Read Batak Simalungun HESEKIEL 25 Bible Online

HESEKIEL 25 - Batak Simalungun bible

HESEKIEL 25

¹Jadi roh ma hata ni Jahowa hu bangku, mangkatahon,

²“Ale anak ni jolma, tujuhon ma bohimu dompak halak Amon, anjaha manjahai ma ho pasal sidea. [271]

³Hatahon ma bani halak Amon: Tangihon ma hata ni Tuhan Jahowa: Sonon do hata ni Tuhan Jahowa: Halani ihatahon hanima: Ha! ha! ha! bani rumah-Ku na mapansing ai, sanggah ibutaki ai, bani tanoh Israel, halani tarulang ai, ampa bani ginompar ni Juda, halani tarbuang sidea. [272]

⁴Halani ai, tonggor ma, ondoskonon-Ku do ho bani halak na i hapoltakan bahen parbagianan ni sidea, pasukon ni sidea do lampolamponi i tongah-tongahmu, anjaha paulionni do ianan ni sidea ibagas ho; panganon ni sidea do gogoh ni tanohmu, anjaha inumon ni sidea do dadih ni pinahanmu.

⁵Bahenon-Ku do huta Rabba gabe sampalan ni unta, anjaha tanoh ni halak Amon gabe parsaranan ni biribiri, ase itanda hanima, Ahu do Jahowa.

⁶Tongon, sonon do hata ni Tuhan Jahowa, Halani martopap-topap ho, anjaha marinjak-injak, anjaha marmegah-megah ho mangidah hasedaon ni tanoh Israel. [273]

⁷Halani ai, tonggor ma, Hupagostong do tangan-Ku manlawan ho, anjaha Huondoskon do ho gabe taban-taban ni bangsa-bangsa, anjaha raseihonon-Ku hun tongah-tongah ni nagori-nagori; Huboiskon do ho, ase itanda ho, Ahu do Jahowa.”

⁸Sonon do hata ni Tuhan Jahowa, “Halani ihatahon Moab ampa Seir: Tonggor ma, doskon haganup bangsa parbegu do halak Juda, (Jes. 15; Jer. 48)

⁹halani ai, tonggor ma, sae-sae do bahenon-Ku raboyon ni Moab, gabe seng dong be huta ijai, i sab nagori ai, ai ma habanggalon bani nagori ai: Bet-Jesimot, Baal-Meon pakon Kiriataim.

¹⁰Berehonon-Ku do ai rap pakon tanoh ni halak Amon, bani halak na i hapoltakan, bahen parbagianan bani sidea, ase ulang be taringat halak pasal sidea i tongah-tongah ni bangsa-bangsa.

¹¹Dabuhon-Ku do uhum bani Moab, ase itanda sidea. Ahu do Jahowa.”

¹²Sonon do hata ni Tuhan Jahowa, “Halani maruhur pambalason Edom bani ginompar ni Juda, gabe marsalah banggal sidea halani pambalason ni sidea ai,” [274]

¹³halani ai sonon do hata ni Tuhan Jahowa, “Hupagostong do tangan-Ku manlawan Edom, ripaskonon-Ku do hunjai jolma age pinahan, anjaha gabe halimisan do ai bahenon-Ku hun Teman das hu Dedan; maningon rasei do sidea bahenon ni podang.

¹⁴Dalankonon-Ku do pambalason dompak Edom marhitei bangsang-Ku halak Israel; bahenon ni sidea do dompak Edom romban hu bani ringis-Ku ampa gilang-Ku; jadi ahapkonon ni sidea ma sonaha pambalas-Ku,” nini Tuhan Jahowa. [275]

¹⁵Sonon do hata ni Tuhan Jahowa, “Halani maruhur pambalason halak Palistim, anjaha marmegah-megah, marhajahaton sidea mambalas, laho mangagou marhalanihon ni parmunsuhon na dob madokah, [276]

¹⁶halani ai sonon do hata ni Tuhan Jahowa: Hupagostong do tangan-Ku manlawan halak Palistim, anjaha ripaskonon-Ku do halak Kereti, anjaha boiskononku do halak na tading i topi ni laut ai. [277]

¹⁷Dalankonon-Ku do pambalason banggal bani sidea marhitei paminsangon na gok ringis, ase ibotoh sidea, Ahu do Jahowa, anggo Hupadalan ma pambalason bani sidea.”