Read Batak Simalungun JEREMIA 7 Bible Online

JEREMIA 7 - Batak Simalungun bible

JEREMIA 7

¹On do hata na roh hubani si Jeremia, humbani Jahowa,

²“Jongjong ma ho bani horbangan ni rumah ni Jahowa, tingtingkon ma hata on ijai, hatahon ma, ʻTangihon ma hata ni Jahowa, ale ganup halak Juda, na masuk hubani horbangan on, laho marsombah hubani Jahowa.ʼ

³Sonon do hata ni Jahowa Zebaot, Naibata ni Israel, ʻPadear hanima ma parlahounima ampa pambahenannima, ase Hupalopas hanima marianan bani ianan on. [96]

⁴Ulang ma porsaya uhurnima bani hata ladung, na mangkatahon, ʻRumah panumbahan bani Jahowa do on, rumah panumbahan bani Jahowa do on, rumah panumbahan bani Jahowa do on.ʼ

⁵Tongon, anggo ipadear hanima parlahounima ampa pambahenannima, ibahen hanima na pintor samah hanima,

⁶seng iodoh-odoh hanima halak panginsolat, na tading maetek ampa naboru na mabalu, seng iduruskon hanima daroh na so marpipot bani ianan on, anjaha seng iihutkon hanima naibata na legan, na gabe hamagouan bannima, [97]

⁷jadi palopason-Ku ma hanima marianan bani ianan on, bani tanoh na dob Hubere bani ompungnima, sadokah ni dokahni.

⁸Tapi tonggor ma, tenger do uhurnima bani hata ladung na so marguna,

⁹Manangko do hanima, mamunuh, marbangkis, mambijahon na so tongon, manggalang bani Baal, anjaha mangihutkon naibata na legan, na so ongga tinandanima hinan, [98]

¹⁰jadi dob ai roh do hanima jongjong i lobei-Hu i rumah panumbahan on, na marpanggoranan bani goran-Ku, ihatahon hanima, ʻDomma ipaluah hita!ʼ -- dob ai inunut hanima mangkorjahon na masambor on. [99]

¹¹Ai liang ni panamun do rumah on, na targoran bani goran-Ku, nini uhurnima? Ahu pe, tongon, Huidah do ai,ʼ nini Jahowa. [100]

¹²ʻLaho ma hanima bani ianan-Ku na i Silo, na parlobei Hubahen gabe ianan ni goran-Ku, anjaha tonggor ma, atap aha na Hubahen ijai halani hajahaton ni bangsang-Ku halak Israel. [101]

¹³On pe, halani ibahen hanima haganupan ai,ʼ nini Jahowa, ʻAnjaha age pe Hununut marsahap bannima, tapi seng itangihon hanima, anjaha Hudilo hanima tapi seng marbalos hanima, [102]

¹⁴halani ai bahenon-Ku ma bani rumah on, na targoran bani goran-Ku anjaha na pinangunsagahkonnima ai, ampa bani ianan na Hubere bannima pakon bani ompungnima, songon na dob Hubahen bani Silo. [103]

¹⁵Anjaha ambukkonon-Ku do homa hanima hun lobei-Hu, songon saninanima na dob Huambukkon, ai ma haganup ginompar ni Efraim.ʼ ” [104]

¹⁶“Ia ho, ulang ma tonggohon bangsa on, ulang ma pabogeihon elek-elekmu atap tonggomu mangkopkop sidea, anjaha ulang ma apiti sidea i lobei-Hu, ai seng anjai balosan-Ku age ho. [105]

¹⁷Ai ididah ho do na binahen ni sidea bani huta-huta ni Juda ampa bani dalan-dalan na i Jerusalem?

¹⁸Dakdanak patumpu soban, dalahi pagara apuy, naboru mangagu topung laho mambahen kue, bani raja naboru i langit; ambahni ai iuseihon galangan siinumon bani naibata na legan, laho manunsahi uhur-Hu. [106]

¹⁹Ai Ahu do nani na sinunsahan ni sidea ai?” Nini Jahowa. “Ai lang sidea sandiri do gabe habadoron bani sidea?

