Read Batak Simalungun HESEKIEL 7 Bible Online

HESEKIEL 7 - Batak Simalungun bible

HESEKIEL 7

¹Dob ai roh ma hata ni Jahowa hu bangku mangkatahon,

²“Ho ale anak ni jolma, sonon do hata ni Tuhan Jahowa pasal tanoh ni Israel: Na roh ma ujungni, ujung ni suhi-suhi na ompat ni tanoh in.

³Sonari ma roh ajal ai bam, pasogopon-Ku ma ringis-Ku bam, anjaha uhumon-Ku ho romban hubani parlahoumu; anjaha pinsangon-Ku ho halani haganup hasamboronmu.

⁴Seng maidop matang-Ku mangidah ho, seng holong atei-Hu, tapi uhumon-Ku do ho romban hubani parlahoumu, anjaha manginsonoh i tongah-tongahmu hasamboronmu, jadi tandaonmu ma, Ahu do Jahowa.”

⁵Sonon do hata ni Tuhan Jahowa, “Mardapot-dapot do roh hasedaon.

⁶Na roh ma ujungni, ujungni domma roh; domma puho na mandorab ho. Tonggor ma, roh ma!

⁷Roh ma hasedaonmu ale pangisi ni tanoh in; domma roh panorangni, domma dohor ari ai, ari hageoron, sedo ari olob-olob, i atas dolog-dolog. [55]

⁸On pe barah ma duruskonon-Ku ringis-Ku bam, anjaha padason-Ku gilang-Ku bam, anjaha uhumon-Ku ho romban hubani parlahoumu, anjaha mangonai bam bahenon-Ku haganup hasamboronmu.

⁹Seng maidop matang-Ku mangidah ho, seng holong atei-Hu, tapi uhumon-Ku do ho romban hubani parlahoumu, anjaha manginsonoh i tongah-tongahmu hasamboronmu. Jadi tandaonnima ma, Ahu do Jahowa sipanlonsing.

¹⁰Tonggor ma, ari ai! Tonggor ma, roh ma! Martunas do hagedukon, marbunga pangenjengon. [56]

¹¹Timbul do siunsagahkon gogoh bahen lonsing-lonsing bani hajahaton. Seng dong be na tading humbani sidea, sonai humbani habayakon ni sidea, atap humbani hadoharonni, salpu do haganup hasangapon ni sidea. [57]

¹²Domma roh panorangni, dohor ma ari ai. Ulang ma marmalas ni uhur sipamboli anjaha jundoh sipanjual, ai gajag ni ringis do na mangonai bani haganup hadoharonni.

¹³Seng ulakan ni sipanjual be marjualan, age pe manggoluh ope sidea; ai seng tarolati be ringis dompak hadoharon ni sidea ai, anjaha seng dong be na boi manjolomi goluhni halani hajahaton ni sidea. [58]

¹⁴Isompul pe tarompit, anjaha domma sirsir haganup ibahen, tapi seng dong na borani bingkat hu parporangan, ai domma sogop ringis-Ku dompak haganup hadoharon ni sidea.

¹⁵I darat, podang do na manraseihon, i huta, sampar pakon lohei, halak na i juma matei do ibahen podang, halak na ibagas huta bois do bahenon ni sampar pakon lohei.

¹⁶Anjaha anggo adong na maluah, bani dolog-dolog ma sidea ai, haganup hutur-hutur songon kuhui i habungan, halani hajahaton ni sidea bei.

¹⁷Haganup do tangan galek, anjaha haganup towod hitir-hitir. [59]

¹⁸Marhiou guni do sidea, anjaha hagobiron manrongkob sidea; habadoron do bani bohi ni sidea, anjaha hona palpal ganup ulu ni sidea. [60]

¹⁹Ipansampakkon sidea do pirakni hu alaman, anjaha omas ni sidea ihira songon tompoh-tompoh; ai seng boi pirak ampa omas ni sidea paluahkon sidea bani ari ringis ni Jahowa; seng tarpasombuh sidea loheini atap targoki sidea boltokni marhitei ai. Ai do na mambahen jomba sidea ibagas hajahaton ni sidea. [61]

²⁰Ugas-ugas ni sidea na jenges ai do mambahen gijang uhur ni sidea, ipauli sidea do hunjai gana-gana ni sidea sihagigihononkon ai; halani ai do ase gabe tompoh-tompoh ai bani sidea Hubahen.

²¹Ondoskonon-Ku do ai bani halak na legan gabe sirampason ampa bani halak parjahat na i tanoh on gabe sitabanon; butakon ni sidea ma ai.

²²Padaohon-Ku do bohing-Ku humbani sidea, ai ibutaki sidea do ianan-Ku na pansing in; jadi masukan ni panamun ma hubagas anjaha pabutakon ni sidea ma ai,

²³hitir anjaha sursar ma bahenon ni sidea ai. Ai gok panduruson daroh do tanoh ai anjaha gok odoh-odoh do huta ai.

²⁴Jadi parohon-Ku ma bangsa sijahatan humbani bangsa-bangsa, laho mambuati rumah ni sidea, parontihonon-Ku ma pangenjengon ni sidea ai, anjaha gabe butak ma ianan ni sidea na mapansing ai.

²⁵Habiaran do na roh, mangindahi haluahon do sidea, hape seng jumpahsi.

²⁶Mardapot-dapot do roh hamagouan, mardapot-dapot do roh barita na masambor. Manungkun panjahaion do sidea humbani nabi, tapi seng dong be pangajarion bani malim ampa podah bani pangintuai-pangintuai. [62]

²⁷Marhoru do raja, mandolei kopala-kopala, anjaha margonggong do tangan ni halak na i nagori in halani biarni. Domu hubani parlahouni do Hubahen hubani sidea, anjaha Huuhumi sidea domu hubani na patut jaloonni; jadi botohon ni sidea ma, Ahu do Jahowa.”