Read Batak Simalungun HESEKIEL 5 Bible Online

HESEKIEL 5 - Batak Simalungun bible

HESEKIEL 5

¹“Ia ho ale anak ni jolma, buat ma bam sada podang na marot, pakei ma ai songon pisou parjambak, anjaha padalan ma ai bani ulumu pakon jambakmu; dob ai buat ma bam dasing, anjaha bagi ma jambulan ai.

²Sapartolu ma ai bani apuy i tongah-tongah ni huta ai, anggo gok ma ari pangkubuon ai; anjaha na sapartolu nari buat ma ai anjaha tampuli ma inggot huta ai; dob ai na sapartolu nari purpurhon ma bani logou, anjaha Ahu manintak podang hun pudi ni sidea.

³Anjaha buat ma otik hunjai, sangkutkon ma ai bani sisi ni bajumu. [39]

⁴Anjaha hunjon buat ma use otik, anjaha gijigkon ma ai hubagas apuy, anjaha tutung ma ai; hunjai ma roh apuy bani haganup halak Israel.”

⁵Sonon do hata ni Tuhan Jahowa, “On ma huta Jerusalem, Hupajongjong do in i tongah-tongah ni bangsa-bangsa, anjaha nagori-nagori manginggotisi. [40]*

⁶Hape ilawan sidea do titah-Ku, jahatan humbani sipajuh begu-begu, sonai homa aturan-Ku lobih humbani nagori na manlioti sidea, ai mapas do sidea bani sagala aturan-Ku anjaha seng iparlahouhon sidea titah-Ku.”

⁷Halani ai sonon do hata ni Tuhan Jahowa, “Halani jahatan hanima marparlahou marimbang sipajuh begu-begu na manlioti hanima anjaha seng ihorjahon hanima titah-Ku, anjaha seng idalankon hanima aturan-Ku, anjaha songon paraturan ni parbegu na manlioti hanima pe lang idalankon hanima,

⁸halani ai sonon do hatang-Ku, Ahu Tuhan Jahowa, tonggor ma, Ahu pe imbangmu do; dabuhon-Ku do uhum i tongah-tongahmu, i lobei ni bangsa-bangsa.

⁹Bahenon-Ku ma hu bam na so ongga Hubahen ope, anjaha na so bahenon-Ku be halani sagala hasamboron na hinorjahonmu.

¹⁰Halani ai panganon ni bapa ma anakni i tongah-tongahmu, anjaha anak mangankon bapani; padalanon-Ku ma uhum bam, anjaha na teba ai hun bam, erapon-Ku do ai bani ganup deisa. [41]

¹¹Halani ai, songon sintongni manggoluh Ahu,” nini Tuhan Jahowa, “halani ibutaki ho ianan-Ku na mapansing in marhitei haganup sihagigihononkon ampa hasamboron na hinorjahonmin, Ahu pe jambakon-Ku ma ho; seng maidop be matang-Ku mangkawah bam anjaha lang be marulak-ulakan uhur-Hu. [42]

¹²Sapartolu humbam matei do buaton ni sampar anjaha matei gayuran i tongah-tongahmu; sapartolu radag ibahen podang inggot bam, anjaha na sapartolu nari erapon-Ku do bani ganup deisa, anjaha podang do Husintak hun pudi ni sidea. [43]

¹³Jadi das ma gilang-Ku, mangonai ma ringis-Ku bani sidea, gabe sombuh Huahap; jadi botohon ni sidea ma, paboa Ahu do Jahowa na marsahap ibagas gilang-Ku, bani na Hupasogop ringis-Ku bani sidea. [44]*

¹⁴Anjaha bahenon-Ku do ho tarulang, anjaha gabe siapason i tongah-tongah ni bangsa-bangsa na manlioti ho, ampa i lobei ni halak na montas hun bam. [45]

¹⁵Tongon, gabe siapason ampa sipahirion, gabe lumba-lumba ampa songgot-songgot do ho bani bangsa-bangsa na manlioti ho, bani na Hudabuh uhum bam ibagas gila pakon ringis ampa pinsang-pinsang na parah. (Ahu, Jahowa do na manluarhon ai), [46]

¹⁶bani na Husiorhon bam panah ni lohei maningting, na laho mansedahon; Ahu do na maniorhon ai laho mansedahon hanima, bani na Hutambahi lohei na parah bennima anjaha Huparseda parbohalannima. [47]

¹⁷Tongoskonon-Ku do bannima lohei ampa binatang-binatang, na manoroh hun bannima dakdanaknima; sampar ampa daroh niduruskon do masa bannima; parohon-Ku do podang bannima, Ahu do Jahowa na mangkatahon ai.” [48]