Read Batak Simalungun HESEKIEL 2 Bible Online

HESEKIEL 2 - Batak Simalungun bible

HESEKIEL 2

¹Jadi nini ma hu bangku, “Ale anak ni jolma, jongjong ma ho bani naheimu, ase marsahap Ahu bam!”

²Sanggah na marsahap ai Ia bangku, masuk ma Tonduy ai hu bangku, lanjar ipajongjong ma ahu bani naheihu, jadi hutangihon ma Ia na marsahap ai bangku. [14]

³Anjaha ihatahon ma hu bangku, “Ale anak ni jolma, Husuruh do ho bani halak Israel, bani bangsa sipanlawan, na manlawan dompak Ahu; sidea ampa ompungni sidea sai marbalik do hun Bangku ronsi sadari on.

⁴Hubani anak parbohi na mapir ampa paruhur na hengkeng do ho Husuruh, anjaha hatahon ma hubani sidea, “Sonon do hata ni Tuhan Jahowa.

⁵Atap ra sidea manangihon, atap manjua sidea manangihon (ai bangsa sipanlawan do sidea), tapi botohon ni sidea ma na adong do nabi i tongah-tongah ni sidea. [15]

⁶Tapi anggo ho, ale anak ni jolma, ulang ho mabiar bani sidea, ulang gobir ho mambogei hata ni sidea, age pe liot bam duri pakon tatada anjaha marianan ho i tongah-tongah ni gansip golang; ulang gobir ho mambogei hata ni sidea, anjaha ulang ho mabiar mangidah sidea, ai bangsa sipanlawan do sidea. [16]

⁷Hatahon ma hatang-Ku bani sidea, atap ra sidea manangihon atap lang, ai bangsa sipanlawan do sidea.

⁸Tapi anggo ho, ale anak ni jolma, tangihon ma na Huhatahon bam, ulang ma ho manlawan songon bangsa sipanlawan in. Buha ma pamanganmu, anjaha pangan ma aha na Hubere bam.”

⁹Anjaha sanggah mangkawah ahu, tonggor ma, sada tangan durdur bangku, anjaha ibagas adong sada surat gulungan. [17]

¹⁰Jadi ipaherbang ma ai i lobeihu, anjaha marsurat do ai angkup lopah; tarsurat do ijai hata tangis-tangis, hoih-hoih ampa bursik-bursik.