Read Batak Simalungun HESEKIEL 6 Bible Online

HESEKIEL 6 - Batak Simalungun bible

HESEKIEL 6

¹Dob ai roh ma hata ni Jahowa hu bangku,

²“Ale anak ni jolma, dompakkon ma bohimu hu dolog-dolog ni Israel anjaha manjahai ma ho dompaksi, [49]

³hatahon ma, ʻAle dolog-dolog ni Israel, tangihon ma hata ni Tuhan Jahowa. Sonon do hata ni Tuhan Jahowa dompak sagala dolog ampa buntu-buntu, dompak lombang bagas ampa habungan: Tonggor ma, parohon-Ku ma bannima podang, gabe parsedaon-Ku ma panumbahannima bani ianan na gijang.

⁴Maningon parsedaon do anjapanjapnima anjaha parropukon-Ku anjapanjap pardahupaannima; anjaha rasei bahenon-Ku halak na binunuh humbennima i lobei ni gana-gananima. [50]

⁵Sampakkonon-Ku do bangkei ni halak Israel i lobei ni gana-gana ni sidea, anjaha erapon-Ku do holi-holinima liot anjapanjapnima.

⁶Bani haganup ianannima parsedaon do sagala huta anjaha parreongon panumbahannima bani ianan na gijang, ase seda anjaha marumbak anjapanjapnima, maropuk anjaha mangkabolah gana-gananima, hona rumbakkon anjapanjap pardahupaannima, anjaha bois na pinaulinima.

⁷Radag ma halak na tarbunuh i tongah-tongahnima, gabe botohonnima ma, Ahu do Jahowa.

⁸Tapi paturuton-Ku do deba manggoluh hun bannima, na maluah humbani podang i tongah-tongah ni bangsa-bangsa, bani na Huerap ai hanima i nagori-nagori ai. [51]

⁹Sidea na maluah ai, ingaton ni sidea ma Ahu i tongah-tongah ni bangsa-bangsa, pambuangan bani sidea, dob Huropuki uhur parbangkison ni sidea ai, na manlembang hun Bangku, sonai mata parbangkison ni sidea ai, na mangkawah bani gana-gana ni sidea; gabe magigi ma sidea mangidah diri ni sidea sandiri, halani hajahaton na hinorjahon ni sidea, halani habutakon ni sidea ai. [52]

¹⁰Anjaha botohon ni sidea ma, Ahu do Jahowa, seng hape na so marhala Hulumbahon hamagouan sibahenon-Kai bani sidea.”

¹¹Sonon do hata ni Tuhan Jahowa, “Martopap ma ho, injak-injakkon ma naheimu, anjaha hatahon ma, ʻMagou ma!ʼ Halani haganup hasamboron na hinorjahon ni halak Israel ai maningon rasei do sidea bahenon ni podang, lohei pakon sampar.

¹²Ise na daoh matei do bahenon ni sampar, anjaha ise na dohor matei do bahenon ni podang, anjaha ise na tading anjaha na bansah matei gayuran do. Sonai ma padalanon-Ku ringis-Ku bani sidea.

¹³Jadi tandaonnima ma, Ahu do Jahowa, anggo radag ma na rasei humbani sidea i tongah-tongah ni gana-gana ni sidea, inggot bani anjapanjap ni sidea, i atas ni ganup buntu-buntu, bani pakpak ni sagala dolog, i toruh ni ganup hayu na maratah, i toruh ni ganup jajabi na matabun, bani ganup panutungan dahupa i lobei ni gana-gana ni sidea. [53]

¹⁴Anjaha pagostongon-Ku do tangan-Ku dompak sidea laho mambahen tanoh ai halong anjaha tarulang, bani haganup ianan ni sidea, hun halimisan nari das hu Ribla. Jadi botohon ni sidea ma, Ahu do Jahowa.” [54]