Read Batak Simalungun HESEKIEL 13 Bible Online

HESEKIEL 13 - Batak Simalungun bible

HESEKIEL 13

¹Dob ai roh ma hata ni Jahowa hu bangku, mangkatahon,

²“Ale anak ni jolma, manjahai ma ho dompak nabi ni Israel; manjahai anjaha marsahap ma ho bani sidea, na manjahai humbani pingkiran ni sidea. Tangihon ma hata ni Jahowa! [104]

³Sonon do hata ni Tuhan Jahowa, Magou ma nabi-nabi na oto ai, na paihut-ihut tonduyni sandiri, na so tongon dong nididahni. [105]

⁴Songon sorigala, na marianan bani reong-reong, sonai do nabimu, ale Israel. [106]

⁵Seng ijaga sidea bungbung ni tembok, atap ipajongjong tembok mangondingi ginompar ni Israel, ase tahan sidea jongjong ibagas paruntolon bani ari ni Jahowa. [107]

⁶Sipaoto-oto do panonggoran ni sidea, pakahouhon do panjahaionni. Nini sidea, ʻSonon do hata ni Jahowa; hape sedo Jahowa na marsuruh sidea, anjaha mangarap do sidea bani parsaud ni hata ai.ʼ [108]

⁷Ai lang panonggoran sipaoto-oto do na nididahnima anjaha panjahaion ladung do hinatahonnima, sanggah na hinatahonnima ai: “Hata ni Jahowa”, age pe sedo Ahu na mangkatahon ai?ʼ

⁸Halani ai sonon do hata ni Tuhan Jahowa, ʻHalani isahapkon hanima sipaoto-oto anjaha ladung do na nididahnima ai, halani ai, tonggor ma, imbang-Ku ma hanima,ʼ nini Tuhan Jahowa.

⁹ʻAnjaha tangan-Ku ma na mangonai bani nabi na marpanonggoran sipaoto-oto ai, anjaha na manjahai ladung ai; seng masuk be sidea bani humpulan ni bangsang-Ku, atap tarsurat bani register ni bangsa Israel, anjaha seng masuk be sidea hu tanoh ni Israel, jadi botohonnima ma, Ahu do Tuhan Jahowa.ʼ [109]

¹⁰Halani tongon, halani pinakahou ni sidea ai bangsang-Ku, Nini, ʻDamei do!ʼ Hape seng dong damei, anjaha anggo ipauli bangsa ai tembok tanoh, gabe tonggor ma, roh do sidea mangkapur ai, [110]

¹¹halani ai hatahon ma bani pangkapur ai, paboa maningon marumbak do ai. Roh do udan na mapor, mardabuhan udan sira-sira anjaha mangombus logou na marhaba-haba,

¹²anjaha tonggor ma, marumbak ma tembok ai. Ai lang hatahonon ni halak ma bannima, ʻIja do hapur, na nilapuhonnima hujai?ʼ

¹³Halani ai sonon do hata ni Tuhan Jahowa, Parohon-Ku do haba-haba ibagas ringis-Ku, anjaha pamasaon-Ku udan na mapor ibagas gilang-Ku ampa udan sira-sira na parah ibagas marah-Ku, laho mamboiskon ai.

¹⁴Anjaha reongkonon-Ku do tembok na dob hinapurnima ai, padosdoson-Ku do ai pakon tanoh, gabe tidak ma onjolanni; anggo marumbak huta ai, bois ma hanima ibagas, jadi tandaonnima ma, Ahu do Jahowa. [111]

¹⁵Anjaha pasogopon-Ku ma ringis-Ku bani tembok ai ampa bani sipangkapuri ai, anjaha hatahonon ni halak ma bannima, ʻSeng dong be tembok ai, sonai homa sipangkapuri ai,ʼ

¹⁶ai ma nabi-nabi ni Israel, na manjahai pasal Jerusalem, na mangambilankon damei hubani huta ai, hape seng dong damei,” nini Tuhan Jahowa. [112]

¹⁷“Anggo ho, ale anak ni jolma, dompakkon ma bohimu manlawan boru ni bangsamu, na manjahai humbani pingkiranni sandiri; manjahai ma ho dompak sidea,

¹⁸anjaha hatahon ma, sonon do hata ni Tuhan Jahowa, ʻBursik ma naboru, na mambahen balut-balut uti-utian bani pargolangan anjaha na mambahen tudung-tudung bani ulu ni halak na maetek ampa na godang, laho manangkap tonduy ni halak! Ai sihol pamateonnima do tonduy ni halak humbani bangsang-Ku, anjaha na legan ipagoluh hanima halani labanima?

¹⁹Mahiri do Ahu ibahen hanima i tongah-tongah ni bangsang-Ku halani gandum sannangging ampa ruti sansayat, marhitei na mamunuh tonduy na so patut bunuhon, ampa marhitei na pagoluhkon tonduy na so patut pagoluhon, marhitei ladungnima bani bangsang-Ku, na ra patangi-tangi ladung ai.ʼ [113]

²⁰Halani ai sonon do hata ni Tuhan Jahowa, ʻTonggor ma, Ahu do imbang ni balut-balut uti-utiannima, na pinakeini ma manangkap tonduy ni jolma; rotapon-Ku do ai humbani tangannima, anjaha paluahon-Ku do tonduy na pinarburunima songon manuk-manuk.

²¹Tudung-tudungnima ai pe parrigaton-Ku do, anjaha paluahon-Ku do bangsang-Ku hum bagas tangannima, anjaha seng be songon sorohan sidea ibagas tangannima, anjaha tandaonnima ma, Ahu do Jahowa.

²²Halani ipusoki hanima uhur ni halak parpintor marhitei sipaoto-oto hape anggo Ahu seng ongga Hupusoki sidea, anjaha halani ipargogohi hanima parjahat in, gabe seng surut ia humbani parlahouni na masambor, laho pagoluhkon tonduyni. [114]

²³halani ai seng be marpanonggoran sipaoto-oto hanima, anjaha seng be manjahai ladung hanima. Paluahon-Ku do bangsang-Kin humbani tangannima, jadi tandaonnima ma, Ahu do Jahowa.ʼ ”