Read Batak Simalungun HOSEA 12 Bible Online

HOSEA 12 - Batak Simalungun bible

HOSEA 12

¹“Ilioti Efraim do Ahu marhitei ladung anjaha ginompar ni Israel marhitei pangoto-otoion. Anjaha Juda pe marbalik do humbani Naibata ampa humbani Na Mapansing in, hatengeran ni uhur in.

²Logou do iparmahan Efraim, anjaha logou hapoltakan do iayak-ayak ari-ari; ipabuei sidea do ladung ampa odoh-odoh. Mambahen parpadanan do sidea pakon Assur, anjaha iboan do minak hu Masir. [90]

³Anjaha adong do paringoran ni Jahowa pakon Juda; marlulu do Ia dompak Jakob romban hubani dalanni, anjaha balaskonon-Ni do bani domu hubani pambahenanni.

⁴Bani partapaan ope domma ioto-otoi abangni, anjaha sanggah bani hagogohonni margulgul do ia pakon Naibata. [91]

⁵Margumpul do ia pakon malekat anjaha monang do, tangis do ia mangelek-elek idop ni uhurni. I Betel pajumpah do Naibata pakonsi, anjaha ijai iparsahapkon do ia. [92]

⁶Jahowa, Naibata Zebaot, Jahowa do goran-Ni. [93]

⁷Ai pe, mulak ma ho bani Naibatamu, dalankon ma idop ni uhur ampa uhum, anjaha tongtong martenger ni uhur bani Naibatamu.

⁸Songon partiga-tiga halak Kanaan ijolom Efraim do kilo palsu ibagas tanganni, marosuh do ia manipu.

⁹Nini, ʻTongon, bayak do ahu, dapotan pansarian do ahu. Bani haganup pansariankai seng dong jumpah bangku salah, ai ma dousa.ʼ [94]

¹⁰Ahu do Jahowa Naibatamu hun tanoh Masir nari, bahenon-Ku do use ho marianan bani lampolampo, songon sanggah panorang na i halimisan. [95]

¹¹Marsahap do Ahu bani nabi, Ahu do pabuei pangungkabon, anjaha marhitei nabi-nabi marsahap do Ahu marhasoman limbaga.

¹²Masa do hajahaton i Gilead, gabe bois do sidea; manggalang do sidea bani lombu jonggi i Gilgal, gabe songon timbunan batu ma homa anjapanjap ni sidea i juma na tininggalaan. [96]

¹³Hu tanoh Aram do maporus si Jakob, marhorja do si Israel ijai halani boru, marmahan biribiri do ia laho mambuat parinangon bani. [97]

¹⁴Marhitei sada nabi iboan Jahowa do Israel mandarat hun Masir, anjaha iparmahan do sidea marhitei sada nabi. [98]

¹⁵Sipuhoi ringis do pambahenan ni Efraim, halani ai marsapata hubani do bahenon ni Jahowa utang darohni ai, anjaha balaskononni bani hasamboron na hinorjahonni ai.”