ku do bohing-Ku bannima, laho mambahen hasamboron, laho mamboiskon ganup Juda.ʼ [534]

¹²Anjaha teba-teba ni Juda, na mandompakkon bohini laho hu Masir, sihol marianan ijai, maningon do bois sidea ganup; i tanoh Masir do sidea marrageian, bois ibahen podang pakon lohei, marmateian sidea, na etek age na magodang, ibahen podang pakon lohei; gabe siburaan do sidea, gabe songgot-songgot, gabe umpama ampa sirisaon. [535]

¹³Ai marlulu do Ahu age dompak na marianan i tanoh Masir, songon parlulung-Ku bani Jerusalem marhitei podang, lohei pakon sampar,

¹⁴ase ulang adong na maluah atap na tading humbani teba-teba ni Juda, na laho hu Masir, sihol manginsolat ijai. Seng mulak be sidea hu tanoh Juda, na hinasiholan ni sidea sihol mulak hujai anjaha marianan ijai; tongon, seng dong sidea na mulak, sobali piga-piga halak na maporus.”

¹⁵Dob ai marbalos ma sidea hubani si Jeremia, ai ma haganup dalahi na dob mambotoh manutung dahupa jolma ni sidea bei hu bani naibata na legan, ampa haganup naboru na dihut jongjong ijai, sada humpulan na banggal, sonai homa haganup halak na marianan i Patros, i tanoh Masir, nini sidea ma, [536]

¹⁶“Hata na hinatahonmu bennami marhitei goran ni Jahowa, seng ra hanami manangihon ai.

¹⁷Tapi maningon dalankononnami do domu hubani na dob ibagahkon hanami; maningon manutung dahupa do hanami hubani raja naboru na i langit ai, anjaha manguruskon galangan siinumon hu lobeini, songon na dob binahennami, hanami age ompungnami, raja-rajanami ampa kopala-kopalanami, ibagas huta-huta ni Juda pakon bani dalan-dalan na i Jerusalem; ijia sungkupan sipanganon do hanami anjaha marsonang-sonang, seng dong hasedaon ididah hanami. [537]

¹⁸Tapi dop iparontihon hanami na manutung dahupa bani raja naboru na i langit ai ampa na manggalangkon galangan siinumon i lobeini, marhahurangan do hanami pasal haganup, anjaha bois hanami ibahen podang pakon lohei.

¹⁹Anjaha naboru-naboru mangkatahon, manutung dahupa pe hanami bani raja naboru na i langit ai, anjaha manggalangkon galangan siinumon pe hanami i lobei ni, ibagas botoh ni paramangonnami do ai, ai ma na binahennami kuei mangusihi rupani, anjaha na ginalangkonnami ai galangan siinumon i lobeini.

²⁰Jadi nini si Jeremia ma dompak haganup bangsa ai, dompak dalahi ampa naboru, dompak haganup halak na marbalos ondi,

²¹ʻIa dahupa, na tinutungnima bani huta-huta ni Juda pakon na i dalan-dalan na i Jerusalem, hanima age ompungnima, rajanima age kopalanima ampa halak na marianan i tanoh ai, ibotoh Jahowa do ai, iparuhurhon do ai.ʼ

²²Seng be tartahan Jahowa uhur-Ni mangidah pambahenannima na masambor in ampa hagigi na nidalankonnima in; halani ai do ase tarulang, halong anjaha hona bura tanohnima, seng dong na mangiankon songon nuan ai.

²³Halani na manutung dahupa ai, halani na mardousa ai hanima dompak Jahowa, anjaha seng itangihon hanima sora-Ni, seng idalankon hanima titah-Ni, aturan-Ni ampa hasaksian-Ni, halani ai do ase mangonai hamagouan on bannima songon nuan on.

²⁴Dob ai nini si Jeremia ma hubani ganup simbuei ai ampa hubani ganup naboru ai, ʻTangihon hanima hata ni Jahowa, hanima haganup halak Juda, na adong i tanoh Masir.ʼ

²⁵Sonon do hata ni Jahowa Zebaot, Naibata ni Israel, ʻHanima ampa jolmanima do na manluarhon ai marhitei pamangannima, anjaha na pasaudkon ai marhitei tangannima, nini hanima: Maningon pasaudonnami do bagah-bagahnami, na dob pinarbagahnami, ai ma manutung dahupa bani raja naboru na i langit ai ampa mamboan galangan siinumon hu lobeini. Pasaud hanima ma tongon bagah-bagahnima ai, suhuni ma tongon ai!ʼ [538]

²⁶Halani ai, tangihon hanima ma hata ni Jahowa, hanima haganup halak Juda na marianan i tanoh Masir, ʻTonggor ma, domma marbija Ahu marhitei goran-Ku na timbul in, nini Jahowa, na so malo be goran-Ku diloon ni pamangan ni atap ise pe halak Juda, na marianan i tanoh Masir, mangkatahon: Songon sintongni manggoluh Tuhan Jahowa.ʼ [539]

²⁷Tonggor ma, mangkawah do Ahu dompak sidea laho mambahen hamagouan, sedo mambahen na madear; haganup halak Juda, na i tanoh Masir, maningon ripas do ibahen podang ampa lohei, bois tumang ganup sidea. [540]

²⁸Anjaha halak na maluah humbani podang, na mulak hun Masir hu tanoh Juda, otik do bilanganni. Jadi haganup teba-teba ni Juda na laho hu tanoh Masir, sihol manginsolat ijai, botohonni ma atap hata ni ise do na sintong, hatang-Ku atap hata ni sidea do. [541]

²⁹On do tandani bannima, nini Jahowa, paboa na marlulu do Ahu bannima bani ianan on, ase ibotoh hanima, paboa na tongon do hata na Hulumbahon ai mangimbang hanima:

³⁰Sonon do hata ni Jahowa, ʻTonggor ma, ondoskonon-Ku do Parao Hopra, raja ni Masir, hubagas tangan ni munsuhni ampa hubagas tangan ni halak na manguhurhon hosahni, songon na dob Huondoskon ai si Sedekia, raja ni Juda, hubagas tangan ni si Nebukadnesar, raja ni Babel, ai ma munsuhni ai, na manguhurhon hosahni.ʼ ” [542]