Read Batak Simalungun HESEKIEL 34 Bible Online

HESEKIEL 34 - Batak Simalungun bible

HESEKIEL 34

¹Dob ai roh ma hata ni Jahowa hu bangku, mangkatahon,

²“Ale anak ni jolma, manjahai ma ho pasal parmahan ni Israel, manjahai anjaha hatahon ma bani sidea, hubani parmahan ai: Sonon do hata ni Tuhan Jahowa: Bursik ma parmahan ni Israel, na marmahan dirini sandiri! Ai lang biribiri do siparmahanon ni parmahan?

³Taboh-tabohni ipangan hanima, wolni jadi pakeiannima, na mombur isayat hanima; tapi biribiri ai seng iparmahan hanima.

⁴Na galek seng ipargogohi hanima, na boritan seng itambari hanima, na ugahan seng ibaluti hanima; na kahou seng iboan hanima mulak, anjaha na magou seng ipindahi hanima; koras anjaha bisang do panrajainima bani sidea. [355]

⁵Jadi mampar ma biribiringku, halani lang adong na marmahani; gabe sipanganon ma sidea bani sagala binatang panoroh. [356]

⁶Maor do biribiringkai i atas ni sagala dolog ampa bani sagala buntu-buntu na gijang; bani sab tanoh in do mambur merap biribiringku, tapi sahalak pe lang adong na sungkun-sungkun pasal ai atap na mangindahi ai.

⁷Halani ai, ale parmahan, tangihon ma hata ni Jahowa!

⁸Songon sintongni manggoluh Ahu, nini Tuhan Jahowa: Halani gabe sisorohon biribiring-Ku, anjaha gabe sipanganon bani sagala binatang panoroh biribiringkai, halani seng dong na marmahani, anjaha halani seng ipindahi parmahankai biribiring-Kai, tapi dirini sandiri do iparmahan, hape biribiring-Kai lang, [357]

⁹halani ai, ale parmahan, tangihon hanima ma hata ni Jahowa:

¹⁰Sonon do hata ni Tuhan Jahowa: Tonggor ma, imbang-Ku do parmahan in, anjaha tungguon-Ku do biribiri in humbani sidea, anjaha parontihonon-Ku sidea humbani na marmahan biribiri in. Seng be parmahanon ni parmahan in dirini; paluahon-Ku ma biribiring-Ku humbani pamangan ni sidea, ase ulang ipangan sidea be in.

¹¹Ai sonon do hata ni Tuhan Jahowa: Tonggor ma, Ahu, Ahu sandiri sungkun-sungkun bani biribiring-Ku, anjaha pindahan-Ku do sidea. [358]

¹²Songon parmahan na mangindahi biribirini, anggo adong na kahou humbani hulananni ai, sonai do pindahan-Ku biribiring-Ku; paluahon-Ku do sidea humbani ganup ianan hamerapan ni sidea ai, sanggah bonog ari anjaha lotir. [359]

¹³Boanon-Ku do sidea mandarat humbani bangsa-bangsa, anjaha patumpuon-Ku do sidea hun nagori-nagori ai, anjaha paulakon-Ku do sidea hu tanoh ni sidea sandiri; parmahanon-Ku do sidea bani dolog-dolog ni Israel, bani habungan ampa bani haganup ianan, na tariankon i tanoh ai. [360]

¹⁴Bani sampalan na mombur do parmahanon-Ku sidea, anjaha dolog-dolog ni Israel na gijang ai do parmahanan bani sidea; ijai do sidea manggompang bani tanoh na dear panggagatan, anjaha manggagat do sidea bani sampalan na lambutan bani dolog-dolog ni Israel.

¹⁵Ahu sandiri ma gabe siparmahan bani biribiring-Ku, anjaha Ahu mambahen marsaran sidea, nini Tuhan Jahowa.

¹⁶ Pindahan-Ku do na magou in, paulakon-Ku ma na kahou in, anjaha balutan-Ku na ugahan; na galek pargogohan-Ku, tapi na mombur anjaha na gogoh pardiateihonon-Ku; ibagas hasintongan do parmahanon-Ku sidea.

¹⁷Tapi pasal hanima, ale biribiringku, sonon do hata ni Tuhan Jahowa: Ahu ma manguhum biribiri samah biribiri, biribiri tunggal ampa hambing tunggal. [361]

¹⁸Ai lang sungkup bannima manggagat bani sompalan na mombur in, ai dogei-dogeionnima ope teba-teba ni sampalan in? Ai lang sungkup ope minum hanima humbani bah na lihou in, sihol luntakonnima ope in?

¹⁹Ai mintor na nidogei-dogeinima in ma panganon ni biribiring-Ku, anjaha tor ni luntak-luntaknima in ma inumonni?

²⁰Halani ai, sonon do hata ni Tuhan Jahowa hubani sidea: Tonggor ma, Ahu sandiri ma na manguhum biribiri na mombur ampa na merung.

²¹Halani ionjar-onjar hanima marhitei badan ampa abaranima, anjaha na galek ai idugui hanima marhitei tanduknima, ronsi na mambur merap sidea,

²²halani ai urupan-Ku ma biribiring-Kin, seng be sisorohon sidea; Ahu ma na manguhum biribiri samah biribiri.

²³ Pabangkiton-Ku ma sada parmahan bani sidea, ai ma juakjuak-Ku si Daud, anjaha parmahanonni ma sidea. Ia ma na marmahan sidea, anjaha ia gabe parmahan bani sidea. [362]

²⁴Ahu, Jahowa ma gabe Naibata bani sidea, anjaha juakjuak-Ku si Daud gabe panrajai i tongah-tongah ni sidea; Ahu, Jahowa do na manluarhon ai. [363]

²⁵Bahenon-Ku ma bani sidea padan pardameian, anjaha usiron-Ku ma binatang panoroh hun tanoh ai, gabe boi sonang marianan sidea i halimisan atap modom i harangan. [364]

²⁶Bahenon-Ku ma sidea ampa haganup na inggot bani dolog-Ku gabe pasu-pasu; parohon-Ku do udan bani musimni, gabe udan pasu-pasu ma ai.

²⁷Hayu na i talun mambere buahni, anjaha tanoh ai ibere do gogohni, anjaha sonang do sidea i tanoh ni sidea sandiri; jadi tandaon ni sidea ma, Ahu do Jahowa, anggo Huponggolhon pasangan ni sidea ai, anjaha Hupaluah sidea humbagas tangan ni halak na marjabolonkon sidea. [365]

²⁸Seng be gabe taban-taban sidea bani bangsa-bangsa, anjaha binatang-binatang na i nagori in seng be atahonni sidea, tapi sonang ma sidea marianan, seng dong be na mangkirjati. [366]

²⁹Pasirsiron-Ku ma bani sidea sada pohon na madear, gabe seng be magou sidea hun nagori in halani gayuran, anjaha seng be taronon ni sidea apas-apas ni bangsa-bangsa. [367]

³⁰Jadi botohon ni sidea ma, Ahu do Jahowa, Naibata ni sidea, na mangkasomani sidea, anjaha sidea ginompar ni Israel, bangsang-Ku do sidea, nini Tuhan Jahowa. [368]

³¹Tongon, hanima do biribiring-Ku, biribiri bani sampalan-Ku; Ahu do Naibatanima, nini Tuhan Jahowa.” [369]