Read Batak Simalungun DANIEL 3 Bible Online

DANIEL 3 - Batak Simalungun bible

DANIEL 3

¹Isuruh Raja Nebukadnesar ma na pauli sada gana-gana omas, gijangni onom puluh asta anjaha bolagni onom asta; ipajongjong ma ai i pamah Dura, na i Propinsi Babel.

²Dob ai isuruh Raja Nebukadnesar ma na patumpuhon raja-raja, wakil raja, kopala-kopala, puanglima, sijolom parduiton, panguhum, gamot-gamot ni ugama ampa sagala siparpangkat na bani ganup propinsi, ase roh bei hu pesta gana-gana, na pinajongjong ni Raja Nebukadnesar ai.

³Jadi martumpu ma sagala raja-raja, wakil raja-raja, kopala-kopala, puanglima, sijolom parduiton, panguhum, gamot-gamot ni ugama ampa sagala siparpangkat na bani ganup propinsi, laho mamestahon gana-gana, na dob pinajongjong ni raja Nebukadnesar ai, jadi jongjong ma sidea i lobei ni gana-gana, pinajongjong ni si Nebukadnesar ai.

⁴Jadi ipamaling sipartingting ai ma sorani maningtingkon: “Nasiam sagala bangsa, marga pakon siparsahap na marbagei-bagei, tangihon nasiam ma tingting on.

⁵Anggo ibogei nasiam sora ni tarompit, tulila, husapi, arbap, sordam, gonrang ampa parugas musik na marbagei in, maningon manrogop do nasiam laho marsombah bani gana-gana omas in, na dob pinajongjong ni Raja Nebukadnesar.

⁶Barang ise na so ra manrogop anjaha marsombah, maningon sampakononkon do ia hubagas pamurunan na gajag ai.” [25]

⁷Halani ai, dob ibogei sagala bangsa-bangsa ai sora ni tarompit, tulila, husapi, arbap ampa parugas musik na marbagei ai, jadi manrogop bei ma sagala bangsa, marga pakon siparsahap na marbagei-bagei ai, marsombah hubani gana-gana omas na dob pinajongjong ni Raja Nebukadnesar ai.

⁸Bani panorang ai roh ma deba halak Kasdim mangaduhon halak Jahudi,

⁹nini sidea ma dompak Raja Nebukadnesar, “Sai manggoluh ma ham tongtong rajanami. [26]

¹⁰Ale rajanami, domma iparentahkon ham, ase sagala jolma na mambogei sora ni tarompit, tulila, husapi, arbap, sordam, gonrang ampa parugas musik na marbagei in, maningon manrogop anjaha marsombah bani gana-gana omas in; [27]

¹¹barang ise na so ra manrogop anjaha marsombah, maningon sampakkononkon do bani pamurunan na gajag ai.

¹²Adong do nuan piga-piga halak Jahudi, na dob pinabangkitmu manrajai i Propinsi Babel, ai ma si Sadrak, si Mesak pakon si Abednego; ia dalahi-dalahi ai seng parduli sidea bani parentahmu ale rajanami, seng ra sidea manggalang bani sisombahonmu anjaha seng ra sidea marsombah bani gana-gana, na pinajongjong ai. [28]

¹³Jadi manggila anjaha manringis ma Nebukadnesar, anjaha iparentahkon ma na mamboan si Sadrak, si Mesak pakon si Abednego hu lobeini. Iboan sidea ma tongon na tolu halak ai hu lobei ni raja ai.

¹⁴Nini si Nebukadnesar ma dompak sidea, “Ai tongon do, ale Sadrak, Mesak pakon ho ale Abednego, na so ra hanima manggalang bani naibatangku, anjaha na so ra hanima marsombah bani gana-gana omas na dob hupajongjong ai?

¹⁵Ai pe anggo ibogei hanima holi sora ni tarompit, tulila, husapi, arbap, sordam, gonrang pakon parugas musik na marbagei in, manrogop anjaha marsombah ma hanima bani gana-gana na dob hupaturei ai; tapi anggo seng ra hanima marsombah, mintor do sampakkononkon hanima hubagas pamurunan na gajag ai; dob ai idahon ma tongon atap naibata ja do na boi paluahkon hanima humbagas tanganku.” [29]

¹⁶Jadi ibalosi si Sadrak, si Mesak pakon si Abednego ma raja ai, “Ale Raja Nebukadnesar, seng pala marbalos hanami bamu pasal ai.

