Read Batak Simalungun HESEKIEL 35 Bible Online

HESEKIEL 35 - Batak Simalungun bible

HESEKIEL 35

¹Dob ai roh ma hata ni Jahowa hu bangku, mangkatahon,

²“Ale anak ni jolma, dompakkon ma bohimu hu Dolog Seir, anjaha manjahai ma ho pasal ai! [370]

³Hatahon ma hu bani: Sonon do hata ni Tuhan Jahowa: Imbang-Ku do ho, ale Dolok Seir, pagostongon-Ku do tangan-Ku dompak ho, anjaha bahenon-Ku do ho gabe halimisan anjaha tarulang.

⁴Parreongon-Ku do huta-hutamu, maningon gabe halimisan do ho, ase itanda ho, Ahu do Jahowa.

⁵Halani humbani sapari mammunsuhi lalab uhurmu, anjaha iondoskon ho halak Israel bani podang, sanggah panorang hasosakanni, bani panorang hagogok ni uhum bani sidea, [371]

⁶halani ai, songon sintongni manggoluh Ahu, nini Tuhan Jahowa, bahenon-Ku do ho margulu-gulu daroh, seng tarlembangi ho na marlapu-lapu daroh ai; halani marsalah ho marhitei na manduruskon daroh, halani ai maningon durus do darohmu. [372]

⁷Bahenon-Ku do Dolok Seir gabe halimisan anjaha tarulang, anjaha rotapon-Ku do hunjai sagala na masuk ampa na luar.

⁸Gok do bahenon-Ku dologmu bani na tarbunuh, radag do halak na tarbunuh bani dolog-dologmu, bani habunganmu ampa bani binanga-binangamu.

⁹Bahenon-Ku do ho gabe halimisan ronsi sadokah ni dokahni, anjaha hutamu pe lang be ianonkon, ase itanda ho, Ahu do Jahowa.

¹⁰Halani ihatahon ho: Na dua bangsa on ampa na dua nagori on maningon bangku do ai, maningon ahu do gabe simada ai! (hape ijai do Jahowa.) [373]

¹¹Halani ai, songon sintongni manggoluh Ahu, nini Tuhan Jahowa, maningon bahenon-Ku do bam romban hubani ringismu ampa romban hubani simburumu dompak sidea halani domdommu mangidah sidea; patandahonon-Ku do diring-Ku i tongah-tongahnima marhitei uhum sidabuhon-Ku bannima.

¹²Jadi botohonmu ma, Ahu do Jahowa, na manangar haganup panrisaimu dompak dolog ni Israel, marhitei na mangkatahon, Domma iparseda ai! Sibonduton do ai ibere banta!

¹³Ipabanggal ho do dirimu dompak Ahu marhitei pamanganmu, ipabuei ho do sahap-sahapmu dompak Ahu; Hubogei do ai.

¹⁴Sonon do hata ni Tuhan Jahowa: Songon malas ni uhurmu bani tanoh-Ku na tarulang in, sonai do mangonai bam bahenon-Ku.

¹⁵Songon malas ni uhurmu mangidah parbagianan ni Israel na maseda in, sonai do mangonai bam bahenon-Ku; maningon gabe halimisan do ho, ale Dolok Seir ampa ho haganup, ale Edom, ase itanda hanima, Ahu do Jahowa.” [374]