Read Batak Simalungun HOSEA 11 Bible Online

HOSEA 11 - Batak Simalungun bible

HOSEA 11

¹“Sanggah danak Israel, holong do atei-Hu hu bani; hun Masir do Hudilo anak-Ku. [83]

²Lambin Hudilo sidea, lambin daohni do sidea laho hun Bangku. Sai manggalang do sidea bani Baal, anjaha manutung dahupa bani gana-gana. [84]

³Ahu do na mangajar Efraim mardalan, Huabing do sidea bani tangan-Ku, tapi seng ibotoh sidea, Ahu do na pamalum sidea. [85]

⁴Hutogu-togu do sidea marhitei tali idop ni uhur, marhitei panrahut holong; Ahu do na pahampungkon pasangan bani tangkuhuk ni sidea, Hupaunduk do diringku bani sidea, anjaha Hubere do sidea mangan.

⁵Maningon mulak do sidea hu tanoh Masir, anjaha Assur do gabe raja bani sidea, halani lang ra sidea mulak hu Bangku.

⁶Halani ai roh ma podang mandorab huta-huta ni sidea, iparseda ma pating-pating ni horbangan ni sidea, anjaha iboiskon sidea ibagas benteng-bentengni.

⁷Mandatei do bangsang-Ku mulak hu Bangku. Age pe adong na dilo-dilo bani sidea, seng tarjongjongkonsi be.

⁸Sonaha ma panadingkon-Ku bam, ale Efraim? Sonaha ma parpaturut-Ku bam, ale Israel? Ija ma ra Ahu mambahen bam songon na bani Adma? Ija ma ra Ahu mambahen bam songon na bani Seboim? Marulak-ulakan do uhur-Hu ibagas, nahit do holong ni atei-Hu. [86]

⁹Seng dalankonon-Ku ringis-Ku na gajag in, seng be parsedaon-Ku Efraim. Ai Naibata do Ahu, sedo jolma, ai ma Na Mapansing ai i tongah-tongahnima, seng roh be Ahu mamboiskon. [87]

¹⁰Irikkonon ni sidea do Jahowa, maraum do Ia songon singa; tongon, maraum do Ia, anjaha marrohan ma anakni hitir-hitir hun hasundutan. [88]

¹¹Marrohan do sidea meper-eper songon manuk-manuk hun Masir, anjaha songon asas hun Assur; paulakon-Ku do sidea marianan bani rumah ni sidea,” nini Jahowa. [89]