Read Batak Simalungun HESEKIEL 43 Bible Online

HESEKIEL 43 - Batak Simalungun bible

HESEKIEL 43

¹Dob ai ibobai ma ahu hu horbangan ai, ai ma horbangan parhapoltakan ai.

²Tonggor ma, roh do hamuliaon ni Naibata ni Israel hun hapoltakan, anjaha sora ni parrohni ai songon parhasak ni bah marbanggal do; jadi lihar do tanoh ai halani hamuliaon-Ni ai, [439]

³Ia pangungkabon na huidah ai, usih do ai bani pangungkabon na huidah ijia, sanggah roh Jahowa laho mangagou huta ai, anjaha usih bani pangungkabon na huidah i lambung ni Bah Kebar; jadi manrogop ma ahu. (bd. 1; 8-11)

⁴Masuk ma hamuliaon ni Jahowa hubagas Rumah na Mapansing ai hun horbangan parhapoltakan ai; [440]

⁵jadi iangkat Tonduy ai ma ahu, lanjar iboan ma ahu hu alaman parbagas ai. Tonggor ma, hamuliaon ni Jahowa do manggoki Rumah na Mapansing ai. [441]

⁶Sanggah na jonjong ai dalahi ai i lambungku, hutangar ma adong na marsahap hu bangku hun Rumah na Mapansing ai,

⁷nini ma hu bangku, Ale anak ni jolma, ianan on do hajongjongan ni paratas-Ku ampa sidogeian ni jampal ni nahei-Hu; ijon do Ahu marianan i tongah-tongah ni halak Israel ronsi sadokah ni dokahni. Anjaha seng be pabutakon ni ginompar ni Israel goran-Ku na Mapansing in, sidea age raja-raja ni sidea marhitei parnaibata silebanon ni sidea, atap marhitei bangkei ni raja-raja ni sidea, bani parmatei ni sidea,

⁸marhitei na pajongjong molmolanni i lambung ni molmolan-Ku, labahni bani labah-Ku, pitah tembok mando holangkolang-Ku humbani sidea. Ibutaki sidea do goran-Ku na pansing in marhitei hasamboron na hinorjahon ni sidea ai, gabe Huboiskon sidea ibagas ringis-Ku. [442]

⁹Tapi sonari, ipadaoh sidea ma parnaibata silebanon ni sidea ai ampa bangkei ni raja-raja ni sidea hun Bangku, ase marianan Ahu i tongah-tongah ni sidea ronsi sadokah ni dokahni.

¹⁰Ai pe, ale anak ni jolma, patorang ma bani ginompar ni Israel pasal Rumah Panumbahan on, rupani ampa popouni, ase maila sidea halani hajahaton ni sidea ai. [443]

¹¹Anggo domma maila sidea halani haganup pambahenan ni sidea ai, patorang ma bani sidea pasal rupa ampa poupou ni Rumah Panumbahan ai, pasal dalan kaluar ampa dalan masuk ampa rumang ni haganupan ai; pabotohkon ma bani sidea haganup pasal aturanni ampa titahni; suratkon ma ai i lobei ni sidea, ase iparuhurhon anjaha idalankon sidea haganup titah ampa aturan-aturanni.

¹²On ma titah pasal Rumah Panumbahan ai: haganup ianan inggot bani pakpak ni dolog ai pansing tumang do ai. Tonggor ma, ai ma titah pasal Rumah Panumbahan ai.

¹³On do sibaran ni anjapanjap ai, mangihutkon asta na ganjangan santopap humbani asta na somal: Onjolanni saasta gijangni anjaha saasta bolagni, anjaha marbibir inggot, sanjongkal gijangni. [444]

¹⁴On ma gijang ni anjapanjap ai; humbani onjolanni na bani tanoh das bani tangga partoruh dua asta anjaha bolagni sada asta; humbani tangga sietekan ai hubani tangga sibolagan ai ompat asta do anjaha saasta bolagni.

¹⁵Tataring panggalangan ai ompat asta do gijangni; humbani tataring ai adong do jurjur hu atas ompat tanduk, saasta gijangni. [445]

¹⁶Ia tataring ai marompat suhi do, sapuluh dua asta ganjangni anjaha sapuluh dua asta bolagni.

¹⁷Ia tangga-tangga sibolagan ai sapuluh ompat asta do ganjangni anjaha sapuluh ompat asta do bolagni, ase marompat suhi do. Marbibir inggot satongah asta bolagni, anjaha onjolanni sada asta do inggot. Mandompakkon hapoltakan do tanggani.

¹⁸Dob ai nini ma dompak ahu, “Ale anak ni jolma, sonon do hata ni Tuhan Jahowa: On ma aturan pasal anjapanjap ai: Bani ari ai, siapkonsi ai, laho manggalangkon galangan situtungon i atas ni ai, anjaha laho mamispiskon daroh hujai,

¹⁹bere ma sada anak ni lombu bahen galangan pardousaon bani malim-malim halak Levi ai, ginompar ni si Sadok, na bulih roh mandohori Ahu, laho marugas Bangku, nini Tuhan Jahowa. [446]

²⁰Anjaha buat ma deba humbani darohni ai, anjaha nahkon ma ai bani tanduk na ompat ai ampa bani haompatsi suhi-suhi ni tangga-tangga ai, ampa bani bibirni inggot; sonai ma urasonmu anjapanjap ai, laho mambahen pardearan pasal ai. [447]

²¹Ningon buatonmu do homa anak ni lombu galangan pardousaon ai, anjaha itutung ma ai bani ianan na tinontuhon hujai, i darat ni ianan na mapansing ai. [448]

²²Anjaha padua-arihon maningon galangkononmu do sada hambing tunggal, na so martikas bahen galangan pardousaon, ase hona uras anjapanjap ai, songon na dob huuras ai marhitei anak ni lombu.

²³Dob siap iuras ho anjapanjap ai, maningon galangkononmu do sada anak ni lombu na so martikas ampa sada biribiri tunggal na so martikas humbani hulanan ai.

²⁴Haduasi do ai galangkononmu i lobei ni Jahowa, anjaha maningon tirtirhonon ni malim do garam hu atasni, anjaha igalangkon ai songon galangan situtungon bani Jahowa. [449]

²⁵Pitu ari dokahni maningon pasirsironmu do ganup ari sada hambing tunggal bahen galangan pardousaon; sonai homa sada anak ni lombu ampa sada biribiri tunggal na so martikas humbani hulanan ai maningon pasirsiron do. [450]

²⁶Pitu ari dokahni maningon bahenon ni sidea pardearan pasal anjapanjap ai anjaha urasonni ai, sonai ma ipapansing ai.

²⁷Anjaha dob salpu ari ai, jadi paualuh-arihon ampa torus i pudini ai maningon galangkonon ni malim do bani anjapanjap ai galangan situtungonnima ampa galangan pardameiannima; jadi marosuh ma uhurhu mangidah hanima, nini Jahowa.”