Read Batak Simalungun DANIEL 11 Bible Online

DANIEL 11 - Batak Simalungun bible

DANIEL 11

¹Ia ahu, sanggah tahun parlobei dob raja si Darius, halak Madai ai, jongjong do ahu i lambungni mangurupi anjaha mampargogohisi.

²Sonari pe patugahonku ma bam na tarsurat ibagas buku hasintongan ai, “Tonggor ma, bangkit do use tolu halak raja i Persia, tapi na paompatkon ai bayakan do ai marimbang haganup sidea ai. Dob gabe margogoh ia halani habayakonni, iharah ma haganup laho mangimbang harajaon Gorik.” [143]

³Jadi timbul ma sada raja na markuasa, na manrajai sada harajaon na bolag, na mandalankon rosuh-rosuhni.

⁴Tapi anggo timbul tumang ma ia, mabolah ma harajaonni ai anjaha hona bagi mangihutkon deisa na ompat in; seng bani ginomparni ondos ai, anjaha seng songon gomgoman na ginomgomanni hinan be ai, ai maningon parsedaon do harajaonni ai anjaha halak na legan ma gabe simada ai. [144]

⁵Dob ai lambin margogoh ma raja na i dangsina ai, tapi sada humbani puanglimani gabe gogohan do hun bani, anjaha gabe banggal do harajaonni ai.

⁶Dob piga-piga tahun mambahen parpadanan ma sidea; roh ma boru ni raja na hun dangsina ai mangayaki raja na i utara ai mambahen pardameian, tapi seng tarjolomisi kuasani, anjaha ginomparni pe seng manahan; hona ondoskon do ia, sonai homa na pataruhkonsi, anakni sada ampa na mambuatsi.

⁷Bani panorang ai ipabangkit raja do sada halak humbani sindohor ni boru ni raja ondi manggantih bapani; roh ma ia mamorang bala ai anjaha imasuki ma benteng ni harajaon parutara ai, ipatuduhkon ma gogohni bani sidea lanjar ipatunduk.

⁸Iboan ma hu Masir naibata-naibata ni sidea rap pakon gana-gana tinuang ni sidea, ugas-ugas pirak ampa omas na maharga gabe taban-taban; anjaha seng be iporang raja parutara ai ibagas piga-piga dokah.

⁹Dob ai roh ma raja parutara ai mammasuki harajaon pardangsina ai, tapi mulak sonin do ia hu tanohni.

¹⁰Dob ai roh ma anakni marugas laho marporang, ipatumpu ma balani marhulan-hulan; laho ma ia, irungkub ma ai songon bah banggal anjaha ilontas; iulaki ma use mamorang ai das bani benteng-bentengni.

¹¹Marah ma raja pardangsina ai, bingkat ma ia laho marporang dompak raja na i utara ai. Jadi ipatumpu ma balani marhulan-hulan, tapi talu anjaha ripas do balani ai.

¹²Dob hona taluhon na marhulan-hulan ai, gijang ma uhurni; marlaksa-laksa do ibunuh, tapi seng torus monang ia.

¹³Ai iulaki raja parutara ai do pajongjong bala, bueinan marimbang na parlobei ai; dob salpu piga-piga tahun roh ma ia marhasoman bala na banggal ampa buei parsadiaan.

¹⁴Bani panorang ai buei ma na marbalik manlawan raja pardangsina ai; halak na jungkat pe humbani bangsamu manlawan do laho manggoki pangungkabon ai, tapi ipatunduk do sidea.

¹⁵Anjaha roh ma raja parutara ai, ipajongjong ma hubuan anjaha italuhon ma sada huta na pinatoguh. Ia bala pardangsina ai seng manahan sidea, age bala pilihanni ai; tongon, seng adong kuasa na manahan jongjong.

¹⁶Jadi ibahen na roh mangimbangsi ai ma domu hu bani rosuh-rosuhni anjaha seng dong na tahan jongjong i lobeini; imasuki ma tanoh na majenges in, anjaha tunduk ma in hutoruh ni tanganni. [145]

¹⁷Dob ai isurahon uhurni ma sihol pajonamkon kuasani bani haganup gomgomanni; ibahen ma pardearan hu bani, ibere ma boruni gabe jolmani, laho mansedahonsi; tapi seng saud anjaha seng jadi sura-surani ai.

¹⁸Dob salpu ai idompakkon ma hubani nagori-nagori na i topi ni laut, anjaha patundukonni do buei hunjai; tapi roh ma sada puanglima parontihon asup-asupni ai, hubani tene mangonai bahenonni asup-asupni ai.

¹⁹Dob ai itujuhon ma bohini dompak benteng-bentengni na i tanohni sandiri, tapi jomba ma ia anjaha dabuh, anjaha lanjar seng jumpah be.

²⁰Dob ai bangkit ma gantihni sada halak, na marsuruh sada halak sipatumpu guguan hu nagori na majenges ai; tapi seng pala piga dokah bois ma ia, sedo binahen ni ringis atap porang.

²¹Bangkit ma na manggantihsi sada halak na mahiri, na so patut namin haondosan ni harajaon ai; na so niagak ni uhur do ia roh, gabe ibuat ma harajaon ai bani marhitei akal-akal. [146]

²²Talu do i lobeini sagala bala na roh marhulan-hulan ai mandorabsi, sonai homa kopala ni parpadanan ai.

