Read Batak Simalungun TANGIS-TANGIS 3 Bible Online

TANGIS-TANGIS 3 - Batak Simalungun bible

TANGIS-TANGIS 3

¹Ahu ma sada halak na dihut mangahapkon na maborit marhitei pukul-pukul ni ringisni.

²Ialai anjaha itogu do ahu bani na golap, na so dong sinalsal.

³Tongon sai dompak ahu do itujuhon tanganni, marnunut-nunut layur ari.

⁴Royut do ibahen angkulangku pakon hulingkulingku, anjaha iparponggol holi-holingku.

⁵Ipajunjun do dompak ahu inggot na mapaet ampa hasunsahan.

⁶Ibahen do ahu marianan ibagas hagolapan songon halak na dob dokah matei. [31]

⁷Ibahen do tembok inggot bangku, seng tarbahen maluah ahu; inahkon do bangku gari na borat. [32]

⁸Porini pe dilo-dilo anjaha mangelek-elek ahu, seng hona tangihon tonggongku. [33]

⁹Irungga do dalanku marhitei batu na niongkal, marlegot-legot do ibahen dalanku.

¹⁰Songon gipul na manggompangi do Ia bangku, songon singa na marponop. [34]

¹¹Itogu do ahu dompak dalan na kahou, iparsilbak ahu, ibahen do ahu tarpunjung.

¹²Isintak do siorni, anjaha ipajongjong do ahu songon sasaran ni panahni. [35]

¹³Ibahen do tolpus ronsi piah-piahku, lingkit ni parlingkitanni.

¹⁴Gabe sipartatawaan do ahu bani ganup bangsangku, gabe sidoding-dodingkonon ni sidea ganup ari. [36]

¹⁵Ibosuri do ahu bani na mapaet, ipainum do bangku raru.

¹⁶Ipaharatkon do bangku batu loting, ipaksahon do ahu masuk hubagas orbuk.

¹⁷Ipadaoh do tonduyhu humbani hadameion, gabe lupa ahu bani na madear.

¹⁸Jadi ningku ma: Salpu do hamuliaonku, pangarapanku bani Jahowa.

¹⁹Mardingat bani sitaronon ampa hasunsahanku, pogu ampa rasun do ai bangku.

²⁰Tongtong mardingat hujai, gabe unduk do tonduyhu ibagas.

²¹On do tong huparimbagaskon, halani ai do ase marpangarapan ahu:

²² Idop ni uhur ni Jahowa do na so ra marpunsa, seng marnarotap holong ni atei-Ni. [37]

²³ Mulak ratah do ai siap sogod, banggal do habonaron-Mu. [38]

²⁴ Jahowa do rupeihu, nini tonduyhu, halani ai Bani do ahu marpangarapan. [39]

²⁵Pardear layak do Jahowa bani halak na martenger ni uhur Bani, bani tonduy na mangindahisi.

²⁶Dear do sipsip marpangarapan bani hatuahon na humbani Jahowa. [40]

²⁷Dear do sada halak anggo mangusung pasangan ia sanggah poso.

²⁸Punjung ma ia hundul anjaha sip, anggo itampeihon Tuhan ai bani.

²⁹Ipadohor ma bani orbuk pamanganni, andohar dong ope pangarapan.

³⁰Itarehon ma huyumni bani halak sipanompas, ronsi bosur ia bani pandorunion.

³¹ Ai seng ra Tuhan in mangambukkon halak ronsi sadokah ni dokahni.

³² Ai age pe domma marhoru ibahen, holong do use uhur-Ni romban hubani hinabuei ni idop ni uhur-Ni, [41]

³³ ai sedo halani rosuh-Ni, ase iarsik anjaha ipusoki uhur ni anak ni jolma.

³⁴Mandogei-dogei halak na tartutup i tanoh on,

³⁵papeletkon hak ni halak i lobei ni Sitimbulan in,

³⁶mangodoh halak bani parkarani, ai seng kawahkonon ni Tuhan ai?

³⁷Ise ma, na marsahap gabe jadi ai, anggo sedo Tuhan na mamarentahkon? [42]

³⁸Ai lang humbani pamangan ni Sitimbulan in do luar hamagouan ampa hatuahon?

³⁹Mase marungut-ungut jolma na manggoluh in? Dompak dousani ma ia marungut-ungut.

⁴⁰Uji anjaha pareksa hita ma parlahouta, mulak ma hita bani Jahowa.

⁴¹Dear ma angkat hita uhurta ampa tanganta bani Naibata na i surga.

⁴²Domma marbalik hanami anjaha manlawan, seng iampuni Ham hanami. [43]

⁴³Ringis do irungkubkon Ham Bamu, anjaha ipardakdak Ham do hanami; ibunuh Ham do hanami, seng maralang-alang.

⁴⁴Irungkub Ham do diri-Mu bani hombun, gabe seng boi tolpus tonggo.

⁴⁵Ibahen Ham do hanami gabe tompoh-tompoh ampa sihagigihonon i tongah-tongah ni bangsa-bangsa. [44]

⁴⁶Sagala munsuhnami pangangang babahni dompak hanami; [45]

⁴⁷hasonggotan pakon godung do mandorab hanami, hasedaon ampa hamagouan.

⁴⁸Marabur-abur iluh do matangku songon binanga halani hasedaon ni boruni bangsangku. [46]

⁴⁹Seng marnamangadi iluhku mabaor, seng marnasoh, [47]

⁵⁰paima manatap anjaha mangkawah Jahowa hun surga;

⁵¹matangku mambahen pusok ni uhurhu halani pangahapan ni haganup boru ni hutangku. [48]

⁵²Hona ayak-ayak do ahu songon manuk-manuk, ibahen munsuhku seng marhala.

⁵³Manggoluh do ahu iunjomkon hubagas godung, anjaha ipargijig ahu bani batu. [49]

⁵⁴Isalpui bah do ulungku, gabe huhatahon, ʻMagou ma ahu!ʼ

⁵⁵Dilo-dilo do ahu bani goran-Mu, Ham Jahowa, humbani parbagasan ni godung ai;

⁵⁶itangihon Ham do sorangku. Ulang ma tutup Ham pinggol-Mu dompak dilo-dilongku ampa elek-elekku!

⁵⁷Roh do Ham hun dohor sanggah na dilo-dilo ahu Bamu, nimu, ʻUlang mabiar!ʼ

⁵⁸Ham do, ale Tuhan, na mantinggilhon partinggilanku, ipaluah Ham do hosahku.

⁵⁹Iidah Ham do, ale Jahowa, odoh-odoh bangku, pintori Ham ma ahu.

⁶⁰Iidah Ham do sagala sura-sura pambalason ni sidea, haganup tahi-tahini sidea dompak ahu.

⁶¹Ibogei Ham do, ale Jahowa, pandorunionni sidea, pakon haganup tahi-tahini sidea dompak ahu.

⁶²Sahap-sahap ni imbangku ampa pingkiran ni sidea roh mandorab ahu ari-ari.

⁶³Sanggah na hundul sidea atap jongjong, tonggor Ham ma, ahu do gabe doding-doding bani sidea. [50]

⁶⁴Ham ma na mambalaskon bani sidea, ale Jahowa, romban hubani pambahenan ni tanganni. [51]

⁶⁵Ham ma na pahengkeng uhur ni sidea, papa-Mu ma mangonai bani sidea.

⁶⁶Ham ma na mardakdak sidea ibagas gila-Mu, anjaha Ham ma na mamboiskon sidea hun toruh ni langit-Mu, ale Jahowa!”