Read Batak Simalungun JEREMIA 51 Bible Online

JEREMIA 51 - Batak Simalungun bible

JEREMIA 51

¹Sonon do hata ni Jahowa, “Tonggor ma, papuhoon-Ku do tonduy na parsedahon dompak Babel ampa dompak pangisi ni Kasdim, [608]

²anjaha paingkaton-Ku do hu Babel pamiari, na mamiari sidea, anjaha palumeion ni sidea do tanohni, sanggah na roh sidea inggot mangkubusi, bani ari hamagouan ai.

³Ulang paturut parpanah manintak siorni, anjaha ulang ma paturut ia jongjong marbaju-baju partahanan; ulang lioi anak garama ni sidea, bois tumang ma bahen hanima balani haganup.

⁴Maningon radag do sidea tarbunuh i tanoh ni halak Kasdim, anjaha tartikam bani alaman ni sidea. [609]

⁵Tapi seng lalab mabalu Israel pakon Juda ipaturut Naibata ni sidea, Jahowa Zebaot; ai gok hasalahan do tanoh ni halak Kasdim dompak Na Ma Pansing ni Israel. [610]

⁶ Maporus ma hanima hun tongah-tongah ni Babel, anjaha marsipaluah dirini bei ma, ase ulang bois hanima bani panguhumon na bani ai. Ai panorang pambalason ni Jahowa do ai, laho mambalaskon domu hubani pambahenan ni sidea. [611]

⁷Panginuman omas do Babel ibagas tangan ni Jahowa, laho mambahen mabuk ganup tanoh on. Minum do sagala bangsa humbani anggurni, halani ai ratou do bangsa-bangsa. [612]

⁸Sompong do marumbak Babel anjaha marosak; tangisi ma ia! Buat ma minak bani ugahni, ra boi ope malum ia. [613]

⁹Sihol pamalumonnami do Babel, hape seng tartambari be. Tadingkon ma ia, laho ma hita ganup hu tanohni bei, ai das ronsi langit do uhum na bani ai, sundol ronsi hombun.

¹⁰Ipatalar Jahowa do hapintoronnami. Eta, baritahon hita ma i Sion pambahenan ni Jahowa, Naibatanta.

¹¹Aroti ma panah! Buat ma gantar! Ipuhoi Jahowa do tonduy ni raja-raja ni Madai, ai dompak Babel do uhur-Ni laho mangagou ai; pambalason ni Jahowa do ai, pambalason halani rumah-Ni. [614]

¹²Pajongjong ma mandera partanda manlawan tembok ni Babel. Pangkei ma marjaga-jaga; suruh ma siparjaga; suruh ma sipangonggopi! Ai Jahowa do na marranggihon ampa mandalankon na nilumbahon-Ni pasal pangisi ni Babel.

¹³Ho ale na marianan i lambung ni bah banggal, pararta na mabuei, jumpah ma ajalmu, rotapon ma hosahmu.” [615]

¹⁴Domma marbulawan Jahowa Zebaot bani diri-Ni, “Tongon, gok do bahenon-Ku ho bani jolma, songon balang bueini, marsurak-surak hamonangan do sidea dompak ho. [616]

¹⁵Ia do na manjadihon tanoh on marhitei gogoh-Ni, Ia do na pajonamkon dunia on marhitei hapentaran-Ni; anjaha marhitei habotohon-Ni ipaherbang do langit. [617]

¹⁶Anggo ipabogeihon sora-Ni marhasak ma bah ni langit, anjaha naik do hombun marhitei parentah-Ni humbani ujung ni tanoh on; hilap do ibahen parohkon udan, anjaha ipaluar do logou hun ianan panimpananni.

¹⁷Bodoh do ganup jolma, seng marpangartian; bador do ganup tukang omas ibahen gana-ganani; ai sipaoto-oto do gana-ganani anjaha seng marhosah.

¹⁸Na lang do ai, horja na pakahouhon; magou do ganupan ai bani panorang pambalason bani sidea.

¹⁹Seng sonai rupei ni si Jakob, ai Ia do na manjadihon sagala na dong, anjaha Israel do marga parbagianan-Ni, Jahowa Zebaot do goran-Ni.

²⁰Ho do parpalu Bangku, ale Babel, sinjata hu parmunsuhan; Huropuki do bangsa-bangsa marhitei ho, Huparseda harajaon-harajaon. [618]

²¹Huropuki do huda pakon na mangajaksi marhitei ho, gareta porang ampa sipargareta porang.

