Read Batak Simalungun HESEKIEL 26 Bible Online

HESEKIEL 26 - Batak Simalungun bible

HESEKIEL 26

¹Pasapuluhsada-tahunkon bani ari sada bulan sada, roh ma hata ni Jahowa hu bangku, mangkatahon,

²“Ale anak ni jolma halani ihatahon Tirus pasal Jerusalem: Ha! ha! ha! ...! domma maropuk horbangan ni bangsa-bangsa, marurup hu bangku ma nuan, gok ma ahu, halani na maseda ai ia! [278]

³Halani ai, sonon do hata ni Tuhan Jahowa: Imbang-Ku ma ho, ale Tirus, arahon-Ku ma buei bangsa mamboan ho, songon laut na parohkon gilumbangni. (Jes. 33)

⁴Parsedaon ni sidea ma tembok ni Tirus, anjaha rumbakkononni ma manarani; padaohon-Ku do ronsi tanohni, gabe tading batuni tumang mando Hubahen.

⁵Gabe panjomuran ni jala mando ai i tongah-tongah ni laut, ai Ahu do na mansahapkon ai, nini Tuhan Jahowa; gabe taban ni bangsa-bangsa ma ia,

⁶anjaha dusunni na i daratan rasei do bahenon ni podang, ase itanda sidea, Ahu do Jahowa.

⁷Ai sonon do hata ni Tuhan Jahowa: Tonggor ma, parohon-Ku do dompak Tirus si Nebukadnesar, raja ni Babel, raja ni sagala raja, hun utara, marhasoman buei huda pakon buei gareta porang pakon jolma siajak huda ampa bala buei tumang. [279]

⁸Raseihononni ma marhitei podang dusunmu na i daratan; paulionni ma hubuan manlawan ho; pajongjongonni homa tembok pangkubu, anjaha padearonni tayub paronding-ondingan dompak ho. [280]

⁹Tujuhononni do bam parugas sironsang tembokmu, anjaha reongkononni marhitei parugas bosini.

¹⁰Halani buei ni hudani gabe rungkubon ni orbukni ma ho, dugur ma tembokmu binahen ni lutu ni siajak huda, gareta ampa gareta porang, sanggah imasuki horbanganmu, songon halak na masuk hubagas huta na dob runtas tembokni.

¹¹Marhitei tambirik ni hudani luntakonni do ganup alamanmu; raseihononni do bangsamu bani podang, anjaha sagala tiang habanggalonmu rumbakkononni do hu tanoh.

¹²Rampason ni sidea do arta-artamu, anjaha buatonni boniagamu; parreongon ni sidea do tembokmu, anjaha parsedaonni rumahmu na dear-dear in; sampakkononni do hu laut batu-batumu, parhayumu ampa reong-reongmu.

¹³Parontihonon-Ku do hariahon ni dodingmu, anjaha sora ni arbapmu pe seng tarbogei be. [281]

¹⁴Bahenon-Ku do ho tading batu tumang, gabe panjomuran ni jala tumang, seng be paulion, ai Ahu, Jahowa do na mansahapkon ai, nini Tuhan Jahowa.

¹⁵Sonon do hata ni Tuhan Jahowa pasal Tirus: Ai lang gobir ma nagori partopi laut mambogei pardabuhmu ampa orong-orong ni halak na ugahan ampa pamunuhon marhitei podang i tongah-tongahmu?

¹⁶Jadi susur ma humbani paratasni ganup raja-raja partopi laut, ipangambungkon baju harajaonni anjaha itanggali pakeianni na marrupa-rupa ai. Marbaju pusok ni uhur do sidea hundul bani tanoh, hitir-hitir tongtong anjaha tarsonggot halani ho.

¹⁷Bahenon ni sidea ma sada tangis-tangis pasal ho, anjaha hatahononni ma pasal ho: Aih, naha do parmagoumu hun tongah laut, ale huta na tarbarita, na markuasa i lautan, ho ampa pangisimu, na mambahen gobir sagala na marianan ijai. [282]

¹⁸Gobir do sonari sagala pulou bani ari pardabuhmu, tongon, tarsonggot do sagala nagori partopi laut halani parmagoumu.

¹⁹Ai sonon do hata ni Tuhan Jahowa: Bahenon-Ku do ho gabe huta na tarulang, songon huta na so adong mangiankon, anjaha parohon-Ku do laut ai dompak ho, gabe rungkubon ni gilumbang banggal ma ho.

²⁰Sampakkonon-Ku do ho hu toruh, hubani halak na dob tuad hu lubang ai, ai ma halak humbani sisapari; bahenon-Ku do ho marianan bani nagori partoruh ai, i tongah-tongah ni reong-reong na dob madokah ai, rap pakon halak na dob tuad hu lubang ai, ase ulang dong be na mangiankon ho, anjaha seng dong be iananmu bani tanoh ni halak na manggoluh.

²¹Sompong do parohon-Ku ajalmu, seng anjai dong be ho, age pe hona pindahan ho, seng anjai jumpah be ho, nini Tuhan Jahowa.”