Read Batak Simalungun HESEKIEL 10 Bible Online

HESEKIEL 10 - Batak Simalungun bible

HESEKIEL 10

¹Jadi mangkawah ma ahu, anjaha tonggor ma, bani langit na i babou ni herubim ai, adong do songon batu intan sapir, tompani songon paratas, i atas ni ai. [77]

²Dob ai nini ma dompak dalahi na marhiou silopak ai, “Masuk ma ho hu holangkolang ni galapang ai, na i toruh ni herubim ai, goki ma tanganmu bani narnar na gara ai, na i holangkolang ni herubim ai, anjaha sampakkon ma ai hu atas ni huta ai.” Jadi masuk ma ia huidah. [78]

³Jongjong do herubim ai hampit siamun ni Rumah Panumbahan ai, sanggah na masuk dalahi ai, anjaha igoki hombun do alaman parbagas ai.

⁴Naik ma hamuliaon ni Jahowa humbani herubim ai hubani onjolan ni labah ni Rumah Panumbahan ai; jadi igoki hombun ma rumah ai, anjaha gok sinalsal ni hasangapon ni Jahowa ma alaman ai. [79]

⁵Anjaha tarbogei do sora ni habong ni herubim ai das hu alaman pardarat ai usih songon sora ni Naibata pargogoh na so tarimbang, sanggah marsahap Ia. [80]

⁶Sanggah na pinarentahkonni ai dalahi na marhiou silopak ai, “Buat ma apuy hun holangkolang ni galapang, hun tongah-tongah ni herubim ai!” Gabe masuk ma ia anjaha jongjong i lambung ni galapang ai.

⁷Jadi idurdurhon sada herub ma tanganni hun tongah-tongah ni herubim ai dompak apuy na i holangkolang ni herubim ai, anjaha ibuat ma deba hunjai, lanjar ibere hubagas tangan ni dalahi na marhiou silopak ai; ijalo ma ai anjaha luar ma ia.

⁸Anjaha taridah do bani herubim ai songon rupa ni tangan ni jolma, i toruh ni habong ni sidea bei.

⁹Dob ai mangkawah ma ahu anjaha tonggor ma, adong do ompat galapang i lambung ni herubim ai, sada galapang i lambung ni ganup herub; ia rupa ni galapang ai, songon batu intan Tarsis na marlinang-linang do. [81]

¹⁰Dos do rupa ni na ompat ai, tapi popouni songon na i tongah-tongah ni galapang na sada do na sada nari idahon.

¹¹Anggo bingkat sidea, laho do sidea dompak lobeini bei, seng marhusor sanggah na laho ai; huja galapang parlobei ai laho, hujai do irik laho na legan ai, seng marhusor sanggah na laho ai.

¹²Haganup badan ni herubim ai, gurungni, tangan ni sidea, habong ni sidea ampa galapang ai, gok mata do inggot, haompatsi galapang ai. [82]

¹³Ia galapang ai, halisungsung do goranni ai hubogei.

¹⁴Anjaha ompat do bohi ni ganup ai: bohi na parlobei bohi ni herub, na paduahon bohi ni jolma, na patoluhon bohi ni singa anjaha na paompatkon bohi ni manuk-manuk nanggordaha. [83]

¹⁵Anjaha naik ma herubim ai, ai ma pargoluh na dob huidah i lambung ni Bah Kebar. (bd. 1)

¹⁶Anggo mardalan herubim ai, mardalan ma galapang ai i lambung ni sidea; anjaha anggo ipaherbang herubim ai habongni laho naik hun tanoh, seng mosor galapang ai hun lambung ni sidea.

¹⁷Anggo maronti sidea, maronti ma ai, anggo naik sidea, naik ma ai rap pakon sidea; ai ibagas galapang ai do tonduy ni pargoluh ai.

¹⁸Dob ai luar ma hamuliaon ni Jahowa hun onjolan ni labah ni Rumah Panumbahan ai, anjaha sogop ma hu atas ni herubim ai.

¹⁹Ipaherbang herubim ai ma habongni, anjaha naik ma sidea hun tanoh on huidah bani pardarat ni sidea ai; rap pakon sidea do galapang ai; anjaha maronti ma sidea bani horbangan parhapoltakan ni rumah ni Jahowa, anjaha hamuliaon ni Naibata ni Israel do ibabou ni sidea. [84]

²⁰Ai ma pargoluh na huidah i toruh ni Naibata ni Israel, i topi ni Bah Kebar; anjaha hutanda ma herubim do sidea hape.

²¹Ompat bei do bohini anjaha ompat bei do habongni, anjaha i toruh ni habong ni sidea adong do tangan songon tangan ni jolma.

²²Ia rupa ni bohi ni sidea, usih do bani rupa ni bohi na huidah i topi ni Bah Kebar; ganup do sidea laho pintor hu lobei.