Read Batak Simalungun HESEKIEL 29 Bible Online

HESEKIEL 29 - Batak Simalungun bible

HESEKIEL 29

¹Pasapuluh-tahunkon ari sapuluh dua, bulan sapuluh, roh ma hata ni Jahowa hu bangku, mangkatahon,

²“Ale anak ni jolma, dompakkon ma bohimu dompak Parao, raja ni Masir, manjahai ma ho pasalsi ampa pasal ganup tanoh Masir, (Jes. 19; Jer. 46)

³hatahon ma: Sonon do hata ni Tuhan Jahowa: Imbang-Ku do ho, ale Parao, raja ni Masir, naga bolon ai, na gompang i tongah-tongah ni bah banggal ai, na mangkatahon, Ahu do simada Bah Nil, Ahu do sijadihon in! [303]

⁴Nahkonon-Ku do hait-hait hubagas osang-osangmu, anjaha bahenon-Ku do dengke na ibagas bahmin longkot bani sisikmu; jadi sintakon-Ku ma ho hu darat hun tongah-tongah ni bahmin rap pakon haganup dengke na ibagas bahmin, na longkot bani sisikmu. [304]

⁵Gijigkonon-Ku do ho hu halimisan, ho ampa haganup dengke na ibagas bahmin; timpal ma ho bani tanoh in, seng dong na mambuat atap na mananom. Bani binatang na i tanoh in ampa bani manuk-manuk na i awang-awang ai do Huberehon ho gabe sipanganon bani;

⁶jadi botohon ni haganup pangisi ni Masir ma, Ahu do Jahowa. Halani tungkot tolong do ho bani ginompar ni Israel -- [305]

⁷(anggo ipartungkot sidea ho, maponggol ho, hona tusuk do tangan ni sidea; anggo ipangunsandei sidea ho, maponggol do ho, gabe rebad-rebad do binongei ni sidea),

⁸halani ai sonon do hata ni Tuhan Jahowa: Tonggor ma, parohon-Ku do podang mangimbang ho, anjaha raseihonon-Ku do jolma pakon pinahan hun tongah-tongahmu.

⁹Gabe halimisan anjaha tarulang do tanoh Masir; jadi tandaon ni sidea ma, Ahu do Jahowa. Halani ihatahon ho: Ahu do simada Nil, anjaha ahu do sijadihon ai!

¹⁰Halani ai, tonggor ma, imbang-Ku do ho, imbang-Ku do age bah banggalmu, anjaha bahenon-Ku do tanoh Masir gabe halimisan botul anjaha tarulang hun Migdol das hu Siene, das hu parbalogan Etiopia. [306]

¹¹Seng dong be nahei ni jolma na montas hunjai, nahei ni pinahan pe seng dong na montas hunjai, seng be ianonkon ai ompat puluh tahun dokahni.

¹²Anjaha bahenon-Ku do tanoh Masir gabe halimisan i tongah-tongah ni nagori, na dob gabe halimisan, anjaha huta ni sidea pe parsedaon do i tongah-tongah ni huta na dob pinarseda, ompat puluh tahun dokahni. Anjaha erapon-Ku do halak Masir i tongah-tongah ni bangsa-bangsa, anjaha mambur do sidea bahenon-Ku i tongah-tongah ni nagori-nagori.

¹³Ai sonon do hata ni Tuhan Jahowa: Dob salpu siompat puluh tahun ai, patumpuon-Ku ma halak Masir humbani bangsa-bangsa hamerapan ni sidea ai.

¹⁴Jadi pasuangon-Ku ma Masir, anjaha boanon-Ku do sidea mulak hu tanoh Patros, tanoh hasusuran ni sidea ai; gabe harajaon na etek ma sidea ijai.

¹⁵Gabe sietekan do ai marimbang harajaon na legan, anjaha lang be pagijangonni dirini mangatasi bangsa-bangsa; paotikon-Ku do sidea, ase ulang be irajai bangsa na legan.

¹⁶Anjaha seng marpangajaman bani be ginompar ni Israel; ai taringat ma sidea bani hasalahan ni sidea, anggo iparapat sidea dirini bani Masir. Jadi tandaon ni sidea ma, Ahu do Tuhan Jahowa. [307]

¹⁷Paduapuluhpitu-tahunkon, ari sada bulan sada, roh ma hata ni Jahowa hu bangku, mangkatahon,

¹⁸“Ale anak ni jolma, isuruh si Nebukadnesar, raja ni Babel do balani marhorja koras manlawan Tirus; mapalpal do ganup ulu anjaha masapsap sagala abara, tapi age ia, age balani aha pe lang jumpahsi hun Tirus, bahen upah ni halojaonni manlawan huta ai;

¹⁹Halani ai sonon do hata ni Tuhan Jahowa: Tonggor ma, ondoskonon-Ku do tanoh Masir hu tangan ni si Nebukadnesar, raja ni Babel; buatonni do arta-artani, rampason anjaha samunonni do ai, ai ma gabe upah bani balani.

²⁰Tanoh Masir do Hubere bani, gabe upah ni halojaonni, ai marguna Bangku do na hinorjahon ni sidea ai. [308]

²¹Bani panorang ai patubuhon ma sada tanduk bani ginompar ni Israel, anjaha ungkabon-Ku do pamanganmu i tongah-tongah ni sidea, ase ibotoh sidea, Ahu do Jahowa.”