Read Batak Simalungun HOSEA 10 Bible Online

HOSEA 10 - Batak Simalungun bible

HOSEA 10

¹Hayu anggur na tabun do Israel, na mambere buahni. Lambin tambah buahni, lambin ipabuei sidea do anjapanjap; lambin dearni tanohni, lambin ipauli sidea do tuguni. [75]

²Seng bulat uhur ni sidea, sonari manginsonoh ma ai bani sidea. Parsedaon ni Jahowa ma anjapanjap ni sidea, anjaha parreongon-Ni tuguni.

³Tongon, ihatahon sidea do sonari, “Seng marraja hita, halani lang ihabiari hita Jahowa; ia sah raja, aha ma na boi bahenonni banta?” [76]

⁴Isahapkon sidea do hata lumei, marhitei bulawan sipakulahkulah ibahen sidea parpadanan; gabe martumbor ma uhum songon suan-suanan na manrasun bani juma na tininggala.

⁵Gobir do pangisi ni Samaria bani gana-gana lombu na i Bet-Awen. Tongon marhoru do bangsani halani ai, anjaha doruh-doruh do malim-malimni, halani hasangaponni na minsah hunjai. [77]

⁶Tongon, anak ni lombu ai pe tarboan do hu Assur bahen parsombahon bani raja bolon ai. Maningon bador do Efraim anjaha maila Israel halani hapandeionni ai.

⁷Maningon magou do Samaria, rajani ai mayub songon pangotaman i atas ni bah.

⁸Maningon bois do buntu-buntu panombahan na i Awen, pardousaon bani Israel. Suga-suga pakon duri-duri do tubuh bani anjapanjap ni sidea. Hatahonon ni sidea ma bani dolog-dolog, “Rungkub hanami!” Anjaha bani buntu-buntu, “Robrobi hanami!” [78]

⁹“Humbani panorang na i Gibea nari, sai mardousai do ho, ale Israel. ijai do sidea jongjong manlawan Ahu. Ai lang hona porang do sidea i Gibea? [79]

¹⁰Sai roh do Ahu manjumpahkon anak na jahat ai laho mangajar sidea. Martumpu do roh bangsa-bangsa laho mandorab sidea, anggo ajaron ma sidea halani hajahaton ni sidea sidua lompit ai.

¹¹Lombu poso na niajar do Efraim, na marosuh mardogei, anjaha Hunahkon do pasangan bani borgokni na jenges ai, anjaha Hupasang ma Efraim; maningon maninggala do Israel anjaha manisir ia Jakob.”

¹²Tidahkon ma bannima hapintoron, pariamai ma dear layak! pungkah ma juma na baru, ai panorangni ma mangindahi Jahowa, ase roh Ia anjaha ibere bannima hapintoron. [80]

¹³Tapi hajahaton do itinggalahon hanima, gabe hamagouan isabi hanima, anjaha buah ni ladungnima ipangan hanima. Halani martenger ni uhur ho bani dalanmu, bani hinabuei ni puanglimamu, [81]

¹⁴jadi masa ma hageoron ni parporangan i tongah-tongah ni bangsamu, anjaha haganup benteng-bentengmu maseda do songon si Salman na parseda Bet-Arbel bani panorang porang; marsorak do parinangon rap pakon anakni. [82]

¹⁵Sonai ma bahenon bannima, ale ginompar ni Israel, halani banggal ni hajahatonnima. Girah sogod bois ma raja ni Israel.