Read Batak Simalungun HESEKIEL 42 Bible Online

HESEKIEL 42 - Batak Simalungun bible

HESEKIEL 42

¹Dob ai ibobai ma ahu hu darat, hu alaman parbagas ai, mardalan dompak utara, lanjar iarahkon ma ahu hu kamar-kamar tontang ni alaman ni Rumah na Mapansing ai, tontang ni Rumah na Mapansing hampit utara.

²Ganjang ni rumah na hampit utara ai, saratus asta, anjaha bolagni lima puluh asta. [436]

³I holangkolang ni alaman sidua puluh asta ai bolagni ampa pardarat na ibatui ai, adong do surambih palopah-lopah tolu tingkat. [437]

⁴I lobei ni kamar-kamar ai adong do sada gang (dalan) sapuluh asta bolagni anjaha saratus asta ganjangni, dompak utara do labahni ai.

⁵Sompitan do kamar pardatas humbani kamar partongah-tongah ampa partoruh halani surambihni ai.

⁶Ai tolu tingkat do kamar-kamar ai; seng dong tiangni ai songon tiang-tiang na i alaman pardarat ai; halani ai tar hu pudi do ibahen ai marimbang kamar partongah-tongah ampa partoruh.

⁷Anjaha adong do sada tembok i darat patontang ampa kamar-kamar ai, hampit alaman pardarat, lima puluh asta ganjangni.

⁸Ia ganjang ni ganup kamar ai, na mandompakkon alaman pardarat ai, lima puluh asta do, tapi na patontang ampa Rumah na Mapansing ai, saratus asta do.

⁹I toruh ni kamar-kamar ai adong do sada dalan masuk hun lopah parhapoltakan, anggo masuk halak hujai hun alaman pardarat ai,

¹⁰ai ma bani bona ni tembok na i darat ai. Hampit dangsina pe, tontang ni alaman ni Rumah na Mapansing ai, tontang ni Rumah na Mapansing ai, adong do kamar-kamar,

¹¹anjaha adong do sada gang (dalan) i lobei ni ai, dos do ai ampa kamar-kamar parutara, dos ganjangni ampa bolagni, dos dalan kaluarni, popouni ampa labah-labahni.

¹²Ia labah ni kamar-kamar pardangsina ai, dompak dangsina do; i toruh ni kamar-kamar ai adong do sada dalan masuk hun lopah parhapoltakan, laho masuk hu gang (dalan) ai, na i lobei ni kamar-kamar ai.

¹³Dob ai nini ma dompak ahu, “Ia kamar parutara ampa kamar pardangsina ai, na patontang pakon alaman ai, kamar-kamar na mapansing do ai: ijai ma panganon ni malim na bulih mandohori Jahowa, galangan tang na mapansing ai; ijai ma patibalon ni sidea galangan tang na mapansing ai; Galangan sipanganon, galangan pardousaon ampa galangan parsalahan, ai na mapansing do ianan ai. [438]

¹⁴Anggo domma imasuki malim-malim ai ianan na mapansing ai, seng bulih be sidea luar hunjai hu alaman pardarat ai, anggo lape palobei itanggali sidea ijai pakeian marugas ni sidea ai, ai pansing do ai; maningon pakeian na legan do pakeion ni sidea, ase boi hundohor bani halak na mabuei ai.”

¹⁵Jadi dob siap isibar parbagasan ni rumah panumbahan ai, ibobai ma ahu hu darat hun horbangan parhapoltakan ai, anjaha isibar ma pardarat ni Rumah Panumbahan ai inggot.

¹⁶Isibar ma lopah parhapoltakan ai marhitei tungkot sibar-sibar ai, lima ratus asta mangihutkon tungkot sibar-sibar ai.

¹⁷Dob ai marhusor ma ia, isibar ma lopah parutara ai, lima ratus asta mangihutkon tungkot sibar-sibar ai.

¹⁸Dob ai marhusor ma ia, isibar ma lopah pardangsina ai, lima ratus asta mangihutkon tungkot sibar-sibar ai.

¹⁹Dob ai marhusor ma ia use dompak hasundutan, anjaha isibar ma, lima ratus asta mangihutkon tungkot sibar-sibar ai.

²⁰Isibari do ai mangihutkon lopah na ompat ai. Adong do tembok inggot ni ai, lima ratus asta ganjangni anjaha lima ratus asta bolagni, ai ma na manirang ianan na mapansing ai humbani na so pansing ai.