Read Batak Simalungun TANGIS-TANGIS 5 Bible Online

TANGIS-TANGIS 5 - Batak Simalungun bible

TANGIS-TANGIS 5

¹Ingat ham ma, ale Jahowa, na masa bennami; idah anjaha mangkawah ma Ham bani habadoronnami!

²Ondos bani halak na legan do parbagianannami, rumahnami bani bangsa na legan.

³Tading maetek do hanami, lang marbapa be, gabe hira na mabalu do inangnami.

⁴Maningon manggalar do hanami bani bahnami, anjaha sobannami maningon bolionnami do.

⁵Tampei pasangan bani tangkuhuknami, hona pardakdak do hanami; loja do hanami, seng ipalopas marsaran.

⁶Hu Masir do isurdukkon hanami tangannami, hu Assur, ase sungkupan sipanganon hanami.

⁷Mardousa do ompungnami, anjaha seng dong be sidea; hanami do mamorsan salah ni sidea. [61]

⁸Jabolon do na manrajai hanami, seng dong na paluahkon hanami humbani kuasa ni sidea.

⁹Mangajamkon hosah hanami mangalop sipanganonnami, halani podang i halimisan.

¹⁰Milas do hulingkulingnami songon tataring, halani panutung ni milas ni lohei.

¹¹Hona butakan do naboru i Sion, anak boru i huta-huta ni Juda.

¹²Kopala-kopala hona gantung marhitei tangan ni sidea; partua-partua seng ipasangap.

¹³Ipaksa do garama mangkorja bani pandudaan, dakdanak mangkatargompang manarui soban.

¹⁴Maronti do partua-partua martumpu i horbangan, anjaha na maposo seng be marhusapi. [62]

¹⁵Mangadi do malas ni uhurnami; mubah tortornami gabe tangis-tangis.

¹⁶Madabuh do sortali humbani ulunami; bursik do hanami halani dousanami! [63]

¹⁷Halani ai do ase maborit uhurnami, halani ai do ase solong matanami,

¹⁸halani Dolog Sion, na dob tarulang ai; sorigala mando mardalani ijai.

¹⁹Tapi Ham, ale Jahowa, ronsi sadokahni dokahni do manrajai; totap do paratas-Mu marsundut-sundut. [64]

²⁰Mase ma lupa Ham lalab bennami, mase ma sonin dokahni itadingkon Ham hanami?

²¹Boan Ham ma hanami, ale Jahowa, mulak Bamu, ase saud hanami mulak! Pabayu Ham ma ari-arinami songon na ijia! [65]

²²Mintor mambur sonin ma hanami paturuton-Mu? Ai seng marsibar gila-Mu bennami?