Read Batak Simalungun JEREMIA 48 Bible Online

JEREMIA 48 - Batak Simalungun bible

JEREMIA 48

¹Pasal Moab: Sonon do hata ni Jahowa Zebaot, Naibata ni Israel, “Bursik ma Nebo, ai domma maseda! Bador do Kiriataim, anjaha hona taban; maila do benteng anjaha iparreong.

²Sasap do hamuliaon ni Moab. Martahi-tahi do halak i Hesbon pasalsi: Eta, parseda hita ma Moab, ase ulang masuk bangsa be ai! Ho pe, ale Madmen, maningon parsedaon do; podang do mardakdak ho.

³Tarbogei do sora doruh-doruh hun Horonaim: Hasedaon ampa hamagouan banggal.

⁴Maseda do Moab, tarbogei do doruh-doruh das hu Soar.

⁵Tongon, tangis-tangis do sidea tangkog bani tangkogan Luhit; tarbogei do doruh-doruh pasal hasedaon bani tuadan Horonaim.

⁶Maporus ma! Ase maluah hosahnima! Tapi songon tatada ma hanima i halimisan. [556]

⁷Halani martenger ni uhur ho bani batar-batarmu ampa bani artamu, ho pe maningon tarboan do; anjaha Kemos maningon tarbuang do, rap pakon malim-malimni ampa na sangap-sangapni. [557]

⁸Ai roh do sipangagou bani sagala huta, anjaha sada pe lang na maluah; seda do habungan-habungan, anjaha tarulang sagala pamah, songon na hinatahon ni Jahowa.

⁹Bere ma habong bani Moab, ai sihol habang do ia daoh. Maningon tarulang do huta-hutani, seng dong na marianan ibagas.

¹⁰Hona papa ma halak na marayoh pasaudkon horja ni Jahowa, anjaha hona papa ma halak na pasoh podangni manduruskon daroh. [558]

¹¹Marsonang-sonang do Moab humbani haposoonni nari, sonang tibal bani lutokni; seng ongga ia ipausei humbani gusi hu gusi, seng ongga tarboan ia hu habuangan. Halani ai totap do daini anjaha seng mubah morumni.

¹²Tapi, tonggor ma, roh ma panorangni, nini Jahowa, suruhon-Ku ma halak na manguseihonsi, na palumeihon gusi-gusi ai ampa na marrosakisi.

¹³Maningon bador do Moab halani Kemos, songon halak Israel na bador halani Betel, hatengeran ni uhur ni sidea ai. [559]

¹⁴Mase ma ihatahon hanima, ʻPuanglima do hanami anjaha tentara na barani?ʼ

¹⁵Tangkog do siparseda Moab ronsi huta-hutani, gabe tuad hu panayatan anak garama pilihanni, nini Raja ai, na margoran Jahowa Zebaot.

¹⁶Dohor do parseda ni Moab, anjaha mangolos do roh hamagouanni.

¹⁷Tangisi ma ia, hanima ganup simbalogni, ampa haganup na mambotoh goran-Ni! Hatahon ma, ʻNaha do parponggol ni tungkot harajaon in ampa simambu hasangapon in?ʼ

¹⁸Turun ma humbani hasangaponmu, anjaha hundul ma bani orbuk, ale boru Dibon! Ai domma tangkog mangayak ho, ai ma siparseda Moab; iparseda do batar-batarmu.

¹⁹Jongjong ma i dalan anjaha kawahkon ma, ale pangisi ni Aroer! Sungkun ma halak na maporus ampa halak na maluah; hatahon ma, ʻAha do na masa?ʼ

²⁰Domma bador Moab, ai domma maseda; mandoruhi ma anjaha tangis ma! Patugah ma ai i lambung ni Arnon, paboa na dob bois do Moab.

²¹Madabuh do uhum bani tanoh hanopan, bani Holon, Jahas, Mepaat,

²²bani Dibon, Nebo, ampa Bet-Diblataim,

²³bani Kiriataim, Bet-Gamul ampa Bet-Meon,

²⁴bani Keriyot ampa Bosrah ampa bani haganup huta na i nagori Moab, na daoh pakon na dohor.

²⁵Maponggol do tanduk ni Moab, marosak botokonni, nini Jahowa.

