Read Batak Simalungun JEREMIA 49 Bible Online

JEREMIA 49 - Batak Simalungun bible

JEREMIA 49

¹Pasal halak Amon: Sonon do hata ni Jahowa, “Ai seng dong nani anak bani Israel? Ai seng dong sipanean bani? Mase ma Milkom sipanean bani Gad anjaha bangsani marianan bani huta-hutani? [566]

²Halani ai, tonggor ma, na roh ma panorangni, nini Jahowa, pabogeihonon-Ku ma surak-surak porang dompak Rabba, huta ni halak Amon; gabe timbunan batu do ai, janah dusun-dusunni bois tutungon ni apuy; jadi teanon ni Israel ma tean-teanan ni halak sipambuat tean-teananni hinan, nini Jahowa.

³Tangis ma, ale Hesbon, ai maseda ma in! Doruh-doruh ma, ale boru Rabba! Gonditi ma dirimu bani hiou guni, tangis ma, anjaha marlintun ma hujai-hujon, rariki dirimu! Ai maningon tarbuang do Milkom, rap pakon malim-malimni ampa na sangap-sangapni. [567]

⁴Mase ma mangenjeng ho pasal habuanganmu, ale boru sipangosei, ho na martenger ni uhur bani arta, na mangkatahon, ʻIse na pag roh hu bangku?ʼ

⁵Tonggor ma, parohon-Ku ma bam songgot-songgot, nini Tuhan Jahowa Zebaot, humbani halak na marianan inggot bam; erapkononkon do hanima ganup marsitohu dalanni, janah seng dong na patumpuhon na maporus ai.

⁶Tapi i pudi ni ai pasuangon-Ku do halak Amon, nini Jahowa.” [568]

⁷Pasal Edom: Sonon do hata ni Jahowa Zebaot, “Ai seng dong be na maruhur i Teman? ai domma magou ranggian ni halak na pentar? Ai domma masab hapentaran ni sidea? [569]

⁸Maporus ma, marhusor, marponop ma bani ianan na bagas, ale pangisi ni Dedan! Ai pasogopon-Ku do hamagouan bani Esau, bani panorang pambalason-Ku bani.

⁹Anggo roh sibuat buah anggur bam, seng tadingkononni age turiang. Anggo roh panangko borngin, parsedaonni ma domu hubani rosuhni.

¹⁰Tongon, Ahu do na pasalang Esau, anjaha Ahu na patidak parponopanni; seng tarponopkonsi dirini. Magou do ginomparni ampa saninani ampa simbalogni; seng dong be sidea.

¹¹Paturut ma dakdanakmu na tading maetek in, sihol do pagoluhon-Ku on; martenger ni uhur Bangku ma na mabalunima!

¹²Ai sonon do hata ni Jahowa, ʻTonggor ma, gari halak na so patut manginum panginuman in, minum do hunjin, mintor ho ma lang hona uhum? Seng tarbahen lang hona uhum ho, maningon inumonmu do.ʼ [570]

¹³Ai domma marbulawan Ahu bani diring-Ku, nini Jahowa, ia Bosra maningon do gabe songgot-songgot, sipahirion, tarulang anjaha hona bura; anjaha sagala hutani maningon tarulang do lalab.” [571]

¹⁴Domma hubogei barita humbani Jahowa, janah domma isuruh sahalak suruhan hu tongah-tongah ni bangsa-bangsa maningtingkon, “Marhumpul ma hanima anjaha dorab ma ia, bingkat ma hanima hu parmunsuhan!

¹⁵Ai tonggor ma, paetekon-Ku do ho i tongah-tongah ni bangsa-bangsa, mahiri i tongah-tongah ni jolma.

¹⁶Hagijangon ni uhurmu do paoto-otohon ho ampa pangenjengon ni uhurmu, ho ale na marianan ibagas liang ni dolog batu, na markuasa bani buntu-buntu na gijang. Age pe ibahen ho asarmu gijang songon manuk-manuk nanggordaha, dabuhkonon-Ku do ho hunjai, nini Jahowa. [572]

¹⁷Maningon gabe songgot-songgot do Edom; ganup na mamontas hunjai maningon tarsonggot do mangidah ai anjaha manrisai halani haganup hasedaonni. [573]

¹⁸Songon sanggah parseda ni Sodom pakon Gomora ampa dusun-dusunni, nini Jahowa, sonai do seng dong be jolma marianan i Edom, seng dong be halak na manginsolat ijai. [574]

¹⁹Tonggor ma, songon singa na tangkog hun harangan ni Bah Jordan dompak sampalan, sonai ma sompong pamerapon-Ku sidea hun tanoh ai, anjaha halak na Hupilih pabangkiton-Ku manggomgom ai. Ai ise ma na songon Ahu? Ise ma siparhutuk Bangku? Ise ma parmahan na tahan mandompakkon Ahu? [575]

²⁰Halani ai, tangihon ma sura-sura ni Jahowa sidalankonon-Ni dompak Edom ampa pingkiran-Ni pasal pangisi ni Teman: Tongon, ronsi na etek-etek humbani biribiri ai, maningon saradon do; tongon, songgotan do sampalan ni sidea mangidah na masa bani sidea.

