Read Batak Simalungun DANIEL 5 Bible Online

DANIEL 5 - Batak Simalungun bible

DANIEL 5

¹Ibahen Raja Beltsasar ma pesta mangan-mangan bani saribu halak na sangap-sangap, anjaha minum-minum anggur ma ia rap pakon sisaribu halak ai. [53]

²Sanggah na mabuk ai si Beltsasar ibahen anggur ai, ihatahon ma alopon panginuman omas pakon pirak, na binoan ni bapa ni si Nebukadnesar hun rumah panumbahan na i Jerusalem, ase minum hunjai raja ai ampa na sangap-sangap ai, puangbolon ampa nasipuang. [54]

³Jadi ialop sidea ma panginuman omas ampa pirak ai, na ibuat hinan hun rumah panumbahan na i Jerusalem, gabe minum ma hunjai raja ai ampa na sangap-sangap, puangbolon ampa nasipuang.

⁴Sanggah na minum anggur ai sidea, ipapuji-puji sidea ma naibata-naibata omas, pirak, tombaga, bosi, hayu, pakon batu.

⁵Lanjar bani na satongkin ai taridah ma jari-jari ni tangan ni jolma manurat bani tembok na hinapur, tontang parsuluhan banggal ai, ibagas rumah bolon ai; ididah raja ai do tangan na manurat ai.

⁶Jadi marposi ma bohi ni raja ai, anjaha gobir ipambibiari uhurni; galek ma binongeini anjaha hitir-hitir towodni.

⁷Ipamaling raja ai ma sorani mangkatahon ase ialop na pentar-pentar, halak Kasdim ampa sipartondung. Nini raja ai ma hubani halak na pentar-pentar na i Babel ai, “Barang ise na mambotoh mambasa surat on pakon patugahkon artini ai hu bangku, marbaju saholat ma ia bahenon, marsinongkok omas bani borgokni anjaha gabe raja paitolu ibagas harajaonku.” [55]

⁸Jadi roh ma haganup halak na pentar-pentar ai bani raja ai, tapi seng tarbasa sidea surat ai, atap tarpatugah sidea arti ni ai hubani raja ai.

⁹Gobir tumang ma raja ai, anjaha marposi bohini; bajoraon do homa na sangap-sangap ai.

¹⁰Masuk ma inang ni raja ai hu kamar parpestaan ai halani parsahapan ni raja ai pakon na sangap-sangap ai, nini ma, “Dokah ma manggoluh raja in! Ulang ma ipambibiari uhurmu ham anjaha ulang ma marposi bohimu. [56]

¹¹Adong do ibagas harajaonmu sada halak na niianan ni tonduy ni naibata-naibata na pansing ai. Sanggah panorang ni bapamu jumpah do bani haliharon, habotohon ampa hauhuron, songon na adong bani naibata-naibata, gabe ipabangkit Raja Nebukadnesar, bapamu ondi do ia gabe kopala ni halak na pentar-pentar, sipartondung, halak Kasdim ampa sibotoh parhalaan, [57]

¹²halani na jumpah ai bani tonduy na tarsulur, habotohon ampa hapantason laho manjujur nipi, laho patorangkon hutinta ampa pajoreihon na rundut, ai ma si Daniel, na ginoran ni raja ondi si Beltsasar. Ai pe dear ma idilo si Daniel, ase ipatugah arti ni ai.” [58]

¹³Jadi iboan ma si Daniel hu lobei ni raja ai. Nini raja ai ma dompak si Daniel, “Atene, ho do si Daniel, sada humbani halak Jahudi na tarbuang ai, na binoan ni bapa ondi hun Juda?

¹⁴Hubogei do pasal ho, ai ma na niianan ni Tonduy ni naibata-naibata na pansing ai do ho, anjaha jumpah do bam haliharon, habotohon ampa hapentaran na tarsulur.

¹⁵Domma iboan hu lobeihu halak na pentar-pentar ampa sipartondung, laho mambasa surat ai ampa laho patugahkon bangku pasal arti ni ai, tapi seng tarpatugah sidea arti ni ai.

¹⁶Tapi hubogei do boi do ho mambere panorangion ampa pajoreihon na rundut. Ai pe anggo tarbasa ho do surat in anjaha tarpatorang ho arti ni ai hu bangku, marbaju saholat ma ho bahenonku, anjaha marsinongkok omas bani borgokmu, anjaha gabe raja paitolu ma ho bahenonku ibagas harajaonku.”

¹⁷Jadi nini si Daniel ma mambalosi raja ai, “Soh bamu ma sibere-bere ai, anjaha bani halak na legan ma bere ham pamuji-mujianmu ai; hubasa pe surat ai bani raja in, anjaha artini ai hupatorang pe bamu.

¹⁸Ham rajanami, ibere Naibata Sitimbulan ai do bani bapamu si Nebukadnesar harajaon, habanggalon, hasangapon ampa hatunggungon. [59]

¹⁹Anjaha halani kuasa na binere ai bani, hitir anjaha mabiar do sagala bangsa ampa halak siparsahap na marbagei-bagei ai i lobeini, ai saguru bani uhurni do mamunuh jolma atap pagoluhkon, patimbulhon jolma atap mandabuhkon.

²⁰Tapi dob na ipagijang ai dirini, mangenjeng anjaha hengkeng uhurni, ipaturun ma ia humbani paratasni, anjaha hona buat humbani hasangaponni ai. [60]

²¹Hona usir do ia hun tongah-tongah ni jolma manisia, anjaha gabe maruhur songon binatang do ia, anjaha saianan do ia pakon halode harangan. Mangan poyon-poyon do ia songon lombu, marudan marmilas ni ari, paima iparhatongon uhurni, paboa Naibata Na Tang Sitimbulan ai do sigomgom harajaon ni jolma manisia, anjaha ipabangkit sipanrajai atap ise harosuh ni uhur-Ni. [61]

²²Tapi ham, ale Beltsasar, anakni, seng ra ham patoruhkon uhurmu, age pe ibotoh ham haganupan ai,

²³tapi tene lambin ipagijang ham do dirimu mangimbang Tuhan ni nagori atas. Tarboan do hu lobeimu parugas na hun Rumah-Ni ai, anjaha minum anggur do hunjai ham, halak na sangap-sangap, jolmamu ampa binuatmu na legan. Ipapuji-puji ham do naibata-naibata pirak, omas, tombaga, bosi, hayu pakon batu, na so marpangidah, marpanangar, atap marpambotoh, tapi anggo Naibata simada hosahmu anjaha siatur sagala dalanmu, seng ipasangap ham. [62]

²⁴Ia do na manongos tangan ondi ampa na manuratkon surat ai.

²⁵Anjaha on do surat na tarsurat ijai, ʻMene, Mene, Tekel, Uparsin.ʼ

²⁶On do arti ni hata ai, Mene: Domma ibilang Naibata panorang ni harajaonmu anjaha domma itontuhon ujungni ai.

²⁷Tekel: Domma itimbang ham ibagas timbangan, tapi mahampungtu do ham dapot.

²⁸Peres: Domma ibagi harajaonmu anjaha iberehon hubani halak Madai pakon Persia.”

²⁹Dob ai iparentahkon si Beltsasar ma, ase isorungkon baju saholat bani si Daniel, isinongkokkon sinongkok omas bani borgokni, anjaha itingtingkon ia ma raja paitolu ibagas harajaonni. [63]

³⁰Lanjar bani bornginni ai do matei tarbunuh si Beltsasar, raja ni halak Kasdim ai. [64]