²⁶Bahen ma ia mabuk, ai do dirini i lobei ni Jahowa, ase margulu ia bani utah-utahni, anjaha gabe sipahirion ia homa. [560]

²⁷Ai lang gabe sipahirion do Israel bam? Ai adong jumpah ia rap pakon panangko ase iupir-upirhon ho ulumu, anggo taringat ho pasalsi?

²⁸Tadingkon ma huta in, anjaha marianan ma i dolog batu, ale pangisi ni Moab! Songon kuhuy ma hanima na marasar bani liang-liang.

²⁹Domma itangar hanami pasal pangenjengon ni Moab, mangenjeng tumang do ia ampa pasal hatoalonni, pangunsagahni, jungkatni ampa gijang ni uhurni.

³⁰Hubotoh do pangenjengonni, nini Jahowa, lumei do sahap-sahapni, anjaha seng sintong pambahenanni.

³¹Halani ai tangis do Ahu pasal Moab, doruh-doruh pasal haganup Moab; anjaha pasal halak na i Kir-Heres marhoih do Ahu.

³²Lobih humbani partangis-Hu bani Jaeser do partangis-Hu bam, ale hayu anggur na i Sibma! Mandipar laut do rantingmu, das hu Jaeser; roh do sipangagou bani pariamamu ampa buah anggurmu.

³³Hona buat do malas ni uhur ampa olob-olob humbani tanoh na lambutan ni tanoh Moab; domma Hupangadi anggur roh hun pangilangan; seng dong be na marhorja i pangilangan, seng tarbogei be surak-surak malas ni uhur.

³⁴Doruh-doruh do Hesbon ampa Eleale; das do hu Jahas tarbogei sora ni sidea, hun Soar das hu Horonaim, ronsi Eglat-Selisia, age bah ni Nimrim domma halong.

³⁵Parontihonon-Ku ma i Moab, nini Jahowa, ase ulang adong be halak na manggalang i atas buntu-buntu atap manutung dahupa bani naibata ni sidea.

³⁶Halani ai tangis do uhur-Hu songon sordam mangidah Moab, anjaha tangis do tonduy-Hu songon sordam mangidah halak Kir-Heres, ai magou do habayakon na sinari ni sidea. [561]

³⁷Ai hona palpal do sagala ulu, hona suhur sagala jambek; hona rarikan do sagala tangan, anjaha hiou guni do bani binongei ni sidea. [562]

³⁸Bani ganup tayub ni rumah na i Moab ampa bani alaman-alaman pitah tangis-tangis do hansa tarbogei, ai domma Hubolahkon Moab songon hudon na so hinarosuhkon ni halak, nini Jahowa.

³⁹Ai, parbolahni in! Ai, partangis ni sidea in! Partundal ni Moab in, halani tarbador! Sonai ma Moab gabe sipahirion ampa songgot-songgot bani ganup simbalogni.

⁴⁰Ai sonon do hata ni Jahowa, ʻTonggor ma, songon manuk-manuk nanggordaha do ia habang, anjaha ipaherbang habongni i atas ni Moab; [563]

⁴¹ipatunduk do sagala huta, anjaha isoluk sagala huta na pinatoguh.ʼ Uhur ni siparporang ni Moab bani ari ai usih do bani uhur ni naboru na mangarou.

⁴²Maningon bois do Moab, seng hiraon be sada bangsa, halani na mangenjeng ai ia dompak Jahowa.

⁴³Hagobiron, godung ampa siding do mangonai bam, ale pangisi ni Moab, nini Jahowa. [564]

⁴⁴Barang ise na maporus halani hagobiron ai, madabuh do hubagas godung; barang ise na luar humbani godung ai, hona siding do. Ai parohon-Ku do ganupan ai bani Moab, bani tahun pambalason-Ku, nini Jahowa.

⁴⁵Bani linggom ni Hesbon do marsaran halak na maporus, loja tumang; tapi luar do apuy hun Hesbon, gajag ni apuy hun rumah ni si Sihon; iparseda do pardompakan ni Moab ampa pakpak ni ulu ni halak sipanggeori. [565]

⁴⁶Magou ma ho, ale Moab! Magou ma bangsa ni Kemos; ai tarboan do anakmu hu habuangan ampa borumu hu parjabolonan.

⁴⁷Tapi i pudi ni ari pasuangon-Ku do Moab, nini Jahowa.” Sibar jai ma uhum na bani Moab.