Read Batak Simalungun HESEKIEL 32 Bible Online

HESEKIEL 32 - Batak Simalungun bible

HESEKIEL 32

¹Pasapuluhsada-tahunkon, bani ari sada bulan sapuluh dua, roh ma hata ni Jahowa hu bangku, mangkatahon,

²“Ale anak ni jolma, bahen ma sada doding tangis-tangis pasal Parao, raja ni Masir, hatahon ma hu bani: Ale singa ajar-ajar i tongah-tongah ni bangsa-bangsa, ho na dob pinarseda! Songon naga do ho ibagas laut, unsong-unsong ibagas bah banggalmu; gombur do ibahen ho bahmu marhitei naheimu, anjaha iluntaki ho do bah banggalmu. [328]

³Sonon do hata ni Tuhan Jahowa: Rungkubkonon-Ku do jalang-Ku hubam, ai ma hulanan ni buei bangsa; dokdokon-Ku do hu atas ibagas jalang-Ku. [329]

⁴Sampakkonon-Ku do ho hu darat, anjaha hu ladang-ladang in do ho gijigkonon-Ku; parohon-Ku do manuk-manuk na i awang-awang in sogop bam, anjaha bosuran binatang-binatang na i tanoh in halani ho. [330]

⁵Gijigkonon-Ku do dagingmu i atas ni dolog-dolog, anjaha gokan-Ku habungan-habungan marhitei bangkeimu.

⁶Pabosuron-Ku do tanoh age dolog-dolog marhitei darohmu na mabaor in, gok do binanga-binanga bahenonni ai.

⁷Sanggah parboismai, rungkubon-Ku do langit in, anjaha manggolapi hubahen bintang-bintang; rungkubon-Ku do mata ni ari bani hombun, anjaha bulan pe seng marsinalsal. [331]

⁸Haganup panondang na i langit manggolapi do bahenon-Ku i baboumu, anjaha parohon-Ku do hagolapan hu tanohmu, nini Tuhan Jahowa.

⁹Gobir do bahenon-Ku uhur ni buei bangsa, anggo Huboan ho tarbuang hu tongah-tongah ni bangsa-bangsa, hu nagori-nagori na so tinandamu.

¹⁰Songgotan do buei bangsa halani ho, anjaha gobir raja-raja ni sidea pasal ho, anggo Huawas-awaskon ma podang-Ku i lobei ni sidea; rusak do sidea torus, pasal hosahni bei, bani panorang pardabuhmu.

¹¹Ai sonon do hata ni Tuhan Jahowa: Podang ni raja Babel do na roh mandorab ho!

¹²Rasei do bahenon-Ku balamu marhitei podang ni puanglima, haganup sidea, ai ma sibisangan humbani bangsa-bangsa. Parsedaon ni sidea do hatimbulon ni Masir, anjaha magou do bahenonni rayatni. [332]

¹³Ripaskonon-Ku do ganup pinahanni na i topi ni bah banggal; seng be gomburon ni nahei ni jolma ai, anjaha tambirik ni pinahan pe seng be luntakonni ai.

¹⁴Lihou do bahenon-Ku binanga ni sidea, anjaha manjulur songon minak bah banggal ni sidea, nini Tuhan Jahowa,

¹⁵sanggah na Hubahen Masir gabe halimisan, Huparseda haganup isini, anjaha Huraseihon sagala na marianan ijai, ase itanda sidea, Ahu do Jahowa.

¹⁶Doding tangis-tangis do in, sidodingkononkon; tongon, dodingkonon ni boru ni bangsa-bangsa do in, dodingkononni do ai bani Masir ampa bani rayatni haganup.

¹⁷Dob ai pasapuluhdua-tahunkon, ari sapuluh lima bulan sapuluh dua, roh ma hata ni Jahowa hu bangku, mangkatahon,

¹⁸Ale anak ni jolma, tangisi ma Parao ampa rayatni, anjaha suruh ma sidea tuad, ia pakon boru ni bangsa-bangsa na sangap-sangap in, laho hu nagori toruh, marayak na dob tuad hu lubang ai. [333]

¹⁹Ise do na niatasanmu ibagas hajengeson? Tuad ma ho, ase ipatibal ho rap pakon halak na so marsunat. [334]

²⁰I tongah-tongah ni halak binunuh ni podang do ia tompas, anjaha i lambungni radag sagala rayatni. [335]

²¹Jadi hatahonon ni puanglima na gogoh-gogoh ai ma hun tongah ni nagori toruh ai pasalsi ampa na mangurupisi: Tuad do sidea, radag ijai, halak na so marsunat ai, hona bunuh ibahen podang. [336]

²²Ijai do Assur, ampa ganup rayatni inggot tanomanni; haganup sidea tarbunuh, tompas halani podang;

²³bani tang parbagas ni lubang ai do tanomanni, anjaha rayatni inggot bani tanomanni; haganup sidea tarbunuh, tompas halani podang, ai ma sibahen songgot-songgot hinan i tanoh ni halak na manggoluh. [337]

²⁴Ijai do Elam ampa haganup rayatni inggot tanomanni; haganup sidea tarbunuh, tompas binahen ni podang; tuad do sidea, seng marsunat hu nagori toruh; ipausung-usung sidea do habadoronni rap pakon halak na tuad hu lubang ai. [338]

²⁵Ibahen sidea do podomanni i tongah-tongah ni halak na tarbunuh rap pakon rayatni, inggot tanomanni; haganup sidea seng marsunat, tompas halani podang; sidea do sipasar songgot-songgot i tanoh ni halak na manggoluh, ipausung-usung sidea do habadoron ni sidea rap pakon halak, na tuad hu lubang ai, i tongah-tongah ni halak na tarbunuh ai do sidea radag.

²⁶Ijai do Mesek ampa Tubal ampa haganup rayatni inggot tanoman ni sidea, haganup do sidea seng marsunat, tompas halani podang, ai ma sibahen songgot-songgot hinan i tanoh ni halak na manggoluh. [339]

²⁷Seng tibal sidea rap pakon puanglima na dob tarbunuh sapari, na dob tuad hu nagori toruh marpakeian porang, podang ni sidea inahkon i toruh ni uluni, anjaha gantarni irungkubkon bani holi-holini; ai songgot-songgot mangidah puanglima ai do na masa i tanoh ni halak na manggoluh.

²⁸Tapi anggo ho i tongah-tongah ni na marsunat ai do, marosak anjaha tibal, rap pakon halak na tarbunuh halani podang.

²⁹Ijai do Edom, raja-rajani ampa na sangap-sangapni, itibalhon ijai, age pe gogoh hinan, rap pakon halak na tarbunuh halani podang; radag do sidea ijai rap pakon halak na so marsunat, rap pakon halak na tuad hu lubang ai. [340]

³⁰Ijai do raja-raja na hun utara haganup ampa haganup halak Sidon, na tuad rap pakon halak na tarbunuh, na gabe bador ibagas kuasani; tibal do sidea seng marsunat rap pakon halak na tarbunuh halani podang, anjaha ipausung-usung sidea do habadoron rap pakon halak na tuad hu lubang ai. [341]

³¹Idahon ni Parao ma sidea, gabe tarapoh ma uhurni pasal rayatni; tarbunuh ibahen podang do Parao ampa haganup balani, nini Tuhan Jahowa. [342]

³²Ai ipasar do songgot-songgot i tanoh ni halak na manggoluh; halani ai patibalon do Parao ampa haganup rayatni i tongah-tongah ni halak na so marsunat, rap pakon halak na tarbunuh binahen ni podang, nini Tuhan Jahowa.”