Read Batak Simalungun HESEKIEL 12 Bible Online

HESEKIEL 12 - Batak Simalungun bible

HESEKIEL 12

¹Dob ai roh ma hata ni Jahowa hu bangku, mangkatahon,

²“Ale anak ni jolma, i tongah-tongah ni bangsa sipanlawan do ho marianan, na marmata laho mangidah, tapi seng marpangidah, na marpinggol laho mambogei namin, tapi seng marpambogei, ai bangsa sipanlawan do sidea. [95]

³“Ale anak ni jolma, pasirsir ma bam ugas-ugas hu habuangan anjaha misir ma ho arian ididah sidea. Ra mangahap do sidea, ai bangsa sipanlawan do sidea.

⁴Padarat ma barangmu arian ididah sidea, songon ugas-ugas laho hu habuangan; tapi anggo ho bodari ma laho ididah sidea, songon na masa bani halak na tarbuang.

⁵Runtas ma dingding ai ididah sidea, anjaha hunjai ma ho hu darat.

⁶Usung ma ugas-ugasmu bani abaramu ididah sidea, anjaha dob golap ari boan ma ai; rungkub ma bohimu, ase ulang ididah ho tanoh in; ai Ahu do na pabingkat ho gabe tanda bani halak Israel.” [96]

⁷Jadi hubahen ma songon na tinonahkon ai hu bangku; hupadarat ma ugas-ugasku arian songon na laho hu habuangan, anjaha bodari huruntas ma dingding ai marhitei tanganku sandiri; anjaha dob golap ari luar ma ahu mangusung ugas-ugaskai ididah sidea.

⁸Anjaha patarni ai roh ma hata ni Jahowa hu bangku, Mangkatahon,

⁹“Ale anak ni jolma, ai seng dong humbani bangsa Israel, bangsa sipanlawan in, mangkatahon hubam, ʻAha do na binahenmin?ʼ

¹⁰Hatahon ma bani sidea, sonon do hata ni Tuhan Jahowa, ʻMangonai bani raja na i Jerusalem do in pakon bani ganup bangsa Israel na i tongah-tongahni ai.ʼ [97]

¹¹Hatahon ma, ʻAhu do tanda bennima; songon na Hubahen ai, sonai do mangonai bani sidea, maningon bingkat do sidea hu habuangan. [98]

¹²Anjaha raja na i tongah-tongah ni sidea ai maningon usungonni do ugas-ugas bani abarani sanggah na luar ibagas na golap; dingding do runtasonni laho luar. Rungkubonni do bohini, ase ulang ididah tanoh ai. [99]

¹³Anjaha paherbangon-Ku do puhot-Ku i babouni, anjaha dapot do ia ibahen siding-Ku. Boanon-Ku do ia hu Babel, hu nagori ni halak Kasdim, tapi seng idahon ni nagori ai, anjaha ijai do ia matei. [100]

¹⁴Anjaha bani sagala deisa do paerapon-Ku sagala halak na mangkasomanisi, sipangurupi bani ampa haganup balani; sintakon-Ku do podang hun pudi ni sidea.

¹⁵Jadi tandaon ni sidea ma, Ahu do Jahowa, anggo domma Huerap sidea hu tongah-tongah ni bangsa-bangsa anjaha mambur sidea Hubahen bani nagori-nagori ai.

¹⁶Tapi paturuton-Ku do deba tading humbani sidea, na maluah humbani podang, humbani lohei ampa sampar, ase sidea ma na mambaritahon sagala hasamboron ni sidea i tongah-tongah ni sagala bangsa, parmerapan ni sidea ai, ase itanda sidea, Ahu do Jahowa.ʼ ” [101]

¹⁷Dob ai roh ma hata ni Jahowa hu bangku, mangkatahon,

¹⁸“Ale anak ni jolma, pangan ma rutimu hitir-hitir, anjaha inum ma bahmu ibagas na gobir ampa hasosakan.

¹⁹Anjaha hatahon ma pasal bangsa na i nagori ai, ʻSonon do hata ni Tuhan Jahowa, pasal pangisi ni Jerusalem, na i tanoh Israel, maningon hitir-hitir do panganon ni sidea ruti ni sidea, anjaha gobir inumonni bah ni sidea, ai halong ma tanoh ni sidea anjaha hona rampas sagala na dongni halani hajahaton ni sagala pangisini.

²⁰Tarulang ma huta-huta na niiankon, anjaha lungun ia tanoh ai; jadi tandaonnima ma, Ahu do Jahowa.”

²¹Dob ai roh ma hata ni Jahowa hu bangku, mangkatahon,

²²“Ale anak ni jolma, sahap aha do in sinahapkonnima i tanoh Israel, na mangkatahon, ʻDokah ope ari ai, anjaha seng tongon na hinatahon ni panjahaion.ʼ [102]

²³Halani ai hatahon ma bani sidea, sonon do hata ni Tuhan Jahowa, ʻParontihonon-Ku do sahap-sahap ai, anjaha seng be luarhonon ni sidea umpama ai i Israel.ʼ Tapi hatahon ma bani sidea, ʻDohor ma ari ai, anjaha saud ma ganup panjahaion.ʼ [103]

²⁴Ai seng dong be hu lobeian on panonggoran sipaoto-oto atap panjahaion na pakahouhon i tongah-tongah ni bangsa Israel.

²⁵Tapi Ahu, Jahowa sandiri ma na marsahap, anjaha hata na Huhatahon, maningon saud do ai. Seng be padokah-dokahon ai, tapi bani panorangnima ope, ale bangsa sipanlawan, marsahap Ahu anjaha pasaudon-Ku ai,” nini Tuhan Jahowa.

²⁶Dob ai roh ma hata ni Jahowa hu bangku mangkatahon,

²⁷“Ale anak ni jolma, tonggor ma, sidea bangsa Israel Mangkatahon, ʻPanonggoran na nididahni ai, dokah ope ai, anjaha manjahai do ia pasal panorang na daoh ope.ʼ

²⁸Halani ai hatahon ma bani sidea, sonon do hata ni Tuhan Jahowa, ʻSeng be sipadokah-dokahon hatang-Kin; tapi hata na dob huhatahon in pasaudon ma,ʼ ” nini Tuhan Jahowa.