Read Batak Simalungun JEREMIA 47 Bible Online

JEREMIA 47 - Batak Simalungun bible

JEREMIA 47

¹On do hata ni Jahowa na roh hubani Nabi Jeremia, pasal halak Palistim, sanggah lape ipatunduk Parao Gasa. [553]

²Sonon do hata ni Jahowa, “Tonggor ma, marbanggal do bah roh hun utara, gabe bah bolon na sampur. Landaonni do tanoh in ampa haganup na adong ijin, huta-huta ampa na marianan ijin. Tangis-tangis ma jolma anjaha doruh-doruh na mangiankon tanoh in.

³Pangkorhon ni gurojob ni nahei ni huda ampa parhurasak ni gareta porang ampa parputor ni rodani, seng be ikawahkon bapa anakni, sonai ma hagalekon ni sidea,

⁴halani panorang na roh laho mamboiskon haganup halak Palistim, laho mansiapkon sagala na tading, sipangurupi bani Tirus ampa Sidon. Tongon, Jahowa do na mamboiskon halak Palistim, teba-teba na roh hun Pulou Kaptor. [554]

⁵Hona palpal do Gasa, masab ia Askalon. Ale teba-teba ni halak Enak, piga dokah nari rarikannima dirinima? [555]

⁶Ale podang ni Jahowa! Piga dokah nari pe, ase soh ho? Mulak ma ho hubagas sarungmu, Maronti ma anjaha marsaran ma!

⁷Sonaha ma parsohni, ai Jahowa do na marsuruhsi? Dompak Askalon pakon dompak topi ni laut do ai ihatahon.”