Read Batak Simalungun HESEKIEL 8 Bible Online

HESEKIEL 8 - Batak Simalungun bible

HESEKIEL 8

¹Dob ai bani tahun paonomkon, bani bulan onom, ari lima bulan ai, sanggah hundul ahu i rumahku anjaha sintua-sintua ni Juda hundul i lobeihu, jadi sogop ma hu bangku tangan ni Jahowa. [63]

²Jadi sanggah mangkawah ahu, tonggor ma, adong do sada na marrupa songon jolma, humbani na songon binongeini ai idahon hu toruh, songon apuy do, tapi humbani binongeini ai hu atas marsinalsal do songon tombaga na marlinang-linang. [64]

³Jadi isurdukkon ma songon sada tangan, anjaha itangkap ma ahu bani jambulanku; iangkat Tonduy ai ma ahu hu tongah-tongah ni tanoh pakon langit, anjaha iboan ma ahu ibagas pangungkabon na humbani Naibata hu Jerusalem, bani horbangan ni alaman parbagas ai, na hampit utara; ai ma hajongjongan ni gana-gana, na patubuh simburu ni Jahowa. [65]

⁴Anjaha tonggor ma, jongjong do ijai hamuliaon ni Naibata ni Israel songon panonggoran na huidah i pamah ai. [66]

⁵Anjaha nini ma dompak ahu, “Ho ale anak ni jolma, kawahkon ma dompak utara!” Jadi mangkawah ma ahu dompak utara, anjaha tonggor ma, hampit utara ni horbangan ai, ijai do jongjong anjapanjap gana-gana, na patubuh simburu ni Jahowa.

⁶Jadi nini ma hu bangku, “Ho ale anak ni jolma, ididah ho do na binahen ni sidea ai? Hagigi banggal do na binahen ni ginompar ni Israel ijon, na mambahen misir Ahu humbani ianan-Ku na pansing in.”

⁷Jadi iarahkon ma ahu hu horbangan ni alaman ai, anjaha sanggah mangkawah ahu, tonggor ma, adong do sada lubang bani dingding.

⁸Dob ai nini ma dompak ahu, “Ho ale anak ni jolma, bahen ma lubang i dingding ai!” Jadi sanggah na mambahen lubang ai ahu i dingding ai, tonggor ma, adong do sada pintu.

⁹Nini ma hu bangku, “Masuk ma ho, anjaha tonggor ma hagigi na binahen ni sidea ijai.”

¹⁰Jadi masuk ma ahu anjaha hukawahkon ma; jadi tonggor ma, gombaran ni bagei-bagei ni sihagigihononkon, gilok-gilok, binatang ampa haganup naibata ni halak Israel, iuhirhon bani dingding ai inggot. [67]

¹¹Anjaha i lobei ni ai, jongjong do pitu puluh halak humbani pangintuai-pangintuai ni Israel, rap pakon si Jaasania, anak ni si Sapan, i tongah-tongah ni sidea. Ganup sidea manjolom pardahupaan ibagas tanganni, anjaha timus ni dahupa ai martimpul do hu atas.

¹²Jadi nini ma dompak ahu, “Ale anak ni jolma, ididah ho do na binahen ni pangintuai-pangintuai ni halak Israel ai ibagas na golap ai, ganup ibagas kamarni na margambaran ai?” Nini sidea, “Seng ididah Jahowa hita, domma itadingkon Jahowa nagori in!” [68]

¹³Nini ope hu bangku, “Idahonmu ope hagigi sibanggalan na hinorjahon ni sidea.”

¹⁴Dob ai iarahkon ma ahu bani horbangan parutara ni rumah ni Jahowa, anjaha tonggor ma, adong do ijai naboru-naboru manangisi si Tammus.

¹⁵Jadi nini ma dompak ahu, “Domma ididah ho ai, ale anak ni jolma? Idahonmu ope sibajankonon ni ai.”

¹⁶Dob ai iarahkon ma ahu hu alaman parbagas ni rumah ni Jahowa, anjaha tonggor ma, bani labah ni rumah ni Jahowa, i holang-kolang ni surambih ampa anjapanjap ai, adong do ijai hira-hira dua puluh lima halak dalahi, tundal bani rumah ni Jahowa, idompakkon hu hapoltakan, marsombah bani mata ni ari, dompak hapoltakan. [69]

¹⁷Dob ai nini ma dompak ahu, “Domma ididah ho in, ale anak ni jolma? Hampung ni in uhur ni ginompar ni Juda mambahen na mabajan sonin ijon, gabe igoki sidea do tanoh in bani odoh-odoh, anjaha ipuhoi ringis-Ku. Tonggor ma, inahkon sidea do ranting-ranting bani igung ni sidea.

¹⁸Halani ai, padalanon-Ku ma ringis-Ku bani sidea; seng maidop be matang-Ku mangidah sidea, anjaha seng be holong atei-Hu; ipamaling sidea pe sorani bani pinggol-Hu, seng tangihonon-Ku be sidea.” [70]