Read Batak Simalungun JEREMIA 50 Bible Online

JEREMIA 50 - Batak Simalungun bible

JEREMIA 50

¹On do hata na hinatahon ni Jahowa pasal Babel ampa pasal tanoh ni halak Kasdim, marhitei Nabi Jeremia, [585]

²“Pabotohkon ma i tongah-tongah ni bangsa-bangsa anjaha tingtingkon ma; pajongjong ma mandera partanda anjaha pabogeihon ma; ulang ponopkon, tapi hatahon ma: Hona taban do Babel, tarbador do Bel, maropuk do Merodak. Bador do gana-ganani, maropuk naibata-naibatani. [586]

³Ai tangkog do dompaksi sada bangsa hun utara, na mambahen tanohni tarulang, gabe seng dong be na mangiankonsi; maporus do jolma age pinahan.

⁴Bani ari ai ampa bani panorang ai, nini Jahowa, Roh ma halak Israel rap pakon halak Juda, tangis-tangis sidea na roh ai; pindahan ni sidea do Jahowa, Naibata ni sidea. [587]

⁵Sungkun-sungkun do sidea bani dalan laho hu Sion, anjaha hujai do idompakkon sidea, nini, ʻEta, parapat hita ma dirinta bani Jahowa, marhitei padan sisadokah ni dokahni, seng sihalupahononkon.ʼ [588]

⁶Biri-biri na dob magou do bangsang-Ku; kahou do sidea ibahen parmahan ni sidea, iboan sidea manlembang hu pardologan; mampar do sidea hun dolog hu buntu-buntu, lupa do sidea bani harangni. [589]

⁷Ganup na jumpahan sidea mangankon sidea, anjaha munsuh ni sidea mangkatahon, ʻSeng marsalah hanami ijaiʼ; halani na mardousa do sidea dompak Jahowa, Parmahan na pintor in, anjaha pangarapan bani ompung ni sidea. [590]

⁸Maporus ma hanima hun tongah-tongah ni Babel anjaha luar ma hun tanoh ni halak Kasdim; songon biribiri tunggal ma hanima mardalan i lobei ni hulanan. [591]

⁹Ai tonggor ma, juljulon-Ku anjaha patangkogon-Ku do dompak Babel hulanan ni bangsa-bangsa na banggal, hun tanoh parutara; patitir do sidea mandorab huta ai, laho manaban ai. Ia panah ni sidea, songon panah ni siparmunsuh do, na totap monang, na so ongga lumei mulak. [592]

¹⁰Maningon hona rampas do tanoh Kasdim; bosuran do sagala na manrampas ai, nini Jahowa.

¹¹Age pe marolob-olob hanima, age pe marmalas ni uhur, ale sirampas parbagianan-Ku, age pe marinjak-injak hanima songon anak ni lombu bani sampalan, anjaha mariha-iha songon huda panjangan, [593]

¹²maningon bador tumang do inangnima, anjaha maila na mantubuhkon hanima. Tonggor ma, gabe sietekan do ia i tongah-tongah ni bangsa-bangsa, gabe halimisan, tanoh horah, anjaha tarulang.

¹³Halani ringis ni Jahowa seng be ianonkon ai, gabe halimisan botul ma ai. Ganup na montas hun Babel, tarsonggot do anjaha mandoruni halani haganup hasedaonni ai. [594]

¹⁴Titir ma hanima inggot mamorang Babel, ale sagala sisintak sior. Tembak ma ia, ulang marrugi-rugi bani lingkit; halani na mardousa ai ia bani Jahowa.

¹⁵Marsurak ma hanima inggot huta ai! Domma talu ia, mangkarumbak batar-batarni, anjaha maruntas tembokni. Pambalason humbani Jahowa do ai; mambalas ma hanima bani huta ai, bahen ma bani usih songon na dob binahenni. [595]

¹⁶Boiskon ma hun Babel halak sipartidah ampa halak sijolom sasabi sanggah pariama. Halani podang ni sipangodoh-odoh, ganup do mulak hubani bangsani, anjaha ganup do maporus hu tanohni bei.

¹⁷Biri-biri na mambur merap do Israel, na pinardakdak ni singa. Lobei raja ni Assur do na mangankonsi, dob ai si Nebukadnesar, raja ni Babel do na mangkilhili holi-holini.

¹⁸Halani ai, sonon do hata ni Jahowa Zebaot, Naibata ni Israel, “Tonggor ma, marlulu do Ahu bani raja ni Babel ampa bani tanohni, songon na dob marlulu Ahu bani raja ni Assur. [596]

¹⁹Paulakon-Ku do Israel hubani sampalanni, manggagat ma ia use i Karmel ampa i Basan, anjaha bosur ma ia i Dolog Efraim ampa i Gilead.

²⁰ Bani ari ai pakon bani panorang ai, nini Jahowa, pindahan ni halak ma hajahaton ni Israel, hape seng dong jumpah, sonai age dousa ni Juda, hape seng dong dapot, ai sasapon-Ku do dousa ni halak na Hutadingi ai. [597]

²¹Tangkog ma dompak tanoh Merataim ampa dompak pangisi ni Pekod. Boiskon anjaha pamasab ma ginompar ni sidea, nini Jahowa; ʻDalankon ma romban hubani na dob Huparentahkon.ʼ

²²Sora ni hamunsuhon do i tanoh ai anjaha hasedaon banggal!

