Read Batak Simalungun DANIEL 6 Bible Online

DANIEL 6 - Batak Simalungun bible

DANIEL 6

¹Anjaha si Darius, halak Madai, ai ma gabe raja, sanggah na marumur ia onom puluh dua tahun. [65]

²Ihadearhon si Darius do mangangkat saratus dua puluh gubernur, ai ma na pinabangkitni bani haganup harajaon ai,

³anjaha na mangopalai ai tolu menteri do, si Daniel ma sada hunjai; bani sidea ma mambere partanggungjawaban gubernur ai, ase ulang maborattu urusan ni raja ai.

⁴Tapi atasan do si Daniel marimbang menteri ampa gubernur ai, ai adong do bani tonduy na tarsulur; jadi isurahon raja ai ma pabangkitkonsi gabe haondosan ni ganup harajaon ai. [66]

⁵Jadi ipindahi menteri ampa gubernur ai ma dalan laho mangaduhon si Daniel pasal na mardomu hubani harajaon ai; tapi seng adong jumpah sidea dalan laho mangaduhonsi atap hasalahan aha pe; ai bujur do ia, anjaha seng dong jumpah bani halepakon atap na salah pe.

⁶Jadi nini halak ai ma, “Seng anjai jumpah hita dalan laho mangaduhon si Daniel, anggo seng dapot hita ai humbani na marpardomuan bani titah ni Naibatani.”

⁷Jadi sariah ma roh menteri ampa gubernur ai bani raja ai, nini sidea ma, “Ham Raja Darius, sai manggoluh ma ham lalab! [67]

⁸Haganup menteri bani harajaon in, na sangap-sangap, gubernur, sipanuturi ampa puanglima domma mambahen haputusan, ase ibahen raja in paraturan ampa undang-undang, ase anggo adong halak na mambahen pangaduanni hubani naibata atap jolma ja pe, ibagas tolu puluh ari on, sobali hu bamu, ale rajanami, maningon timpalhononkon do ai hubagas liang ni singa.

⁹Halani ai ale rajanami, bahen ham ma paraturan anjaha totapkon ham ma surat, anjaha ulang mubah be ai domu hu bani undang-undang ni halak Madai pakon Persia.” [68]

¹⁰Jadi itotapkon Raja Darius ma paraturan ampa surat ai.

¹¹Ia si Daniel, dob ibogei pasal paraturan na dob tinotapkon ai, laho ma ia hu rumahni; adong do bani kamar pardatas ni rumahni, jandelani buha dompak Jerusalem; manrogop ma ia ijai tolu hali sadari, laho martonggo ampa mangkatahon tarima kasih bani Naibata, songon na somal ibahen na saindokah. [69]

¹²Jadi roh ma halak ai sariah hu rumah ni si Daniel, gabe dapot sidea ma ia martonggo anjaha marsombah i lobei ni Naibata.

¹³Dob ai roh ma sidea hu lobei ni raja ai, anjaha isahapkon sidea ma hubani pasal paraturan ondi, nini sidea ma, “Ale rajanami, ai lang domma itotapkon ham sada paraturan, paboa anggo adong atap ise na mambahen pangindoanni ibagas sitolu puluh ari on hu bani naibata atap jolma ja pe sobali hu bamu, ale rajanami, ai lang timpalhononkon do ai hubagas liang ni singa?” Nini raja ai ma mambalosi, “Totap do hata ai romban hubani undang-undang ni halak Madai pakon Persia, na so malo ubahon.” [70]

¹⁴Jadi nini sidea ma i lobei ni raja ai, “Ia si Daniel, ai ma sada halak humbani halak Jahudi na tarbuang ai, seng parduli ia bamu ale rajanami age bani surat larangan na dob tinotapkonmu ai; sai martonggo do tong ia tolu hali sadari.”

¹⁵Dob ibogei raja ai pasal ai, pusok ma uhurni, anjaha ipingkiri ma dalan laho paluahkon si Daniel; marpala-pala do ia ronsi sundut mata ni ari mangindahi dalan laho paluahkonsi.

¹⁶Jadi sariah ma halak ai roh bani raja ai, nini ma hu bani, “Botoh ham ma, ale rajanami, on do undang-undang bani halak Madai pakon Persia, paboa anggo paraturan atap larangan, na dob pinatotap ni raja, seng malo be paubahon ai.”

¹⁷Jadi ipadalan raja ai ma parentah, iboan ma si Daniel anjaha itimpalhon hubagas liang ni singa. Ihatahon raja ai do bani si Daniel, “Naibatamu, na binalosanmu tongtong, Ia ma paluahkon ho!” [71]

¹⁸Ambahni ai iboan halak ma sada batu anjaha ipajongjong ma ai bani labah ni liang ai, anjaha isap raja ai ma ai bani tintin sapni ampa marhitei tintin sap ni na sangap-sangap ai, ase ulang adong be atap aha marubah pasal si Daniel. [72]

¹⁹Mulak ma raja ai hu rumahni, anjaha marpuasa do ia layur sabornginni ai; seng ipalopas roh hubani halak sibahen halilian, lanjar do seng tarpodom matani.

²⁰Jadi girah sogod patar ni ai, puho ma raja ai, anjaha tarolos ma ia laho hu liang ni singa ai.

²¹Dob roh ia hundohor bani liang ai, dilo-dilo ma ia marhasoman sora na marhoru hubani si Daniel, nini ma hu bani, “Ale Daniel, juakjuak ni Naibata na manggoluh in, ai maluah do ho ibahen Naibata, na binalosanmu tongtong, humbani singa in?” [73]

²²Dob ai nini si Daniel ma mambalosi raja ai, “Sai manggoluh ma ham lalab, ale rajanami! [74]

²³Isuruh Naibatangku do malekat-Ni mangkuntam babah ni singa on, gabe seng ikahua sidea ahu, ai seng marsalah ahu i lobei-Ni, anjaha i lobeimu pe, ale rajanami, seng dong hubahen na salah.” [75]

²⁴Jadi malas tumang ma uhur ni raja ai, gabe iparentahkon ma na padaratkon si Daniel humbagas liang ai. Ipadarat ma tongon si Daniel humbagas liang ai, anjaha aha pe seng dong na mahua jumpah bani, halani hatengeran ia bani Naibata. [76]

²⁵Ipadalan raja ai ma parentah, jadi ialop ma haganup halak na mangaduhon si Daniel ai, anjaha itimpalhon ma hubagas liang ni singa ai, sidea, niombah ni sidea ampa jolma ni sidea. Lape das sidea bani dasor ni liang ai, domma itangkap singa ai sidea anjaha iparripuk holiholini.

²⁶Dob ai manongos surat ma raja Darius bani haganup bangsa ampa halak parsahap na marbagei-bagei ai, na marianan i sab tanoh ai, “Sai lambin martambah ma damei bani nasiam! [77]

²⁷Huparentahkon ma bani nasiam, ase bani haganup gomgomanku gobir anjaha marhabiaran halak i lobei ni Naibata ni si Daniel, ai Ia do Naibata na manggoluh, na manongtong ronsi sadokah ni dokahni. Harajaon-Ni pe seng anjai maseda ai, anjaha panggomgomion-Ni seng dong ujungni. [78]

²⁸Ia do na paluahkon pakon na mangurupi, ibahen do tanda ampa halongangan, i nagori atas pakon i tanoh on. Ia do na paluahkon si Daniel humbani kuasa ni singa.”

²⁹Jadi lambin mardohar ma si Daniel sadokah panrajaion ni si Darius ampa sadokah panrajaion ni si Kores, halak Persia ai. [79]