Read Batak Simalungun HESEKIEL 9 Bible Online

HESEKIEL 9 - Batak Simalungun bible

HESEKIEL 9

¹Dob ai ipamaling ma sorani i lobei ni pinggolhu, “Padohor hanima ma ale sidalankon uhum bani huta on, ganup marsinjata sipangagou ibagas tanganni!

²Anjaha tonggor ma, roh ma onom halak humbani horbangan parhuluan na hampit utara, ganup marsinjata sipangagou ibagas tanganni; anjaha rap pakon sidea adong do sada dalahi na marhiou silopak, na marparugas panurat bani binongeini. Jadi roh ma sidea anjaha jongjong ma i lambung ni anjapanjap tombaga ai. [71]

³Jadi naik ma hamuliaon ni Naibata ni Israel humbani herub ai, hasogopanni ai, hu onjolan ni labah ni rumah ai, anjaha dilo-dilo ma Ia bani dalahi na marhiou silopak ai, na marparugas sipanurat bani binongeini.” [72]

⁴Nini Jahowa ma dompaksi, “Dalani ma huta Jerusalem in, anjaha bahen ma tanda bani pardompakan ni halak na morong-orong anjaha na marhoih-koih halani haganup hasamboron na idalankon i tongah-tongahni.” [73]

⁵Tapi bani halak na legan ai nini do hubogei, “Siari hanima ma huta in, irik i pudini, anjaha bunuhi ma! Ulang maidop matanima, anjaha ulang adong na marholong ni atei!

⁶Bunuhi ma anjaha boiskon ma: na ubanon, garama, anak boru, anak-anak ronsi parinangon; tapi halak na adong tanda ai, ulang kahua! Pungkah ma humbani ianan-Ku na mapansing in!” Jadi ipungkah sidea ma humbani sintua-sintua na i lobei ni Rumah Panumbahan ai. [74]

⁷Dob ai nini ma dompak sidea, “Butaki hanima ma Rumah Panumbahan in, anjaha goki ma alaman in bani halak na tarbunuh. Dob ai luar ma, anjaha ibagas huta in ma hanima mamunuhi.”

⁸Jadi sanggah na mamunuhi ai sidea, anjaha tading sahalak ahu, manrogop ma ahu lanjar doruh-doruh, “Ham Tuhan Jahowa, ai boiskonon-Mu do haganup teba-teba ni Israel bani na niduruskon-Mu in ringis-Mu bani Jerusalem?” [75]

⁹Jadi nini ma mambalosi ahu, “Buei tumang do salah ni halak Israel ampa Juda; gok daroh na madurus do tanoh in, anjaha gok hagedukon do huta in. Nini sidea do, ʻDomma itadingkon Jahowa tanoh in, seng ikawahkon be in.ʼ [76]

¹⁰Halani ai, Ahu pe seng maidop matang-Ku anjaha seng holong atei-Hu, tapi balaskonon-Ku do pambahenan ni sidea ai bani ulu ni sidea.”

¹¹Anjaha tonggor ma, dalahi na marhiou silopak ai, na marparugas panurat ai bani binongeini, mulak ma patugahkon, nini, “Domma hudalankon songon na pinarentahkonmu bangku.”