Read Batak Simalungun HESEKIEL 3 Bible Online

HESEKIEL 3 - Batak Simalungun bible

HESEKIEL 3

¹Dob ai ihatahon ma hu bangku, “Ale anak ni jolma, pangan ma na dapot ho in; pangan ma surat gulungan in, anjaha laho ma ho, marsahap ma ho bani halak Israel.” [18]

²Jadi hupatanggak ma babahku, gabe ibere ma hu bangku surat gulungan ai ase hupangan.

³Ihatahon ma hu bangku, “Ale anak ni jolma, bondut ma gulungan on na Hubere bam, anjaha bosuri ma boltokmu bani in.” Jadi hupangan ma ai, matobu do ai ibagas pamanganku songon manisan. [19]

⁴Dob ai nini ma hu bangku, “Ale anak ni jolma, laho ma ho marayak halak Israel, anjaha hatahon ma bani sidea hatang-Kin.

⁵Ai sedo hubani bangsa parhata na legan atap parhata na so niarusan ho Husuruh, tapi hubani bangsa Israel do,

⁶sedo hubani buei bangsa-bangsa, parhata na legan, parsahap na so niarusan. Tongon, anggo bani sisonai ho Husuruh, ra do sidea manangihon ho.

⁷Tapi anggo halak Israel seng itangihon sidea ho, seng ra sidea manangihon Ahu; ai parbohi na mapir anjaha paruhur na hengkeng do halak Israel ganup.

⁸Tonggor ma, Hupamapir do bohimu songon bohi ni sidea anjaha Hupatenger do pardompakanmu songon pardompakan ni sidea. [20]

⁹Songon batu intan, tengeran humbani batu loting, sonai do Hupatenger pardompakanmu; ulang ma ho mabiar anjaha ulang ho gobir mangidah sidea, ai bangsa sipanlawan do sidea.” [21]

¹⁰Ambah ni ai nini ma dompak ahu, “Ale anak ni jolma, ganup hatang-Ku, na Huhatahon bam, parimbagaskon ma ai anjaha tangihon.

¹¹Ase laho ma, parayak ma na tarbuang in, hasoman sabangsamin, anjaha hatahon ma bani sidea, patugah ma bani sidea: Sonon do hata ni Tuhan Jahowa, atap na ra pe sidea manangihon in atap lang.” [22]

¹²Jadi iangkat Tonduy ai ma ahu, anjaha hubogei ma i pudingku sora ni lalou na bolon, ai ma sanggah na tarangkat ai hamuliaon ni Jahowa humbani iananni, [23]

¹³ai ma sorani habongni sipargoluh ai sanggah na marsiogosan ampa sora ni galapang na i lambung ni sidea, na marsora songon lalou na bolon.

¹⁴Iangkat Tonduy ai ma ahu, iluahon ma, anjaha misir ma ahu ibagas uhur na mapaet marhasoman ringis; anjaha tangan ni Jahowa do odoh bangku,

¹⁵gabe das ma ahu bani halak na tarbuang ai i Tel-Abib, na i topi ni Bah Kebar. Ijai ma ahu hundul jonong i tongah-tongah ni sidea pitu ari dokahni.

¹⁶Dob salpu na pitu ari ai roh ma hata ni Jahowa hu bangku,

¹⁷ “Ale anak ni jolma, Hupabangkit do ho gabe siparjaga bani bangsa Israel. Anggo itangar ho sada hata humbani pamangan-Ku, lumbahon ma ai bani sidea ibagas goran-Ku. [24]

¹⁸ Anggo Huhatahon bani halak parjahat, ʻManingon matei do ho!ʼ hape seng ipalumba ho ia, anjaha seng marsahap ho palumbahon halak parjahat ai bani parlahouni na masambor ai, andohar manggoluh ia, sai na matei do namin parjahat ai halani hajahatonni, tapi humbam do tungguon-Ku darohni. [25]

¹⁹ Tapi anggo ipalumba ho do parjahat ai, hape seng ra ia manadingkon hajahatonni atap parlahouni na masambor ai, sai na matei do ia halani hajahatonni, tapi maluah do anggo tonduymu. [26]

²⁰Anjaha anggo itadingkon halak parpintor hapintoronni anjaha ihorjahon hagedukon, gabe hunahkon batu partolsuan i lobeini, jadi matei ia, halani na so ipalumba ho ai ia, matei do ia halani dousani, anjaha seng be ingaton hapintoron na dob hinorjahonni; tapi darohni humbam do tungguon-Ku. [27]

²¹Tapi anggo ipalumba ho parpintor in ase ulang mardousa, anjaha seng tongon mardousa ia, manggoluh ma ia tongon, halani na ra ia palumbaon; ho pe, ipaluah ho do tonduymu.”

²²Dob ai roh ma ijai tangan ni Jahowa hu bangku, anjaha nini dompak ahu, “Jongjong ma, laho ma ho hu pamah ai, ijai pe Ahu marsahap pakon ho.” [28]

²³Jadi jongjong ma ahu anjaha laho ma ahu hu pamah ai; anjaha tonggor ma, jongjong do ijai hamuliaon ni Jahowa usih songon hamuliaon na huidah i topi ni Bah Kebar; jadi manrogop ma ahu. [29]

²⁴Jadi masuk ma Tonduy ai hu bangku, anjaha ipajongjong ma ahu bani naheihu: Marsahap ma Ia hu bangku, nini ma, “Laho ma, marhurung ma ho ibagas rumahmu! [30]

²⁵Anggo ho, ale anak ni jolma, tonggor ma, nahkonon-Ku ma bam tali, anjaha sangkuton ma ho marhitei ai, ase ulang ho boi mandarat masuk hu tongah-tongah ni sidea,

²⁶anjaha longkot ma bahenon-Ku dilahmu bani langit-langit ni pamanganmu, ase longah ho, gabe seng boi be pinsangonmu sidea, ai bangsa sipanlawan do sidea. [31]

²⁷Tapi anggo marsahap Ahu use hu bam, buhaon-Ku ma pamanganmu anjaha hatahononmu ma hubani sidea: Sonon do hata ni Tuhan Jahowa, atap ise na ra manangihon, itangihon ma, atap ise na manjua manangihon, manjua ma, ai bangsa sipanlawan do sidea.” [32]