Read Batak Simalungun HESEKIEL 22 Bible Online

HESEKIEL 22 - Batak Simalungun bible

HESEKIEL 22

¹Dob ai roh ma hata ni Jahowa hu bangku, mangkatahon,

²“Ale anak ni jolma, sihol uhumonmu do huta siduruskon daroh in? Pabotohkon ma bani sidea haganup hasamboron ni sidea ai, [229]

³anjaha hatahon ma: Sonon do hata ni Tuhan Jahowa: Ale huta siduruskon daroh i tongah-tongahni, na parohkon ajal bani, anjaha na paulihon gana-gana bani, mambahen butak dirini!

⁴Marhitei daroh na niduruskonmai, gabe marutang do ho, anjaha marhitei gana-gana na pinaulimai, gabe butak ho; ipapodas ho do ajalmu, anjaha iparoh ho do ujung ni ari-arimu. Halani ai Hubahen do ho siapason bani bangsa-bangsa, anjaha sipahirion bani ganup nagori. [230]

⁵Halak na dohor age na daoh pahirihon do, ale parbarita na masambor, na gok hageoron.

⁶Tonggor ma, haganup kopala-kopala ni Israel, na marianan ibagas ho, ganup sidea mangunsagahkon kuasa laho manduruskon daroh.

⁷Bapa pakon inang hona apasan do ibagas ho, halak panginsolat hona hilang i tongah-tongahmu; na tading maetek ampa na mabalu hona odoh-odoh do. [231]

⁸Mahiri do ibahen ho ianan-Ku na mapansing in, anjaha ibutaki ho do ari Sabat-Ku.

⁹Dong do halak sipanukas-nukas ibagas ho laho manduruskon daroh, anjaha adong do halak na mangankon na ginalangkon i atas buntu-buntu; habutakon do ihorjahon halak i tongah-tongahmu. [232]

¹⁰Ipatidak sidea do hatalanjangon ni bapa ibagas ho, anjaha ibutaki do naboru bani panorang parroh ni pantang ni hiouni. [233]

¹¹Habutakon do idalankon halak bani jolma ni hasomanni; dong do na mambutaki parumaenni, dong homa na mambutaki botouni, boru ni bapani. [234]

¹²Padalan sisip do halak ibagas ho laho manduruskon daroh; paanakkon duit do ho anjaha mambuat untung na malobihtu; mambuat pansarian do ho humbani hasomanmu marhitei pangilangan; ihalupahon ho do Ahu, nini Tuhan Jahowa. [235]

¹³Tonggor ma, durdurhonon-Ku do tangan-Ku bani untungmu na so tiba dalanni in, ampa halani daroh na madurus i tongah-tongahmu. [236]

¹⁴Ai tahan do ho anjaha margogoh do tanganmu bani ari siparohon-Ku bam? Ahu do Jahowa na manluarhon ai anjaha na pasaudkon ai. [237]

¹⁵Erapon-Ku do ho i tongah-tongah ni bangsa-bangsa anjaha bahenon-Ku do ho mambur merap bani nagori-nagori; bois do bahenon-Ku habutakon na bam ai, [238]

¹⁶anjaha sipapaan do ho i lobei ni bangsa parbegu, ase itandai ho, Ahu do Jahowa.

¹⁷Dob ai roh ma hata ni Jahowa hu bangku, mangkatahon,

¹⁸Ale anak ni jolma, gabe tasik-tasik do bangsa Israel bangku; haganup do sidea songon tombaga, timah, bosi ampa timah sibirong ibagas panlalaan; tongon, mubah do sidea gabe tasik-tasik. [239]

¹⁹Halani ai sonon do hata ni Jahowa: Halani ganup hanima mubah gabe tasik-tasik, tonggor ma, patumpuon-Ku do hanima hu tongah-tongah ni Jerusalem.

²⁰Songon halak na patumpu pirak, tombaga, bosi, timah ampa timah sibirong hubagas panlalaan, anjaha ipagara apuy i toruhni laho manlala, sonai do patumpuon-Ku hanima ibagas ringis-Ku ampa gara ni gilang-Ku, anjaha hunahkon do hanima hubagas, laho manlala hanima.

²¹Tongon, patumpuon-Ku do hanima anjaha pagaraon-Ku do apuy ni ringis-Ku bannima, anjaha malala ma hanima i tongah-tongahni.

²²Songon pirak malala ibagas panlalaan, sonai do malala hanima ibagas ai, jadi botohonnima ma, Ahu do Jahowa, na manduruskon ringis-Ku bannima.

²³Dob ai roh ma hata ni Jahowa hu bangku, mangkatahon,

²⁴Ale anak ni jolma, hatahon ma bani sidea: Ho do sada tanoh na so marudan, na so marbah bani panorang ringis;

²⁵songon singa na maraum, manoroh sisorohonni do raja-rajani i tongah-tongahni; ibolur sidea do jolma, irampas sidea arta ampa ugas-ugas na maharga, ipabuei sidea do bilangan ni na mabalu i tanoh in. [240]

²⁶Iparseda malimni do titah-Ku, anjaha ipabutak do ianan-Ku na mapansing in; seng marbolat ibahen sidea na mapansing humbani na mabutak, seng iajarhon parleganan ni na susi pakon na so susi; seng parduli sidea bani ari Sabat-Ku, gabe mabutak do Ahu i tongah-tongah ni sidea. [241]

²⁷Kopala-kopala i tongah-tongah ni sidea, songon sorigala na manoroh do, laho manduruskon daroh, mangagou goluh ni jolma, laho mambuat pansarian. [242]

²⁸Anjaha nabi ni sidea mangkapuri hajahaton ni sidea marhitei panonggoran na lepak ampa panjahaion ladung, mangkatahon bani sidea: Sonon do hata ni Tuhan Jahowa! hape sedo Jahowa tongon na mangkatahon. [243]

²⁹Bangsa parnagori in mandalankon odoh-odoh anjaha manrampasi, iodoh-odoh sidea do halak na madoyuk ampa na miskin, anjaha ipaksa do halak panginsolat marlawanan bani uhum. [244]

³⁰Hupindahi do halak i tongah-tongah ni sidea, na boi pajongjong tembok atap jongjong bani na maruntas i lobeihu, laho mangkopkop tanoh in, ase ulang huparseda, tapi seng dong jumpah Ahu. [245]tx

³¹Halani ai Huuseihon do ringis-Ku bani sidea, anjaha Huboiskon do sidea ibagas gara ni gilang-Ku, mangonai hubani ulu ni sidea do Hubahen parlahou ni sidea ai, nini Tuhan Jahowa.” [246]