²²Huropuki do dalahi pakon naboru marhitei ho, na matua age na maposo, garama age anak boru.

²³Huropuki do parmahan ampa hulananni marhitei ho, parjuma ampa horbou paninggalani, raja-raja ampa kopala-kopala.

²⁴Tapi balaskonon-Ku do bani Babel pakon bani haganup pangisi ni Kasdim i lobei ni panonggornima, haganup hajahaton ni sidea, na binahen ni sidea bani Sion, nini Jahowa. [619]

²⁵Tonggor ma, Ahu do siimbang ho, ale dolog sipangagou, nini Jahowa, ho ma siagou ganup tanoh on; pagostongon-Ku do tangan-Ku dompak ho, anjaha gulangkonon-Ku do ho humbani dolog batu, anjaha bahenon-Ku do ho gabe dolog na tinutung.

²⁶Seng be tarbuat humbam batu gabe batu parsuhi atap batu onjolan; tapi halong ma ho lalab, nini Jahowa.

²⁷Pajongjong ma mandera partanda i tanoh on, sompul ma tarompit i tongah-tongah ni bangsa-bangsa; pasirsir ma bangsa-bangsa marporang dompaksi, dilo ma harajaon-harajaon mangimbangsi, Harajaon Ararat, Minni pakon Askenas! Pabangkit ma puanglima mangimbangsi, boan ma huda songon balang bueini! [620]

²⁸Pasirsir ma bangsa-bangsa mandorabsi, raja-raja ni Madai, rap pakon kopala-kopalani ampa pambobaini ronsi ganup nagori jajahanni ai.

²⁹Dugur do tanoh in anjaha hitir-hitir, ai saud do sura-sura ni Jahowa pasal Babel, laho mambahen tanoh Babel gabe halimisan, seng dong na mangiankon.

³⁰Iparontihon puanglima ni Babel do marporang, soh do sidea ibagas bentengni; mintop do habaranion ni sidea, gabe songon naboru do sidea; gajag do ianan ni sidea, mangkaponggol oruk-orukni.

³¹Marodor do suruhan roh, sonai age siboan barita, laho patugahkon bani raja ni Babel, na dob hona taban hutani inggot;

³²hona soluk do pandiparan, hona tutung partahanan, anjaha gok biar tentara.

³³Ai sonon do hata ni Jahowa, Naibata ni Israel, ʻDoskon pardogeian na niluntak-luntak do boru Babel; tongkin nari, roh ma panorang parpariamaon bani.ʼ

³⁴Ipangan si Nebukadnesar, raja ni Babel do ahu, irosaki do ahu; ibahen do ahu gabe hudon na lumei, ipolgap do ahu songon pambahen ni naga, igoki do boltokni marhitei na mantin-mantin, na adong bangku; hona usir do ahu ibahen, [621]

³⁵Sai sogop ma bani Babel odoh-odoh na binahenni hu bangku ampa bani sindohorhu, sonai ma ihatahon pangisi ni Sion. Marsapata hubani pangisi ni Kasdim ma darohku, sonai ma ihatahon Jerusalem.

³⁶Halani ai sonon do hata ni Jahowa, ʻTonggor ma, Ahu pe na mantinggilhon paringoranmu, anjaha na mambalaskon ho.ʼ Pahorahon-Ku do lautni, anjaha marsik bahenon-Ku parigini.

³⁷Gabe timbunan batu do Babel, ianan ni sorigala, gabe songgot-songgot anjaha sipahirion, seng marpangisi. [622]

³⁸Rap maraum do sidea songon singa anjaha mangorong songon anak ni singa.

³⁹Sanggah na hisapan sidea, pasirsiron-Ku do pesta bani sidea, pamabukon-Ku do sidea gabe galek lanjar tarpodom lalab anjaha seng puho be, nini Jahowa. (Dan. 5)

⁴⁰Patuadon-Ku do sidea songon anak ni biribiri hu panayatan songon biribiri tunggal pakon hambing tunggal.

⁴¹Tartaban do Babel, tartangkap na marmulia i sab tanoh on; gabe songgot-songgot do Babel i tongah-tongah ni bangsa-bangsa. [623]

⁴²Hona rungkub do Babel ibahen laut, parhasak ni gilumbangni do manutup ai.

⁴³Gabe halimisan do huta-hutani, gabe tanoh dorging anjaha lungun, seng dong marpangisi, seng dong jolma na montas hunjai.