¹⁷Anggo marosuh Naibata, na binalosannami ai, boi do tarpaluahsi hanami humbagas pamurunan na gajag ai ampa humbani tanganmu, ale rajanami. [30]

¹⁸Tapi porini pe lang marosuh Ia, botoh ham ma, ale rajanami, na so ra do hanami manggalang bani naibatamu atap marsombah bani gana-gana omas, na dob pinajongjongmu ai.” [31]

¹⁹Jadi manggila tumang ma Raja Nebukadnesar, pala do mubah bohini mangidah si Sadrak, si Mesak pakon si Abednego. Ihatahon ma pamilason pamurunan ai pitu hali lompit humbani na somal.

²⁰Ihatahon ma humbani piga-piga halak tentarani sigogohan manangkut si Sadrak, si Mesak pakon si Abednego, laho manampakkon sidea hubagas pamurunan na gajag ai.

²¹Jadi isangkut ma na tolu halak ai marmantel, marsaluar, martangkuluk, sirsir marpakeian tene, lanjar isampakkon ma sidea hubagas pamurunan na gajag ai.

²²Halani koras ni parentah ni raja ai ampa milas ni pamurunan ai, jadi ibunuh gara ni pamurunan ai ma dalahi-dalahi ai, na manampeihon si Sadrak, si Mesak ampa si Abednego hu atasni ai.

²³Ia sitolu halak ai, si Sadrak, si Mesak pakon si Abednego, sangkut do madabuh hubagas pamurunan na gajag ai. [32]

²⁴Jadi tarsonggot ma uhur ni Raja Nebukadnesar, tarolos ma ia jongjong, anjaha nini ma dompak juakjuakni, “Ai lang tolu halak do tarsangkut isampakkon hita hubagas apuy ai?” nini sidea ma mambalosi raja ai, “Sonai do tongon, ale rajanami!”

²⁵Balosni, “Tapi tonggor ma, ompat halak do huidah, lang tarsangkut, mardalan-dalan ibagas apuy ai, anjaha seng mahua sidea; rupa ni na paompatkon ai usih do hubani anak ni naibata.” [33]

²⁶Idohori si Nebukadnesar ma labah ni pamurunan na gajag ai, anjaha nini ma, “Ale Sadrak, Mesak pakon ho ale Abednego, juakjuak ni Naibata Na Tang Sitimbulan in, mandarat ma nasiam, roh ma hujon!” Jadi mandarat ma si Sadrak, si Mesak pakon si Abednego humbagas apuy ai.

²⁷Jadi martumpu ma raja-raja, wakil raja, kopala-kopala ampa sipanuturi ni raja ai, gabe ididah sidea ma, na so margogoh apuy ai mangkahua angkula ni dalahi-dalahi ai; seng mosog jambulan na bani ulu ni sidea, seng mahua mantel ni sidea, anjaha bau ni apuy pe seng dong taranggoh bani sidea. [34]

²⁸Jadi nini si Nebukadnesar ma, “Na puji ma Naibata ni si Sadrak, si Mesak pakon si Abednego, na marsuruh malekat-Ni laho paluahkon juakjuak-Ni, na martenger ni uhur Bani, na pag manjua parentah ni raja, na pag mangajamkon dirini, asal ma ulang mambalosi atap marsombah bani naibata na legan sobali Naibatani. [35]

²⁹Halani ai huparentahkon ma, barang ise humbani bangsa, marga, parsahap na marbagei-bagei in, na mangkatahon risa-risa dompak Naibata ni si Sadrak, si Mesak pakon si Abednego maningon toktokan do ai anjaha parreongon rumahni; ai seng dong Naibata, na boi paluahkon songon-Si ai.” [36]

³⁰Jadi naik pangkat ma si Sadrak, si Mesak pakon si Abednego i Propinsi Babel ibahen raja ai.