Read Batak Simalungun HESEKIEL 37 Bible Online

HESEKIEL 37 - Batak Simalungun bible

HESEKIEL 37

¹Dob ai sogop ma bangku tangan ni Jahowa; jadi iarahkon ma ahu hu darat marhitei Tonduyni, anjaha ipasoh ma ahu i tongah-tongah ni habungan ai, gok holi-holi ni jolma do ai. [393]

²Ipabontaskon ma ahu hunjai inggot, anjaha tonggor ma, buei tumang merap i habungan ai, anjaha tonggor ma, domma horah-horah ganupan ai.

³Jadi nini ma dompak ahu, “Ale anak ni jolma, boi ope manggoluh holi-holi on? Jadi ningku ma mambalosi: Ale Tuhan Jahowa, Ham do na mambotoh ai!

⁴Dob ai nini ma hu bangku, Manjahai ma ho pasal holi-holi on, hatahon ma bani sidea: Ale holi-holi na horah-horah, tangar ma hata ni Jahowa!

⁵Sonon do hata ni Jahowa bani holi-holi on: Tonggor ma, Ahu mambere Tonduyhu hu bannima, ase manggoluh hanima. [394]

⁶Anjaha Ahu mannahkon urat-urat bannima ampa patubuh daging bannima ampa mambahen marhuling-kuling hanima ampa mambahen marhosah, ase manggoluh hanima; jadi tandaonnima ma, Ahu do Jahowa. [395]

⁷Jadi manjahai ma ahu songon na pinarentahkon ai bangku, anjaha sanggah na manjahai ai ahu, tonggor ma, masa ma sora na mardongos, gabe marsitohuan ma holi-holi samah holi-holi. [396]

⁸Jadi sanggah na mangkawah ahu, tonggor ma, domma dong urat-urat bani sidea, tubuh daging bani sidea, anjaha marhulingkuling sidea; tapi seng dong ope tonduy bani sidea.

⁹Dob ai nini ma dompak ahu: Manjahai ma ho pasal tonduy ai, manjahai ma, ale anak ni jolma, anjaha hatahon ma bani tonduy ai: Sonon do hata ni Tuhan Jahowa: Roh ma ale tonduy humbani deisa na ompat in, manompul ma ho hubani halak na binunuh on, ase manggoluh sidea!

¹⁰Anjaha manjahai ma ahu songon na pinarentahkon ai hu bangku, gabe roh ma tonduy ai hubagas sidea, jadi manggoluh ma sidea anjaha jongjong bei bani naheini; hulanan banggal tumang do ai.

¹¹Dob ai nini ma hu bangku, “Ale anak ni jolma, ia holi-holi on, ginompar ni Israel do in ganup. Tonggor ma, nini sidea: Domma masak holi-holinami, seng dong be pangarapannami, bois do hanami.

¹²Halani ai manjahai ma ho, anjaha hatahon ma bani sidea: Sonon do hata ni Tuhan Jahowa: Tonggor ma, ungkabon-Ku do tanomannima, anjaha paluaron-Ku do hanima hum bagas tanomannima, ale bangsang-Ku; anjaha boanon-Ku do hanima mulak hu tanoh Israel.

¹³Jadi tandaonnima ma, Ahu do Jahowa, anggo Huungkab ma tanomannima, anjaha Hupaluar hanima Humbagas tanomannima, ale bangsang-Ku.

¹⁴Anjaha nahkonon-Ku do Tonduyhu hubagas dirinima, ase manggoluh hanima, anjaha bahenon-Ku do hanima marianan bani tanohnima; jadi tandaonnima ma, Ahu do Jahowa, na marsahap ai, anjaha pasaudon-Ku do ai, nini Tuhan Jahowa.

¹⁵Dob ai roh ma hata ni Jahowa hu bangku, mangkatahon,

¹⁶Ale anak ni jolma, buat ma bam sada tungkot, anjaha suratkon ijai: Juda ampa ginompar ni Israel na sapadan pakonsi. Dob ai buat ma tungkot na legan, anjaha suratkon ma ijai: Josep, tungkot ni Efraim ampa haganup ginompar ni Israel na sapadan pakonsi. [397]

¹⁷Padomu ma ai gabe sada tungkot, gabe sada ma ai ibagas tanganmu. [398]

¹⁸Jadi anggo adong hasomanmu sabangsa mangkatahon bam: Ai seng ra ham patugahkon bennami atap aha do tujuanmu marhitei in?

¹⁹Jadi hatahon ma bani sidea: Sonon do hata ni Tuhan Jahowa: Tonggor ma, Hubuat do tungkot ni si Josep ampa marga ni Israel hasomanni sapadan ai, na ibagas tangan ni Efraim; anjaha Hupadomu ma hujai tungkot ni Juda, anjaha hubahen ma ai gabe sada tungkot, ase gabe sada ai ibagas tanganku.

²⁰Sanggah ijolom ho tungkot na dob sinuratan ai ididah sidea,

²¹hatahon ma bani sidea: Sonon do hata ni Tuhan Jahowa: Tonggor ma, arahkonon-Ku do halak Israel hun tongah-tongah ni bangsa-bangsa hadasan ni sidea ai, anjaha patumpuon-Ku do sidea humbani ganup ianan; anjaha boanon-Ku do sidea mulak hu tanoh ni sidea. [399]

²²Bahenon-Ku do sidea gabe sada bangsa i tanoh ai, bani dolog-dolog ni Israel; anjaha sada do raja manggomgom sidea ganup, seng be dua bangsa sidea, anjaha seng be marbagi gabe dua harajaon. [400]

²³Seng be pabutakon ni sidea dirini marhitei gana-gana ni sidea, marhitei sisombah-sombahon ni sidea ai, atap marhitei ganup panlanggaron ni sidea; anjaha paluahon-Ku do sidea humbani ganup parbalikon ni sidea ai, na mambahen sidea mardousa; urason-Ku do sidea, gabe bangsang-Ku do sidea, anjaha Ahu gabe Naibata bani sidea. [401]

²⁴ Anjaha juakjuak-Ku si Daud do manggomgomi sidea, sada do hansa parmahan bani sidea haganup; marparlahou do sidea ibagas aturan-Ku, anjaha pongkut ma sidea manramotkon titah-Ku. [402]

²⁵Iankonon ni sidea do tanoh na dob huberehon bani juakjuak-Ku si Jakob, bani tanoh na dob niiankon ni ompung ni sidea; ijai ma sidea marianan, anak ni sidea ampa pahompu ni sidea ronsi sadokah ni dokahni; anjaha juakjuak-Ku si Daud ma lalab panggomgom bani sidea.

²⁶Bahenon-Ku do bani sidea padan pardameian, padan sisadokah ni dokahni ma ai bani sidea; pasu-pasuon-Ku do sidea anjaha pabueion-Ku; anjaha pajongjongon-Ku do ianan-Ku na mapansing in i tongah-tongah ni sidea ronsi sadokah ni dokahni. [403]

²⁷I tongah-tongah ni sidea do Ahu marianan; Ahu do gabe Naibata bani sidea anjaha sidea gabe bangsangku.

²⁸Jadi botohon ni bangsa-bangsa ma, Ahu do Jahowa, na papansingkon Israel, anggo i tongah-tongah ni sidea ma iananku na pansing in ronsi sadokah ni dokahni.” [404]