⁴⁴Marlulu do Ahu bani Bel na i Babel, anjaha dokdokon-Ku hun babahni, na dob pinolgapni. Seng be marurup bangsa-bangsa roh hu bani, domma marumbak tembok ni Babel. [624]

⁴⁵Haluar ma hun tongah-tongahni, ale bangsang-Ku! Ganup ma paluahkon hosahni humbani gajag ni ringis ni Jahowa. [625]

⁴⁶Ulang rusak uhurnima ulang mabiar manangar barita i tanoh in, sanggah na roh barita tahun on, roh use barita bani tahun na sada nari, sanggah na masa odoh-odoh i tanoh in, marsipatundukan siparkuasa.

⁴⁷Halani ai, tonggor ma, roh ma panorang ni pambalason-Ku bani gana-gana ni Babel, bador ma ganup tanohni, anjaha radag do i tongah-tongahni sagala halakni na tarbunuh.

⁴⁸Jadi marsurak-surak ma mangidah Babel, langit pakon tanoh ampa ganup isini, ai roh do sipangagou mandorab sidea, hun utara, nini Jahowa.

⁴⁹Maningon tompas do Babel, halani na tarbunuh hun Israel, usih songon na rasei halak i sab tanoh on i lobei ni Babel.

⁵⁰Hanima na maluah humbani podang, bingkat ma, ulang soh! Paingat-ingat ma Jahowa humbani na daoh, anjaha siholan ma hanima bani Jerusalem. [626]

⁵¹Bador do hanami, ai ibogei-bogei hanami do risa-risa; habadoron do marrungkub bohinami, ai masuk do halak na legan hubagas ianan na pansing na i rumah ni Jahowa.

⁵²Halani ai, tonggor ma, na roh ma panorangni, nini Jahowa, marbalas ma Ahu dompak gana-gana ni sidea, anjaha bani sab tanoh ni sidea morong-orong do halak na ugahan.

⁵³Porini pe naik Babel das hu langit, anjaha age pe ipatoguh tembok na gijang ai, tapi parohon-Ku do sipangagou mangimbangsi, nini Jahowa. [627]

⁵⁴Tangar ma! Doruh-doruh hun Babel ampa hataluon banggal hun tanoh ni halak Kasdim!

⁵⁵Ai Jahowa do na parsedahon Babel anjaha ipasip hariahonni na banggal ai. Marhasak do gilumbangni songon bah banggal, anjaha maraloling do sora ni dilo-dilo ni sidea,

⁵⁶ai sipangagou do na roh bani Babel; hona tangkap do puanglimani, iparponggol do sior ni sidea; ai Jahowa, Naibata sipambalas, Ia do marlulu bani sidea. [628]

⁵⁷Pamabukon-Ku do raja-rajani, na pentar-pentarni, kopala-kopalani, pambobaini ampa balani; tarpodom ma sidea lalab, seng puho be, nini Raja in, na margoran Jahowa Zebaot. [629]

⁵⁸Sonon do hata ni Jahowa Zebaot, ʻTembok ni Babel na bolag ai, padosdoson do bani tanoh, anjaha horbanganni na gijang ai tutungon do bani apuy.ʼ Sisoya-soya do jolma mangkorja, anjaha apuy do na mangankon na hinalojahon ni bangsa-bangsa.” [630]

⁵⁹On do hata na tinonahkon ni Nabi Jeremia bani si Seraya, anak ni si Neriya, anak ni si Maaseya, sanggah na laho ia rap pakon si Sedekia, raja ni Juda, hu Babel, paompat-tahunkon, dob raja ia. Si Seraya do kopala ni kohoman. [631]

⁶⁰Domma isuratkon si Jeremia hinan bani sada buku sagala hasedaon siparohon hu Babel, ai ma haganup hata on, na isuratkon pasal Babel.

⁶¹Nini si Jeremia do dompak si Seraya, “Anggo das ho hu Babel, sarihon ma ase ibasahon ho ganup hata on,

⁶²anjaha hatahon ma, ʻHam Jahowa, Ham do marsahap pasal ianan on sihol mamboiskon in, ase ulang dong be na marianan ijin, jolma age pinahan, maningon gabe halimisan do in lalab.ʼ

⁶³Siapkonsi ibasa ho buku on, rahutkon ma batu hujin, anjaha gijigkon ma in hu Bah Eprat, [632]

⁶⁴anjaha hatahon ma, ʻSonai do manongnong Babel, anjaha seng mulgap be, ibahen hasedaon siparohon-Ku bani.ʼ ” Singgan jai ma hata ni si Jeremia.