Read Batak Simalungun JEREMIA 46 Bible Online

JEREMIA 46 - Batak Simalungun bible

JEREMIA 46

¹On do hata ni Jahowa na roh hubani Nabi Jeremia pasal bangsa-bangsa.

²Pasal Masir: Pasal tentara ni Parao Neko, raja ni Masir, na marsaran i lambung ni Bah Eprat, dohorhon Karkemis, na tinaluhon ni si Nebukadnesar, raja ni Babel, paompat-tahunkon dob raja si Joyakim, anak ni si Josia, raja ni Juda, [545]

³“Pasirsir ma gantar na etek ampa na banggal, anjaha bingkat ma hu parporangan! [546]

⁴Palanai ma huda in, naiki ma, ale siajak huda! Jongjong ma martangkuluk bosi bei, pamarot tanjanima, sorungkon baju-baju partahanan!

⁵Aha do na Huidah ai? Gobir-gobir do sidea, anjaha surut hu pudi! Talu do puanglima ni sidea, tarolos maporus; seng mangkawah dompak pudi, habiaran do inggot, nini Jahowa.

⁶Na doras marlintun seng tarbahensi maporus, age na barani-barani seng maluah; i utara i lambung Bah Eprat do sidea marjurgangan anjaha radag.

⁷Ise do ai, na marbanggal songon Bah Nil, songon bah bolon na marhasak bahni?

⁸Masir do ai na marbanggal songon Bah Nil, anjaha songon bah bolon parhasak ni bahni. Nini, ʻMarbanggal ma ahu, sihol do rungkubonku tanoh in, parsedaonku huta-huta ampa pangisini.ʼ

⁹Maju ma, ale sagala huta, marpojong ma, ale gareta! Bingkat ma siparporang! Halak Kus ampa halak Put sijolom gantar, halak Lud, na pandei manintak Sior. [547]

¹⁰Ari ai, ai ma ari ni Tuhan Jahowa Zebaot, sada ari pambalason, laho mambalas munsuh-Ni. Bosur do podang mamangani, anjaha marmabuk-mabuk do ia minum daroh ni sidea. Ai Jahowa, Naibata Zebaot do na mangadongkon panayatan i tanoh parutara i lambung ni Bah Eprat. [548]

¹¹Tangkog ma hu Gilead, alop ma minak balsem, ale anak boru, boru Masir! Soya-soya do na pinakeimin buei tambar, seng tarbahen malum be ho. [549]

¹²Tarbogei do bani bangsa-bangsa hailaonmu, gok do tanoh on bani doruh-doruhmu; ai marsijombaan do siparporang samah siparporang, rap radag do sidea.”

¹³On do hata ni Jahowa, na hinatahon-Ni bani Nabi Jeremia, ai ma pasal parroh ni si Nebukadnesar, raja ni Babel, laho patunduk tanoh Masir,

¹⁴“Baritahon ma i Masir, anjaha tingtingkon i Migdol; pabogeihon ma i Nob ampa i Tahpanhes! Hatahon ma, ʻJongjong ma anjaha marjaga-jaga, ai domma bois ipangan podang simbalogmu.ʼ [550]

¹⁵Mase marrageian puanglimamu? Seng jongjong be! Jahowa do patundukkon sidea.

¹⁶Ibahen do sidea buei mangkatompas, radag do sidea; nini sidea do samah sidea, ʻEta, mulak ma hita hubani bangsanta ampa hu tanoh hatubuhanta halani podang sipangagou in.ʼ

¹⁷Bahen ma goran ni Parao, raja ni Masir: Sibuei hata-hata, siparsoya-soya panorang na madear.

¹⁸Songon sintongni manggoluh Ahu, nini Raja in, na margoran Jahowa Zebaot: Songon Dolog Tabor i tongah-tongah ni dolog-dolog, songon Karmel na i topi laut, sonai do parrohni ai.

¹⁹Pasirsir ma ugas-ugasmu, laho hu habuangan, ale pangisi ni Masir! Tongon, maningon tarulang do Nob, mareong, seng dong na mangiankon.

²⁰Lombu na majenges do Masir, tapi roh ma sipangagou hun utara marayaksi.

²¹Age tentara na niupahan, na i tongah-tongah ni sidea, songon anak ni lombu na mombur do; marbalik do sidea anjaha rap maporus, seng martahan sidea; ai sogop do ari hamagouan bani sidea, panorang pambalason bani sidea.

²²Songon parlisik ni ulog do parrohni bogeion; tongon, marhulan-hulan do sidea roh, marsiboan kapakni songon siroboh hayu.

²³Robohon ni sidea do haranganni, nini Jahowa, ai seng marsibar sidea; bueinan do sidea ase balang, seng tarbilangi sidea.

²⁴Maningon bador do boru Masir, maningon ondoskononkon do ia hubagas tangan ni bangsa na hun utara.

²⁵Ihatahon Jahowa Zebaot, Naibata ni Israel do, ʻTonggor ma, marlulu do Ahu dompak Amon, na hun No, dompak Parao, dompak Masir, dompak sisombahonni ampa raja-rajani, dompak Parao ampa dompak halak na martenger ni uhur bani.ʼ

²⁶Ondoskonon-Ku do sidea hubagas tangan ni na manguhurhon hosah ni sidea, hubagas tangan ni si Nebukadnesar, raja ni Babel, ampa hubagas tangan ni gamot-gamotni. Tapi dob salpu ai ianonkon do use Masir songon bani panorang sapari, nini Jahowa.

²⁷Tapi anggo ho, ulang ma mabiar, ale Jakob juakjuak-Ku, anjaha ulang ma tarsonggot, ale Israel; ai tonggor ma, paluahon-Ku do ho hun tanoh na madaoh ampa ginomparmu hun tanoh habuangan ni sidea. Maningon mulak do Jakob, marsonang-sonang do ia anjaha mardamei-damei, ise pe lang be na manonggotisi. [551]

²⁸Ulang ma ho mabiar, ale Jakob juakjuak-Ku, nini Jahowa, ai Ahu do hasomanmu. Boiskonon-Ku do bangsa-bangsa pambuangan-Ku bannima, tapi anggo ho seng bois bahenon-Ku, tongon, Huajar do ho domu hubani na patut; tapi seng paturuton-Ku ho lang hona pinsang.” [552]