Read Batak Simalungun HESEKIEL 38 Bible Online

HESEKIEL 38 - Batak Simalungun bible

HESEKIEL 38

¹Dob ai roh ma hata ni Jahowa hu bangku, mangkatahon,

²“Ale anak ni jolma, dompakkon ma bohimu hubani Gog, na i tanoh Magog, ai ma raja ni Ros, Mesek ampa Tubal, manjahai ma ho dompaksi, [405]

³anjaha hatahon ma: Sonon do hata ni Tuhan Jahowa: Tonggor ma, roh ma Ahu mangimbang ho, ale Gog, raja ni Ros, Mesek ampa Tubal.

⁴Ahu do na manogu-nogu ho, bahenon-Ku do hait-hait bani osang-osangmu; pabingkaton-Ku do ho ampa haganup balamu, huda ampa siajak huda, haganup sidea marpakeian sinjata na gopas, ai ma sada hulanan banggal, haganup sidea margantar na bolag atap na etek, anjaha manintak podang; [406]

⁵halak Persia, Kus ampa Put do hasomanmu, haganup do sidea margantar anjaha martangkuluk; [407]

⁶sonai homa Gomer ampa haganup balani, ambahni ai ginompar ni si Togarma, na hun nagori tang parutara ampa haganup balani, buei do bangsa-bangsa mangkasomani ho. [408]

⁷Marugas ma, sirsir bei ma, ho pakon haganup bala na martumpu hubam, anjaha ho ma gabe pambobai bani sidea.

⁸Bani dokah-dokah ni ari arahkonon ma ho; bani ujung ni jaman das ma ho bani sada nagori, na dob maluah humbani podang, bani sada bangsa na ipatumpu hun tongah-tongah ni buei bangsa-bangsa, bani dolog-dolog ni Israel, na dob dokah halong ai, tongon na pinadarat do ai hun tongah-tongah ni buei bangsa, anjaha na sonang sonari marianan sidea haganup.

⁹Roh do tangkog songon haba-haba, roh songon hombun manrungkub tanoh in, ho pakon haganup balamu anjaha buei bangsa-bangsa mangkasomani ho.

¹⁰Sonon do hata ni Tuhan Jahowa: Bani panorang ai, tubuh do pingkiran ibagas uhurmu, anjaha hajahaton do iranggihon ho,

¹¹nim: Bingkat ma ahu mamorang tanoh na so marbenteng; hudorab ma halak na sonang marianan anjaha na mardamei-damei ai, ai ma haganup sidea na marhuta seng martembok, seng marpating-pating atap marhorbangan, [409]

¹²laho manrampas ampa manaban, laho mardas tangan bani ianan na dob maseda ai, tapi sonari iiankon, ampa bani bangsa na dob ipatumpu ai humbani bangsa-bangsa, na dob marpinahan ampa mararta nuan, marianan i tongah-tongah ni tanoh on. [410]

¹³Hatahonon ni Seba, Dedan, Tarsis ampa partiga-tigani do hubam: Ai laho martaban do ham ase roh? Ai laho manrampas do ham, ase ipatumpu ham tentaramu? Laho mambuat pirak ampa omas, laho mambuat pinahan ampa arta-arta, laho mambuat buei taban-taban?

¹⁴Halani ai, manjahai ma ho, ale anak ni jolma, hatahon ma bani Gog: Sonon do hata ni Tuhan Jahowa: Ai lang sonon do? Bani panorang ai, sanggah na marsonang-sonang bangsangku Israel marianan, marugas do ho,

¹⁵anjaha roh ho humbani iananmu, hun utara tumang, ho pakon bangsa na mangkasomani ho, haganup sidea mangajak huda, sada hulanan banggal, sada bala na gogoh;

¹⁶roh do ho mamorang bangsang-Ku Israel, songon hombun, laho manrungkub tanoh ai. Bani ujung ni jaman, arahkonon-Ku do ho mamorang tanoh-Ku, ase itanda bangsa-bangsa Ahu, anggo Hupatalar ma hapansingon-Ku i lobei ni sidea marhitei ho, ale Gog.

¹⁷Sonon do hata ni Tuhan Jahowa: Ai lang ho do ai na Husahapkon ai sapari marhitei juakjuakku, ai ma nabi-nabi ni Israel, na manjahai ijia martahun-tahun, paboa suruhon-Ku do ho mandorab sidea? [411]

¹⁸Bani panorang ai, sanggah roh Gog manlawan tanoh Israel, nini Tuhan Naibata ma, manggila tumang do Ahu.

¹⁹Ibagas simburu ampa gajag ni ringis-Ku do Huhatahon on: Tongon, bani panorang ai masa do lalou banggal i tanoh Israel;

²⁰jadi hitir ma i lobei-Hu dengke na i laut, manuk-manuk na i awang-awang, binatang na i talun, sagala na manggulmit, na manjulur bani tanoh ampa haganup jolma na i sisik ni tanoh on; mangkatornoh ma dolog-dolog, mangkabolah dolog batu, anjaha mangkatompas sagala tembok hu tanoh.

²¹Diloonku do sagala songgot-songgot dompak Gog, nini Tuhan Jahowa, marsitampulan ma samah sidea.

²²Uhumon-Ku do ia marhitei sampar ampa daroh na madurus; parohon-Ku do udan doras, sira-sira, apuy ampa hirtah hu bani, hubani tentarani ampa hubani bangsa na buei ai, na mangkasomanisi. [412]

²³Sonai ma patalaron-Ku hatimbulon-Ku ampa hapansingon-Ku, anjaha Hupataridahkon diring-Ku i lobei ni buei bangsa, ase itanda sidea, Ahu do Jahowa.” [413]