Read Batak Simalungun HESEKIEL 19 Bible Online

HESEKIEL 19 - Batak Simalungun bible

HESEKIEL 19

¹Tapi anggo ho, bahen ma sada doding tangis-tangis pasal panrajai i Israel,

²anjaha hatahon ma, “Songon singa boru-boru do inangmu i tongah-tongah ni singa! Manggompang do ia i tongah-tongah ni anak ni singa, laho pabanggal-banggalhon anakni.

³Ipagodang-godang do sada humbani anakni ai, gabe singa ajar-ajar do ai; iguruhon do naha manoroh, ibondut do jolma.

⁴Isuruh bangsa parbegu ma na manlawansi; hona tangkap ma ia ibagas godung ni sidea, iboan sidea do ia, ihalihiri hu tanoh Masir. [182]

⁵Dob ididah inangni hiranan ia anjaha seng saud pangarapanni ai, ibuat ma sada humbani anakni na legan, anjaha iajar ma ai gabe singa ajar-ajar.

⁶Mardalani do ia i tongah-tongah ni singa, gabe singa ajar-ajar do ia; iguruhon do naha manoroh, ibondut do jolma. [183]

⁷Iparseda do bentengni anjaha iparreong huta-hutani; tarsonggot do nagori ampa pangisini halani sora ni paraumni.

⁸Roh ma marurup bangsa-bangsa mandorabsi inggot; ipaherbang sidea do puhotni i babouni; hona tangkap do ia ibagas godung ni sidea.

⁹Ihalihiri do ia, ipamasuk hubagas harang, anjaha iboan hubani raja ni Babel; dob ai ipamasuk ma ia hubagas tutupan, ase ulang tarbogei be sorani i atas ni dolog ni Israel. [184]

¹⁰Songon hayu anggur do inangmu ibagas pohon anggur, na sinuan i topi ni bah mardalan; ramos buahni anjaha marrantingi halani buei ni bah. [185]

¹¹Tarpakei do dangkahni bahen tungkot harajaon halani jengesni, manjurjur do ai hu atas i tongah-tongah ni rantingni; taridah do ai humbani na daoh halani gijangni ampa tabunni.

¹²Tapi hona orbat ma hayu anggur ai ibagas ringis, anjaha igijigkon hu tanoh; melus ma ai ibahen logou hapoltakan, buahni mangkatangtang; ipansuakkon ma dangkahni na dear ai, gabe sipanganon ni apuy. [186]

¹³Anjaha sonari tarsuan do ai i halimisan bani tanoh dorging-dorging, na so marbah.

¹⁴Luar do apuy humbani dangkahni, bois ipangan ranting ampa buahni, gabe seng dong be tading ijai dangkah na jenges, seng dong be tungkot harajaon laho manrajai.” In ma doding tangis-tangis ai, anjaha saud do ai gabe doding tangis-tangis.