²¹Halani sora ni pardabuh ni sidea dugur do tanoh on; tarbogei do doruh-doruh ni sidea ronsi laut arung.

²²Tonggor ma, songon manuk-manuk nanggordaha do ia naik anjaha habang; ipaherbang do habongni i atas ni Bosra, jadi songon uhur ni naboru na mangarou ma uhur ni halak siparporang na i Edom bani panorang ai.” [576]

²³Pasal Damaskus: Bador do Hamat ampa Arpad, ai barita hamagouan do ibogei sidea. Mandolei do uhur ni sidea halani biar, seng dong hasohan bani sidea. [577]

²⁴Mandolei do pangahap ni Damaskus, marhusor do ia sihol maporus, hasonggotan do sogop bani. Rusak ni uhur ampa na maborit do mangonai bani, songon naboru na mangarou. [578]

²⁵Hona tadingkon do huta na tarbarita ai, ianan parolob-oloban ai.

²⁶Rasei do anak garama i alamanni, anjaha haganup halak siparmunsuh bois do bani panorang ai, nini Jahowa Zebaot.

²⁷Pagaraon-Ku do apuy bani tembok ni Damaskus, anjaha boiskononni do rumah-rumah ni si Benhadad.

²⁸Pasal Kedar ampa harajaon-harajaon ni Hasor, na ipatunduk si Nebukadnesar, raja ni Babel: Sonon do hata ni Jahowa, “Jongjong ma, bingkat ma dompak Kedar! Patunduk ma bangsa na i hapoltakan [579]

²⁹Maningon rampason do lampolampo ampa biribiri ni sidea, tenda ni sidea ampa haganup ugas-ugasni; maningon buaton do homa unta ni sidea, anjaha dilohononkon pasal sidea: Songgot-songgot do inggot.

³⁰Maporus ma, lintun ma podas, marponop ma bani liang-liang, ale pangisi ni Hasor, nini Jahowa. Ai adong do ranggian ni si Nebukadnesar, raja ni Babel, dompak hanima, adong do sura-sura sidalankononni bannima. [580]

³¹Jongjong ma, bingkat ma dompak sada bangsa na mardamei-damei, na marianan marsonang-sonang, nini Jahowa, na so pala marhorbangan atap maroruk-oruk, na marianan punjung.

³²Sirampason do unta ni sidea, anjaha hulanan ni pinahan ni sidea sitabanon do; paerapon-Ku do sidea bani haganup deisa, sidea ai, na ilepong jambulanni inggot; parohon-Ku do hamagouan bani sidea humbani haganup ianan na inggot, nini Jahowa. [581]

³³Gabe ianan ni sorigala do Hasor, gabe halimisan lalab; sen dong be halak na marianan ijai, seng dong be jolma na manginsolat ijai.” [582]

³⁴On do hata ni Jahowa na roh hubani Nabi Jeremia pasal Elam, bani mungkah ni harajaon ni si Sedekia, raja ni Juda. [583]

³⁵Sonon do hata ni Jahowa Zebaot, “Tonggor ma, ponggolhonon-Ku do sior ni Elam, panguntu ni hagogohon ni sidea.

³⁶Parohon-Ku do logou na ompat ai hu bani Elam, humbani deisa na ompat ni langit in, anjaha paerapon-Ku do sidea hubani deisa na ompat in, gabe seng dong be bangsa na so das hujai humbani halak Elam na merap ai.

³⁷Gobir do bahenon-Ku uhur ni halak Elam i lobei ni munsuh ni sidea ampa i lobei ni halak na manguhurhon hosah ni sidea; parohon-Ku do hamagouan bani sidea, gajag ni ringis-Ku, nini Jahowa. Suruhon-Ku do porang mangayak sidea, paima bois sidea hubahen.

³⁸Pajongjongon-Ku do paratas-Hu i Elam, anjaha boiskonon-Ku do raja-raja ni sidea ampa kopala-kopalani nini Jahowa.

³⁹Tapi i pudi ni ari pasuangon-Ku do Elam, nini Jahowa.” [584]