Read Batak Simalungun HESEKIEL 18 Bible Online

HESEKIEL 18 - Batak Simalungun bible

HESEKIEL 18

¹Dob ai roh ma hata ni Jahowa hu bangku, mangkatahon,

²“Aha do halani ase isahap-sahapkon hanima umpama pasal tanoh Israel: Bapa mangankon buah ni anggur na migar, hape ipon ni anakni do ngiluan? [169]

³Songon sintongni manggoluh Ahu,” nini Tuhan Jahowa, “seng bulih be sahapkononnima umpama on i Israel.

⁴Tonggor ma, Ahu do simada ganup tonduy ni jolma, tonduy ni bapa age tonduy ni anak, Ahu do simadasi; ise na mardousa, ia do na maningon matei. [170]

⁵Anggo pintor sada halak, ihorjahon uhum ampa hapintoron,

⁶anggo seng ipangan na ginalangkon i atas dolog, seng mangkawah ia dompak gana-gana ni ginompar ni Israel, seng ra ia pabutak parinangon ni hasomanni, anjaha seng idohori sada naboru bani panorang mabutak ia, [171]

⁷seng dong halak na iodoh-odoh, tapi ipaulak do bani siparutang gadeianni, seng ra ia manrampas, ibere do sipanganon bani na loheian, anjaha iparhioui halak na talanjang, [172]

⁸seng paanakkon duit ia, seng ra mambuat untung na malobihtu, ipadaoh tanganni humbani hagedukon, sintong panguhumni bani halak na marsalisih, [173]

⁹marparlahou ia ibagas titah-Ku, anjaha jimot ia mandalankon paraturan-Ku, ai ma halak parpintor, maningon manggoluh do ia tongon,” nini Tuhan Jahowa.

¹⁰“Tapi anggo adong tubuh anak ni siparjahat, siduruskon daroh atap sihorjahon na masambor,

¹¹na so marparlahouhon parlahou ni bapani parpintor ai, tapi ipangan do na ginalangkon i atas dolog, ibutaki parinangon ni hasomanni,

¹²iodoh-odoh na masombuh ampa na madoyuk, idalankon panrampason, seng ipaulak gadeian bani, mangkawah matani dompak gana-gana, ihorjahon hagigi,

¹³ipaanakkon duitni anjaha malobihtu pambuatni bani untung, ai sipagoluhon do jolma sisonai ai? Seng bulih manggoluh ia, tapi halani ihorjahon haganup hagigi nongkan ai, maningon matei do ia, marsapata hubani do darohni.

¹⁴Porini tubuh anakni sada, anjaha ididah anak ai sagala dousa na hinorjahon ni bapani, gabe mabiar ia anjaha seng ihorjahon ai,

¹⁵seng ipangan na ginalangkon i atas dolog, seng ikawahkon gana-gana ni ginompar ni Israel, seng ibutaki jolma ni hasomanni,

¹⁶seng dong na iodoh-odoh, seng ijalo gadeian, seng idalankon panrampason, ibere sipanganon bani na loheian, iparhioui halak na talanjang,

¹⁷ipadaoh tanganni humbani hagedukon, seng ipaanakkon duitni atap ibuat untung na mabahattu, idalankon aturan-Ku anjaha ihorjahon do titah-Ku, seng anjai matei ia halani hajahaton ni bapani, sai na manggoluh do ia.

¹⁸Tapi ia bapani ai, sipangodoh-odoh anjaha siparrampas ai, sihorjahon na so patut i tongah-tongah ni bangsani, tonggor ma, maningon matei do ia halani hajahatonni.

¹⁹Hape ihatahon hanima, ʻAi mase ma lang mangonai hubani anak dousa ni bapani?ʼ Halani ihorjahon anak ai uhum ampa hapintoron, idalankon haganup titah-Ku, maningon manggoluh do ia.

²⁰Ise sipardousa, ia do matei! Sedo anak mamorsan hajahaton ni bapani, anjaha sedo bapa mamorsan hajahaton ni anakni. hapintoron ni parpintor hu bani do sogop, anjaha hajahaton ni parjahat sogop hu bani do. [174]

²¹ Tapi anggo itundalhon parjahat ai haganup dousani, na hinorjahonni, anjaha idalankon haganup titah-Ku, anjaha ihorjahon uhum ampa hapintoron, maningon manggoluh do ia, seng matei. [175]

²² Haganup hajahatonni na hinorjahonni ai, seng hiraon be ai bani; manggoluh do ia halani hapintoron na hinorjahonni ai. [176]

²³ Ai marosuh do uhur-Hu nani mangidah hamatean ni parjahat?” nini Tuhan Jahowa, “ai lang marosuh do uhur-Hu bani parmulak ni parjahat in humbani dalanni ase manggoluh ia?” [177]

²⁴Tapi, anggo manlembang parpintor in humbani hapintoronni, idalankon hajahaton anjaha ihorjahon hasamboron, songon na hinorjahon ni parjahat ai, mintor manggoluh ma ia? Haganup hapintoronni na hinorjahonni ai seng hiraon be bani; halani panundalionni ai ampa dousani na hinorjahonni ai, halani ai do ia matei. [178]

²⁵Tapi hanima mangkatahon, ʻSeng sintong dalan ni Jahowa!ʼ Tangihon ma, ale ginompar ni Israel: Mintor lang ma sintong dalan-Ku? Ai lang dalannima do na so sintong? [179]

²⁶Anggo manlembang parpintor humbani hapintoronni anjaha ihorjahon hajahaton, maningon matei do ia halani ai, maningon matei do ia halani hajahaton na hinorjahonni ai.

²⁷Tapi, anggo itundalhon parjahat hajahaton na hinorjahonni ai, anjaha ihorjahon uhum ampa hapintoron, na pagoluhkon tonduyni do ia ijai.

²⁸Halani na dob mangahap ai ia, anjaha itundalhon hajahaton na hinorjahonni ai, maningon manggoluh do ia, lang matei.

²⁹Tapi ihatahon ginompar ni Israel do, ʻSeng sintong dalan ni Jahowa!ʼ Mintor ma lang sintong dalan-Ku, ale ginompar ni Israel? Ai lang dalannima do na so sintong?

³⁰Halani ai, ale ginompar ni Israel, uhumon-Ku do hanima ganup, romban hubani parlahounima,” nini Tuhan Jahowa. “Mulak ma, tundalhon ma haganup hajahatonnima, ase ulang hajahaton ai parohkon hamagouan bannima.

³¹Ambukkon hanima ma sagala hajahaton na hinorjahonnima ai dompak Ahu, anjaha parayak hanima ma uhur na baru pakon tonduy na baru. Mase rahanan matei hanima, ale ginompar ni Israel? [180]

³²Tongon, seng marosuh Ahu mangidah matei na matei in,” nini Tuhan Jahowa. “Halani ai paubah hanima ma uhurnima, ase manggoluh hanima.” [181]