Read Batak Simalungun HESEKIEL 27 Bible Online

HESEKIEL 27 - Batak Simalungun bible

HESEKIEL 27

¹Dob ai roh ma hata ni Jahowa hu bangku, mangkatahon,

²“Ale anak ni jolma, bahen ma sada doding tangis-tangis pasal Tirus, (Jes. 23)

³anjaha hatahon ma bani Tirus, na marianan bani dalan masuk hu laut, partiga-tiga ni bangsa-bangsa bani buei nagori-nagori i topi laut: Sonon do hata ni Tuhan Jahowa: Ale Tirus, ihatahon ho do, kapal na gokan jenges do Ahu. [283]

⁴Tongah-tongah ni laut do gomgomanmu, jenges tumang do ho ipauli situhangi ho.

⁵Humbani hayu maranti Senir do ipauli sidea dasormu, hayu ares do ibuat hun Libanon, bahen tiang ni layarmu.

⁶Humbani hayu jati Basan do ibahen holemu, anjaha tayubmu humbani hayu ares na hun pulou Kittim do ibahen sidea, ilapis bani gading. [284]

⁷Humbani hiou linen Masir na marrupa-rupa do layarmu, gabe partanda pasal ho; hiou simahonda ampa sigerger, na hun topi ni laut Elisa do tendamu. [285]

⁸Halak Sidon pakon Arwad do sipanlugai bam; halak na pandei hun Zamar do ibagas ho, sidea do gabe jurumudimu.

⁹Partua-partua na hun Gebal ampa na pentar-pentarni do ibagas ho, padear-dearhon na maseda bam. Haganup kapal na i laut ampa parhorja kapal roh do hu bam, laho mantiga-tigahon boniagamu. [286]

¹⁰Halak Persia, Tud ampa Put do gabe balamu; ipanggantungkon sidea do gantar ampa tangkulukni ibagas ho; sidea do gabe hagijangon bam.

¹¹Halak Arwad do balamu iatas tembokmu inggot, anjaha halak Gamad bani manaramu, ipansangkotkon sidea do gantarni bani tembokmu inggot, sidea do na mambahen gok hajengesonmu.

¹²Tarsis do hasomanmu martiga-tiga halani hinabuei ni barang-barangmu; pirak, bosi, timah ampa timah sibirong do ibahen sidea tukar ni barang-barangmu.

¹³Halak Javan, Tubal pakon Mesek martiga-tiga do pakon ho, jolma ampa parugas tombaga do itukarhon sidea bani barang-barangmu. [287]

¹⁴Halak Togarma manukarhon huda, huda porang ampa halode bani tiga-tigamu.

¹⁵Halak Rodus martiga-tiga pakon ho, buei nagori partopi laut mandalankon partiga-tigaon pakon ho, gading ampa hayu birong do ibahen sidea galarni bam.

¹⁶Martiga-tiga do halak Edom pakon ho halani hinabuei ni barangmu; itukarhon sidea do bam mata intan samarag, hiou hasumba, hiou na marrupa-rupa, hiou linnen, simatah ampa mata intan jaspis.

¹⁷Juda ampa tanoh Israel martiga-tiga do pakon ho; gandum na hun Minit, buah ara, manisan, minak ampa minak balsem do itukarhon sidea bam.

¹⁸Martiga-tiga do Damaskus pakon ho halani hinabuei ni boniagamu na marbagei-bagei in, anggur hun Helbun ampa wol hun Zahar itukarhon sidea hu bam.

¹⁹Hun Usal roh do barang-barang bosi, rompah-rompah ampa kulit manis gantih ni boniagamu.

²⁰Halak Dedan marboniaga palana pakon ho, sihundulan sanggah marhuda.

²¹Halak Arab pakon sagala kopala-kopala hun Kedar, ai ma partiga-tiga harosuh ni uhurmu pasal biribiri, biribiri tunggal ampa hambing tunggal; ai do tiga-tiga ni sidea pakon ho. [288]

²²Saudagar na hun Seba pakon Raama martiga-tiga do pakon ho; itukarhon do hubani barangmu marbagei-bagei rompah-rompah sijengesan, marbagei-bagei mata intan na maharga ampa omas.

²³Haran, Kanneh, Eden, Assur ampa Madai martiga-tiga do pakon ho.

²⁴Itiga-tigahon sidea do hubam hiou pilihan, hiou simahonda, hiou na marrupa-rupa, parmadani na marrupa-rupa ampa tali banggal na pinuyuh.

²⁵Kapal-kapal Tarsis do marlayar bam, mamboan tiga-tigamu. Sonai ma gabe gok ho, anjaha marmuatan na borat i tongah laut.

²⁶Halak sipanlugaimu do mamboan ho hu laut bolag, tapi logou na hun hapoltakan do mangkaromkon ho hubagas laut.

²⁷Habayakonmu, barang-barangmu, boniagamu, anak kapalmu, jurumudimu, tukang-tukangmu, partiga-tigamu ampa haganup balamu na ibagas ho ampa haganup halak na i tongah-tongahmu, harom do hubagas laut bani panorang pardabuhmu.

²⁸Mambogei pandoruh ni jurumudimu, hitir-hitir do partopi laut;

²⁹lintun bei ma hun kapalni haganup sijolom hole, anjaha anak kapal ampa haganup jurumudi na i laut turun ma hu darat;

³⁰itangisi sidea do ho, anjaha doruh-doruh do sidea gogoh; inahkon sidea do orbuk bani uluni, margulu do sidea bani abuan. [289]

³¹Ipalpal sidea do uluni halani ho, anjaha marhiou guni do sidea; itangisi sidea do ho humbani uhur na marhoru, gok pusok ni uhur,

³²Halani horu ni ai ibahen sidea do tangis-tangis pasal ho, idoruhi sidea do ho: Ai ise ma ongga iparseda doskon Tirus ibagas laut?

³³Sanggah na roh boniagamu hun laut, bosur do buei bangsa-bangsa ibahen ho; marhitei hinabuei ni artamu ampa boniagamu, bayak do raja-raja ni tanoh on ibahen ho.

³⁴Tapi sonari maropuk do ho, harom hubagas laut; boniagamu ampa haganup panumpangmu harom do rap pakon ho.

³⁵Haganup halak partopi laut tarsonggot do pasal ho; raja-rajani mabiar tumang, marposi do bohi ni sidea.

³⁶Manihul-nihul do partiga-tiga ni bangsa-bangsa halani ho; jangin do parroh ni ajalmu, seng anjai dong be ho lalab.” [290]