Read Batak Simalungun TANGIS-TANGIS 2 Bible Online

TANGIS-TANGIS 2 - Batak Simalungun bible

TANGIS-TANGIS 2

¹Aih, irungkub Tuhan do bani hombun boru Sion halani ringis-Ni. Isampakkon Tuhan do hun langit hu tanoh hamuliaon ni Israel, seng idingat sidogeian ni nahei- Ni bani ari panggila-Ni. [15]

²Iparseda Tuhan do, seng maralang-alang, haganup ianan ni Jakob; anjaha iparreong do ibagas gila-Ni benteng-benteng ni boru Juda; isampakkon do hu tanoh, ipabutak do harajaon ai pakon raja-rajani.

³Iponggolhon do ibagas pargajag ni gila-Ni haganup kuasa ni Israel; itarik do humbani sidea tangan siamun-Ni bani parroh ni munsuh ni sidea; gajag do Ia i tongah-tongah ni Jakob songon apuy na mangankon inggot.

⁴Isintak do sior-Ni songon munsuh, iondamkon tangan siamun-Ni; songon imbang do Ia mambunuh haganup na hinarosuhkon ni mata-Ni, iuseihon do ibagas lampolampo ni boru Sion ringisni na songon apuy ai. [16]

⁵Gabe doskon munsuh do Tuhan, ibondut do Israel ganup; iparseda do haganup istanani, iparreong benteng-bentengni; mardapot-dapot do ibahen sitaronon ampa pusok ni uhur bani boru ni Juda. [17]

⁶Idogei-dogei do lampolamponi songon juma, iparseda ianan parpestaan bani. Maronti do ibahen Jahowa i Sion pesta ampa ari Sabat, anjaha iambukkon raja ampa malim ibagas gila-Ni. [18]

⁷Iambukkon Tuhan do anjapanjapni, magigi uhurni bani iananni na mapansing in; iondoskon do hubagas tangan ni munsuh tembok ni istana-istana; tarbogei do ibagas rumah ni Jahowa surak-surak ni sidea songon bani ari pesta. [19]

⁸Domma isurahon Jahowa sihol parsedahon tembok ni boru Sion; isibari do marhitei tali sibar-sibar, anjaha seng iambat tanganni laho mansedahon; ipaturut do marhoru batar-batar ampa tembokni, rap do ai marsorak. [20]

⁹Tinob do hubagas tanoh horbanganni, iparseda anjaha iparponggol do oruk-orukni; rajani pakon kopala-kopala i tongah-tongah ni parbegu do; seng dong be titah anjaha nabi pe seng dapotan pangungkabon be humbani Jahowa. [21]

¹⁰Sip do hundul i tanoh pangintuai ni boru Sion, inahkon abuan bani uluni, anjaha isorungkon hiou guni; unduk do hu tanoh ulu ni anak boru ni Jerusalem.

¹¹Marholok do matangku ibahen tangisku, lutu do huahap ibagas; usei do hu tanoh uhurhu parbagas ai halani parbois ni boru ni bangsangku; ai mandatei do dakdanak pakon na inuman i dalan-dalan. [22]

¹²Ihatahon bani inang ni sidea: Ija do indahan pakon anggur? sanggah na mandatei sidea songon halak na ugahan i dalan-dalan ni huta in, bani na laho rotap hosahni sidea ibagas abingan ni inangni.

¹³Aha ma hatahononku bani, bani aha ma umpamahononku ho, ale boru Jerusalem? Aha ma pausihonku bam laho mangapoh ho, ale anak boru, boru Sion? Ai songon bolag ni laut do hasedaonmu, ise ma na boi pamalum ho?

¹⁴Nabi-nabimu ijahai hubam ladung pakon tipu; seng ipatalar sidea salahmu laho pasuangkon ho, tapi ipajahahon do bam panonggoran ladung ampa na pakahouhon. [23]

¹⁵Martopap tangan do pasal ho sagala sipamontas, mandoruni anjaha iupir-upirhon uluni bani boru Jerusalem: Ai on do huta na ginoran ai, na tang sijengesan anjaha olob-olob ni ganup dunia on? [24]

¹⁶Ipangangang sagala munsuhmu do babahni dompak ho, mandoruni anjaha harat-harat ipon do sidea, nini: Domma maseda ia ibahen hanami. Tongon on ma ari na sinurahonnami; domma jumpah hanami, domma iidah hanami. [25]

¹⁷Ipasaud Jahowa do na sinurahon-Ni, idalankon do lumba-lumba-Ni; songon na dob hinatahon-Ni sapari, iboiskon do ai seng maralang-alang. Ibahen do munsuh ai marmalas ni uhur mangidah ho, anjaha ipatimbul do kuasa ni imbangmu. [26]

¹⁸Dilo-dilo ma ho bani Tuhan in! Tangis ma ho ale boru Sion. Paturut ma iluhmu mabaor songon bah arian pakon borngin, ulang ma ho marsaran, ulang pasohkon matamu. [27]

¹⁹Jongjong ma, tangis ma ho borngin, sanggah mulai panorang marjaga; useihon ma uhurmu songon bah i lobei ni Tuhan, paherbang ma tanganmu martonggo Bani pasal goluh ni niombahmu, na mandatei halani lohei i topi ni ganup dalan. [28]

²⁰Tonggor ma, ale Jahowa, anjaha kawahkon Ham ma! Bani ise ongga ibahen Ham sonai? Mase ma panganon ni parinangon ginomparni, dakdanak na pinagodang-godangni? Mase ma hona bunuh malim pakon nabi bani ianan na mapansing ni Tuhan? [29]

²¹Radag do bani orbuk ni dalan-dalan dakdanak age na matua, rasei do ibahen podang anak boru ampa garama; ibunuh Ham do sidea bani panorang ni gila-Mu, isayati Ham do sidea seng maralang-alang.

²²Iontang Ham do na manonggoti ahu liot, songon na laho marpesta, seng dong na maluah atap na bansah bani ari parringis ni Jahowa. Sidea na huombah-ombah ampa na hupagodang-godang, bois do ibahen munsuhku. [30]