Read Batak Simalungun DANIEL 7 Bible Online

DANIEL 7 - Batak Simalungun bible

DANIEL 7

¹Bani tahun parlobei dob gabe raja si Beltsasar, raja ni Babel ai, marnipi ma si Daniel anjaha marpanonggoran bani Podomanni. Jadi isuratkon ma nipi ai, anjaha ipatugah pasal rimpunni. [80]

²Nini si Daniel ma, “Huidah do ibagas panonggoranku borngin-borngin, tonggor ma, lutu do laut bolag ai ibahen logou ni langit na ompat in. [81]

³Anjaha luar ma ompat binatang hun laut ai, palegan-legan bei do rupani. [82]

⁴Na parlobei songon singa anjaha marhabong do songon manuk-manuk nanggordaha. Hukawahkon ma ai, hona putputan ma habongni, tarangkat ma ai hun tanoh, anjaha ipajongjong bani dua naheini songon jolma; anjaha ibere do hubani uhur jolma. [83]

⁵Anjaha tonggor ma, binatang na legan, na paduahon, usih songon gipul, hundul bani nahei pudini do ia, anjaha adong do tolu rusuk ibagas babahni, i holangkolang ni iponni. Iparentahkon ma hu bani, ʻBingkat ma, pampangani ma buei daging!ʼ [84]

⁶Dob ai mangkawah ma ahu, tonggor ma binatang na legan, usih songon begu; adong do ompat habong ni manuk-manuk bani gurungni, anjaha ompat do ulu ni binatang ai, anjaha ibere do kuasa bani. [85]

⁷Dob ai huidah ma bani panonggoran bornginni ai, tonggor ma, binatang na paompatkon, bajan anjaha majangin anjaha gogoh tumang; adong do bani ipon bosi na banggal, mambonduti anjaha manropropi do ia, anjaha na tading ai iluntak do bani naheini. Legan do ai humbani binatang na parlobei ai, anjaha sapuluh do tandukni. [86]

⁸Hupardiatei ma tanduk ai, anjaha tonggor ma, tubuh ma tanduk na legan, na etek-etek i holangkolang ni ai; gabe mumpat ma i lobeini tolu tanduk humbani na parlobei ai, anjaha tonggor ma, adong do bani tanduk ai songon mata ni jolma ampa babah na mansahapkon pangenjengon. [87]

⁹Mangkawah ma ahu, gabe ipajongjong ma paratas, anjaha hundul ma hujai sada Na Adong Hun Bani Sapari; pakeian-Ni lopak do songon salju, anjaha jambulan bani ulu-Ni putih do songon ambulu ni biribiri; paratas-Ni apuy na marjimbur-jimbur, anjaha galapangni apuy na gajag. [88]

¹⁰Luar do sada bah apuy, marharorohan hun lobei-Ni. Marribu-ribu do na marugas i lobei-Ni, anjaha marlaksa-laksa jongjong i lobei-Ni. Ipungkah ma paruhuman anjaha ibuka ma sagala buku. [89]

¹¹Jadi mangkawah ma ahu halani hata pangenjengon na hinatahon ni tanduk ai. Anjaha huidah ma hona bunuh binatang ai, iboiskon bangkeini anjaha iondoskon ase itutungi bani apuy. [90]

¹²Ia binatang na legan ai, ibuat ma kuasani, anjaha ibuhul panorang ampa jam ni goluh ni sidea. [91]

¹³Huidah do bani pangungkabon borngin ai, tonggor ma, marhitei hombun ni langit roh do sada na songon anak ni jolma, das do ia hubani Na Adong Hun Bani Sapari, anjaha iboan do ia hu lobei-Ni. [92]

¹⁴Ibere ma hubani kuasa, hasangapon ampa harajaon, ase ia ma sibalosan ni sagala bangsa ampa halak siparsahap na marbagei-bagei in; sisadokah ni dokahni do kuasani, seng ra salpu ai, anjaha harajaonni, na so ra seda do ai. [93]

¹⁵Ia ahu, si Daniel, rusak do uhurhu ibagas, anjaha songgotan halani pangungkabon na huidah ai.

¹⁶Hudohori ma sada halak na jongjong ijai, anjaha husungkun ma ia pasal arti ni haganupan ai. Jadi marsahap ma ia hu bangku, anjaha ipatugah ma bangku artini ai, nini ma, [94]

¹⁷ʻIa binatang banggal na ompat ai, ompat harajaon do ai, na sihol jongjong i tanoh on.

¹⁸Tapi halak Na Mapansing ni Sitimbulan ai do sijalo harajaon ai, anjaha sidea do simada ai tongtong ronsi sadokah ni dokahni.ʼ [95]

¹⁹Dob ai ipindo uhurhu do sihol mambotoh hasintongan pasal binatang na paompatkon ai, na lain humbani na legan ai, majangin tumang, maripon bosi ampa marsisilon tombaga, na mamonduti anjaha na manropropi anjaha na manluntak-luntak na tading ai bani naheini. [96]

²⁰Sonai homa pasal tanduk na sapuluh ai, na i atas uluni ai, ampa tanduk na legan, na dob tubuh ai, na mambahen mumpat tolu tanduk ai i lobeini; ai ma tanduk na marmata ai ampa na marbabah, na mansahapkon pangenjengon, na banggalan idahon humbani na legan ai.

²¹Huidah do tanduk ai mangadongkon porang dompak halak na pansing ai, anjaha italuhon do sidea, [97]

²²paima roh Ia Na Adong Hun Bani Sapari, laho mandalankon uhum mangkopkop halak na mapansing ni Sitimbulan ai, anjaha das ma panorangni jaloon ni halak na mapansing ai harajaon ai.

²³Nini ma mambalosi, ʻArti ni binatang na paompatkon ai, ai ma, sihol roh do harajaon na paompatkon i tanoh on, na lain humbani haganup harajaon na legan ai, anjaha bondutonni do haganup tanoh on, luntakonni do ai, anjaha ropukonni.

²⁴Arti ni tanduk na sapuluh ai: Humbani harajaon ai timbul do sapuluh raja, anjaha na legan do use jongjong i pudi ni sidea; legan do ia humbani na parlobei ai, anjaha madabuh do bahenonni tolu raja. [98]

²⁵Hatahononni do hata risa-risa dompak Sitimbulan in, anjaha arsik-arsikkononni do halak na mapansing ni Sitimbulan in, anjaha sihol do ubahonni panorang ni pesta ampa titah ai; anjaha ondoskononkon do sidea hubagas tanganni sada panorang, dua panorang ampa satongah panorang. [99]

²⁶Tapi padalanon ma paruhuman anjaha ibuat ma kuasani ai hun bani, imasabkon anjaha iparseda ma ai tongon.

²⁷ Ia harajaon ai ampa panggomgomion ai ampa kuasa ni harajaon-harajaon na i toruh ni langit in, ondoskononkon do ai bani bangsa ni halak na mapansing ni Sitimbulan in, harajaon sisadokah ni dokahni do harajaon ni sidea ai, anjaha sagala kuasa maningon tunduk anjaha pambalosi do bani sidea.ʼ

²⁸Sibar sonai ma parsahapan ai. Ia ahu, si Daniel, rusak do ahu ibahen pingkiranku, anjaha marposi do bohingku; tapi huparimbagaskon do na masa ai.”