²³Anjaha dob ibahen parjanjian pakonsi idalankon ma sipaoto-oto; jadi lambin margogoh ma ia marhitei jolma na otik.

²⁴Na so panagaman masuk ma ia hu nagori na tang sibayakan, idalankon do na so binahen ni bapani atap ompungni; ibagihon do i tongah-tongah ni sidea rampasan, taban-taban ampa ugas-ugas. Ibahen ranggian mambuat benteng-benteng, tapi tongkin hansa.

²⁵Jadi ipabulat ma gogohni pakon uhurni mamorang dompak raja na i dangsina marhasoman bala na buei; raja na hun dangsina pe roh ma marporang marhasoman bala na buei anjaha na gogoh, tapi seng tahan ia, halani partahi-tahian na binahen hu bani.

²⁶Gari halak na tong rap mangan pakonsi parsedahonsi, gabe hona pardakdak ma balani, anjaha buei tumang rasei.

²⁷Ia raja na dua ai, na masambor do ipingkiri sidea bei; rap mangan pe sidea marsioto-otoan do, tapi seng manjadi; ai ujung ni ai, sihol masa ope ai bani panorang na dob binuhul.

²⁸Anjaha mulak ma ia hu nagorini mamboan buei arta, tapi uhurni sihol manlawan parpadanan na mapansing ai do. Ipasaud ma ai, dob ai mulak ma ia hu tanohni sandiri.

²⁹Bani panorang na binuhul mulak ma ia, anjaha imasuki ma tanoh dangsina ai, tapi anggo sahali on seng songon na parlobei ondi be.

³⁰Ai roh ma kapal hun Kittim manlawansi, gabe mabiar ma ia lanjar mulak; manringis ma ia gabe ipapuas ma ai dompak parpadanan na pansing in, anjaha manriah ma ia pakon halak na dob manadingkon parpadanan na pansing in. [147]

³¹Roh ma balani pabutakkon ianan na pansing in ampa bentengni, anjaha iparontihon ma galangan ari-ari. Ipajongjong sidea ma gana-gana hagigi, na majangin ai. [148]

³²Ibahen ma marbalik halak silanggar parpadanan ai marhitei hata lemes-lemes; tapi anggo bangsa na mananda Naibata, totap do jongjong anjaha marsijoloman.

³³Anjaha halak na pentar i tongah-tongah ni bangsa ai mambahen buei halak maruhur, age pe rasei sidea ibahen podang, apuy, tutupan ampa na hona rampas, ibagas piga-piga dokah. [149]

³⁴Sanggah laho talu sidea dapot partolongan do sidea otik, tapi buei do halak na marsipakulah-kulah mangihutkon sidea.

³⁵Deba humbani halak na pentar ai rasei do, laho papitahkon sidea, paborsihkon ampa paputihkon, das bani panorang parujungan; ai maningon masa ope na sonai das bani panorang na dob binuhul. [150]

³⁶Ibahen raja ai do domu hubani rosuh ni uhurni, ipagijang anjaha ipatimbul do dirini i atas ni sagala naibata, anjaha jungkat do parsahapni dompak Naibata Sitimbulan in. Sai monang do ia, paima gok ringis ai, ai barang aha na dob tinontuhon maningon saud do. [151]

³⁷Seng parduli ia bani naibata ni ompungni, atap naibata na hinaholongan ni naboru; seng parduli ia bani naibata na legan, ai ipagijang do dirini i atas ni haganupan ai. [152]

³⁸Tapi gantih ni ai, ipasangap do naibata ni benteng-benteng; ipasangap do sada naibata na so tinanda ni ompungni, marhitei omas, pirak, batu intan ampa sibere-bere na maharga. [153]

³⁹Ibahen ma naibata na legan ai gabe parondosan ni benteng-benteng na toguh ai; halak na mambalosisi ipasangap do ai; ipabangkit do sidea manrajai buei halak, anjaha ibagihon do bani sidea nagori ai bahen upah.

⁴⁰Bani panorang marayak ujungni marsidoraban ma ia pakon raja na i dangsina; roh ma raja na hun utara ai mandorabsi songon halisungsung, marhitei gareta porang ampa siparhuda ampa buei kapal, roh ma ia mammasuki nagori-nagori, irungkub anjaha ilontas ma ai. [154]

⁴¹Das do ia hu tanoh na marmulia ai. Marlaksa-laksa do halak na rasei bahenonni, tapi maluah do hun tanganni anggo on: Edom pakon Moab ampa sabagian banggal humbani halak Amon. [155]

⁴²Ipagostong do tanganni manlawan nagori-nagori ai, anjaha seng maluah tanoh Masir hun bani.

⁴³Gok bani do sagala arta omas, pirak ampa haganup arta na maharga i Masir; Libia pakon Etiopia pe mangihut do hu bani.

⁴⁴Tapi tarsonggot ma ia bahenon ni barita na hun hapoltakan ampa na hun utara, jadi bingkat ma ia ibagas gila laho manraseihon ampa mamboiskon buei halak.

⁴⁵Jadi ipasuk ma lampolampo harajaonni ai i holangkolang ni laut ai ampa dolog na mapansing na marmulia ai; tapi jumpah ma ajalni, sahalak pe lang dong na mangurupisi.” [156]