Read Batak Simalungun HESEKIEL 39 Bible Online

HESEKIEL 39 - Batak Simalungun bible

HESEKIEL 39

¹“Ale anak ni jolma, manjahai ma ho dompak Gog, hatahon ma: Sonon do hata ni Tuhan Jahowa: Tonggor ma, roh ma Ahu mangimbang ho, ale Gog, raja ni Ros, Mesek ampa Tubal! [414]

²Ahu do na manogu-nogu ho ampa na mangarahkon ho hun nagori tang parutara, anjaha boanon-Ku do ho hu dolog ni Israel;

³jadi poyutkononku ma siormu hun tangan sambiloumu, ampa lingkitmu hun tangan siamunmu.

⁴I atas ni dolog Israel do ho rasei, ho ampa balamu haganup ronsi sagala bangsa na niarahkonmu; ondoskonon-Ku do ho bani manuk-manuk panoroh ampa haganup siparhabong ampa bani binatang na i talun gabe sibonduton ni sidea. [415]

⁵I ladang do ho tompas; tongon, Ahu do na mangkatahon ai, nini Tuhan Jahowa.

⁶Tongoskonon-Ku do apuy bani Magog ampa bani halak na marianan marsonang-sonang i topi laut, jadi tandaon ni sidea ma, Ahu do Jahowa.

⁷Pabotohkonon-Ku do goran-Ku na pansing in i tongah-tongah ni bangsang-Ku Israel, seng be mahiri paturuton-Ku goran-Ku na pansing in, gabe botohon ni sagala bangsa ma, Ahu do Jahowa, na pansing i tongah-tongah ni Israel.

⁸Tonggor ma, na roh ma ai, anjaha saud ma ai, nini Tuhan Jahowa; “ai ma ari, na dob Hulumbahon hinan.

⁹Jadi luar ma halak pangisi ni huta-huta ni Israel, pagaraonni ma apuy anjaha tutungon ni sidea ma sinjata-sinjata, gantar na etek ampa na banggal, sior ampa lingkit, pukul-pukul ampa tanja; tutungon ni sidea ma ai pala pitu tahun dokahni, [416]

¹⁰seng pala porlu be alopon ni sidea soban hun juma, atap manroboh hayu sidea i harangan, ai sinjata ai ma gabe soban bani sidea; sidea ma partaban bani halak na dob manaban sidea, anjaha rampason ni sidea ma halak na dob manrampas sidea,” nini Tuhan Jahowa.

¹¹“Bani panorang ai pasirsiron-Ku do tanoman bani Gog i Israel, ai ma lombang pamontasan hampit hapoltakan ni Laut Matei, gabe tarolat do halak mamontas hunjai. Ijai do itanom Gog ampa haganup balani, anjaha igoran ma ai: Lombang bala ni Gog.

¹²Pala do pitu bulan dokahni ginompar ni Israel mananom sidea, laho manguras tanoh ai.

¹³Haganup do bangsa na i nagori ai mananom sidea; gabe tarbarita do sidea, bani panorang ai, sanggah na Hupataridahkon ai hamuliaon-Ku,” nini Tuhan Jahowa.

¹⁴“Papuligon ni sidea do halak sidalani tanoh ai torus, laho mananom bangkei na tading i nagori ai, ase taruras tanoh ai; dob salpu pe sipitu bulan ai, ase idalankon sidea pamareksaan ai.

¹⁵Jadi isiar halak sipamareksa ai ma tanoh ai, anjaha anggo adong na mangidah holi-holi ni jolma, gabe ibahen ma ijai partanda, das ronsi Lombang Bala ni Gog itanom sipananom ai.

¹⁶Sonai ma itanom sidea ganup balani ai ijai; sonai ma panguras ni sidea tanoh ai.

¹⁷Tapi anggo ho, ale anak ni jolma, sonon do hata ni Tuhan Jahowa: Hatahon ma bani manuk-manuk, haganup siparhabong ampa hubani haganup binatang na i talun: Martumpu ma anjaha roh ma, marurup ma hanima roh humbani ganup ianan hubani pesta panggalangan na Hupasirsir bannima, ai ma sada pesta panggalangon banggal bani dolog ni Israel; pangan hanima ma gulei anjaha inum ma daroh! [417]

¹⁸Daging ni puanglima do panganonnima, anjaha daroh ni raja-raja ni tanoh on do inumonnima; songon biribiri tunggal ampa anak ni biribiri, hambing tunggal ampa lombu jonggi, pinahan na pinamombur i Basan do sidea haganup bannima.

¹⁹Panganonnima do taboh-tabohni ronsi bosur hanima, anjaha inumonnima do darohni ronsi mabuk hanima bani pesta panggalangan ai, na Hupasirsir bannima.

²⁰Bosur do hanima idangan-Ku mangankon huda ampa siajak huda, puanglima ampa buei bala, nini Tuhan Jahowa.

²¹Patimbulon-Ku do hamuliaon-Ku i tongah-tongah ni bangsa-bangsa; idahon ni sagala bangsa do uhum na Hudabuh bani sidea, ampa kuasa ni tangan-Ku na Hupadalan bani sidea.

²²Botohon ni ginompar ni Israel ma, Ahu do Jahowa, Naibata ni sidea, humbani panorang ai nari.

²³Botohon ni sagala bangsa ma, ase tarbuang pe halak Israel, ai ma halani hajahaton ni sidea. Halani marbalik do sidea hun Bangku, ase Huponopkon bohing-Ku humbani sidea, anjaha Huondoskon sidea hubagas tangan ni munsuh ni sidea, anjaha rasei sidea haganup ibahen podang. [418]

²⁴Hubahen do bani sidea domu hubani habutakon ni sidea ampa panlanggaronni, anjaha Huponopkon bohing-Ku humbani sidea.”

²⁵Halani ai, sonon do hata ni Tuhan Jahowa, “Bahenon-Ku do suang sonari Jakob, anjaha maidop uhur-Hu bani haganup ginompar ni Israel; marah do Ahu mangkopkop goran-Ku na pansing in. [419]

²⁶Lang be taringat sidea bani habadoronni ampa bani pangoseion ni sidea Bangku, anggo marsonang-sonang ma sidea marianan i tanoh ni sidea, anjaha seng dong be panonggoti bani sidea, [420]

²⁷anggo Hupaulak ma sidea humbani bangsa-bangsa, anjaha Hupatumpu sidea humbani nagori ni munsuh ni sidea, anjaha Hupapansing diring-Ku i lobei ni bangsa-bangsa marhitei sidea.

²⁸Jadi tandaon ni sidea ma, Ahu do Jahowa, Naibata ni sidea, na dob mambuangkon sidea hu tongah-tongah ni bangsa-bangsa, tapi na patumpu sidea use hu tanoh ni sidea, anjaha sahalak pe lang humbani sidea na tading Hupaturut i jai.

²⁹Seng be ponopkonon-Ku bohing-Ku humbani sidea, anggo Huuseihon ma Tonduyhubani ginompar ni Israel, nini Tuhan Jahowa.” [421]