²⁰Halani ai sonon do hata ni Jahowa, ʻTonggor ma, duruskononkon do gilang-Ku ampa ringis-Ku bani ianan on, bani jolma ampa pinahan, bani hayu na i talun ampa bani gogoh ni juma; maningon gara do ai, seng intopkononkon.ʼ

²¹Sonon do hata ni Jahowa Zebaot, Naibata ni Israel, ʻTambahi hanima ma galangan situtungonnima bani galangan sisayatonnima, anjaha pangan hanima ma gulei ai. [107]

²²Ai sanggah Hupatangkog ompungnima hun tanoh Masir, seng dong Huhatahon atap Hutonahkon pasal galangan situtungon ampa galangan sisayaton bani sidea. [108]

²³tapi on do Hutonahkon bani sidea, ʻTangihon hanima ma sorang-Ku, ase Ahu gabe Naibatanima, anjaha hanima gabe bangsang-Ku; anjaha marparlahou ma hanima bani sagala dalan-Ku, na Hutonahkon bannima, ase marsonang-sonang hanima!ʼ [109]

²⁴Tapi seng itangihon sidea, anjaha seng ipateleng pinggol ni sidea laho manangar, tapi marparlahou do sidea domu bani rosuh-rosuh ni uhurni ampa hengkeng ni uhur ni sidea na jahat ai; itundali sidea do Ahu, seng idompakkon. [110]

²⁵Humbani ari pardarat ni ompungnima hun tanoh Masir das ronsi sadari on, marnunut do ganup ari Husuruh bannima juakjuak-Ku, ai ma nabi-nabi; [111]

²⁶tapi seng itangihon sidea Ahu, atap itareihon pinggol ni sidea, tapi ipajogal sidea do tangkuhukni. Manjahati do sidea lobih humbani ompung ni sidea. [112]

²⁷Anjaha porini pe ihatahon ho ganup hata on bani sidea, seng anjai tangihonon ni sidea ho, dilo-dilo pe ho bani sidea, seng anjai balosanni ho.

²⁸Halani ai hatahon ma bani sidea, ʻOn ma bangsa, na so ra manangihon sora ni Jahowa Naibatani, anjaha na so ra ajaran. Magou do hasintongan, daoh humbani pamangan ni sidea.ʼ [113]

²⁹Jambak ma jambulanmu, anjaha ambukkon ma ai; mandoruh-doruh ma ho i atas ni buntu-buntu, ai domma iambukkon anjaha itadingkon Jahowa sundut na ginilaan-Ni on. [114]

³⁰Ai ihorjahon ginompar ni Juda do na masambor i lobei-Hu,” nini Jahowa, “Ai inahkon sidea do gana-gana hagigi hu rumah panumbahan na targoran bani goran-Ku, laho pabutakkon ai. [115]

³¹Anjaha ipajongjong sidea do panggalangan Topet bani habungan Ben-Hinnom, laho manutung anak pakon boru ni sidea ibagas apuy, ai ma na so ongga Hutonahkon atap tubuh ibagas uhur-Hu. [116]

³²Halani ai, tonggor ma, na roh ma arini,” nini Jahowa, “seng be goranon ni halak ai Topet atap habungan Ben-Hinnom, tapi habungan Pamunuhon do anjaha i Topet mando halak mananom na mateini, halani seng dong be ianan na legan. [117]

³³Anjaha sagala bangkei ni bangsa on, maningon do panganon ni manuk-manuk na i awang-awang ampa binatang na i talun, seng dong na manggora ai. [118]

³⁴Anjaha parontihonon-Ku do i huta ni Juda pakon i alaman ni Jerusalem sora malas ni uhur ampa olob-olob, sora ni siparunjuk ampa sora ni tunangan, ai maningon tarulang do tanoh in.” [119]