²³Irosakkon anjaha iponggolhon do parpalu ni haganup dunia on. Gabe songgot-songgot do Babel i tongah-tongah ni bangsa-bangsa. [598]

²⁴Huta on do tirangkap bam, anjaha tartangkap do ho, ale Babel, seng ibagas botohmu. Dapot do ho anjaha tartangkap, halani imunsuhi ho Jahowa.

²⁵Ibuha Jahowa do rumah parsinjataan-Ni, anjaha ipadarat sinjata ni ringis-Ni; halani adong na sihol sidalankonon ni Naibata, Jahowa Zebaot, i tanoh ni halak Kasdim.

²⁶Roh ma mandorabsi humbani ganup ianan, ungkab ma parbohalanni; pagugun ma ai songon luhutan, anjaha bois ma parseda ai, ulang dong na tading.

²⁷Bunuh ma sagala lombu jonggini, boban hu panayatan! Magou ma sidea, ai domma jumpah ari ni sidea, panorang pambalason bani sidea. [599]

²⁸Bogei! Sora ni halak na maporus ampa na maluah hun tanoh Babel, laho patugahkon hu Sion pambalason ni Jahowa, Naibatanta, pambalason halani rumah-Ni.

²⁹Dilo ma mangimbang Babel ai partembak, haganup halak sisintak sior. Hubu ma ia inggot; ulang paturut dong na maluah. Balaskon ma bani rombang hubani pambahenanni, bahen ma bani romban hubani na hinorjahonni; ai mangenjeng do ia dompak Jahowa, Na ma pansing ni Israel. [600]

³⁰Halani ai maningon rasei do anak garamani bani alamanni, anjaha ripas haganup tentarani bani panorang ai, nini Jahowa.

³¹Tonggor ma, Ahu do siimbang ho, ale sipangenjeng, nini Jahowa, Naibata Zebaot; Ai domma das arimu, panorangni Ahu mambalas bam. [601]

³²Jiris anjaha targompang ma sipangenjeng ai, seng dong na manogusi, pagaraon-Ku do apuy bani huta-hutani, jadi panganonni do ganup na manginggotisi.

³³Sonon do hata ni Jahowa Zebaot, ʻHona odoh-odoh do halak Israel rap pakon halak Juda; haganup na mambuangkon sidea manjolomi sidea, manjua do sidea paluahkon sidea.ʼ

³⁴Tapi na gogoh do Sipaluah sidea; Jahowa Zebaot do goran-Ni. la do martinggilhon partinggilan ni sidea, laho mambahen marsonang-sonang tanoh in, tapi hitir-hitir ia pangisi ni Babel.

³⁵ʻPodang do na roh, nini Jahowa, bani halak Kasdim, bani pangisi ni Babel, bani kopala-kopala ni sidea ampa bani na pentar-pentar ni sidea.ʼ

³⁶Podang do na roh bani sipartondung, mambahen maoto sidea. Podang do na roh bani puanglima ni sidea, mambahen galek sidea.

³⁷Podang do na roh bani huda ni sidea ampa bani gareta ni sidea ampa bani haganup bala na legan na i tongah-tongah ni sidea, na mambahen songon naboru sidea; podang do na roh bani arta ni sidea, gabe hona rampas do ai. [602]

³⁸Podang do na roh bani bah ni sidea, gabe horah do ai. Ai tanoh ianan ni gana-gana do ai, anjaha gabe maoto do sidea halani gana-gana sipanonggoti ai.

³⁹Halani ai, marianan ma i Babel binatang, sorigala ampa burung unta; seng dong be na mangiankon ai lalab, anjaha seng dong be jolma na marianan ijai. [603]

⁴⁰Songon sanggah parseda ni Sodom pakon Gomora ampa dusun-dusunni, nini Jahowa, sonai do seng dong be halak na marianan ijai, anjaha seng dong be jolma na manginsolat ijai. [604]

⁴¹Tonggor ma, roh do sada bangsa hun utara, sada bangsa na banggal, anjaha buei raja-raja bingkat humbani ujung ni tanoh on. [605]

⁴²Mamboan sior ampa tanja do sidea; jahat do sidea, seng itanda holong ni uhur. Songon parhasak ni laut do sora ni sidea; marhuda do sidea roh, gopas marsinjata laho marmunsuh dompak ho ale boru Babel. [606]

⁴³Ibogei raja ni Babel ma barita ni sidea ai, gabe galek ma tanganni; biar do mandorabsi ampa na maborit songon parinangon na mangarou.

⁴⁴Tonggor ma, songon singa na tangkog hun harangan ni bah Jordan, marayak sampalan, sonai ma sompong pamerapon-Ku sidea hun tanoh ai, anjaha halak na hupilih pabangkiton-Ku manggomgom ai. Ai ise ma na songon Ahu? Ise ma siparhutuk Bangku? Ise ma parmahan na tahan mandompakkon Ahu? [607]

⁴⁵Halani ai, tangihon ma sura-sura ni Jahowa, sidalankonon-Ni dompak Babel ampa pingkiran-Ni pasal tanoh ni halak Kasdim; tongon, ronsi na etek-etek humbani biribiri ai maningon saradon do. Tongon, songgotan do sampalan ni sidea mangidah na masa bani sidea.

⁴⁶Halani sora na patugahkon partunduk ni Babel, dugur do tanoh on tarbogei do doruh-doruh ni sidea i tongah-tongah ni bangsa-bangsa.”