Read Batak Simalungun HOSEA 13 Bible Online

HOSEA 13 - Batak Simalungun bible

HOSEA 13

¹Anggo marsahap Efraim, mabiar do halak, timbul do ia i Israel; tapi halani mardousa ia marhitei Baal, gabe matei ma ia. [99]

²Sonari pe, sai inunut sidea do mardousa, ipauli sidea do bani sidea gana-gana tinuang humbani pirak ni sidea, tubuh-tubuh ni uhur ni sidea, jadi-jadian ni tukang do ganupan ai. Nini sidea pasal ai, ʻManggalang ma hujai! Anak ni lombu do isummah jolma.ʼ [100]

³Halani ai gabe songon hombun sogod-sogod ma sidea, atap songon namur na podas habang; tongon, songon lamlam na hinabangkon ni logou humbani pardogeian, atap songon timus na luar humbani jandela. [101]

⁴Ahu do Jahowa Naibatamu hun tanoh Masir nari; seng dong Naibata sobali Ahu itanda ho, anjaha sobali Ahu seng dong Sipaluah. [102]

⁵Ahu do na mananda ho i halimisan, bani tanoh na horah-horah; [103]

⁶Dob dapotan panggagatan sidea Hubahen, jadi bosur ma sidea; dob bosur sidea, gijang ma uhurni, gabe lupa ma sidea Bangku. [104]

⁷Halani ai, songon singa ma Ahu dompak sidea, songon begu na manggompangi i dalan. [105]

⁸Songon gipul na magouan anak do Ahu manoroh bani sidea, parribakon-Ku do tonton ni sidea; anjaha songon singa boru-boru do Ahu mamondut sidea ijai, binatang panoroh na i talun do mamparsilbak sidea. [106]

⁹Anggo Ahu sipangagou bam, ale Israel, ise ma na boi paluahkon ho? [107]

¹⁰Ija do nuan rajamu, na boi mangurupi ho? Ija do nuan kopala-kopalamu na mamintori ho? Hubani sidea do ihatahon ho, ʻBere bangku raja pakon kopala-kopala!ʼ [108]

¹¹Hubere do bam sada raja ibagas ringis-Ku, anjaha Hubuat use ibagas gilang-Ku.

¹²Domma hona lak hajahaton ni Efraim, domma hona simpan dousani.

¹³Pangarouon ni na sihol tubuhan anak do na roh hu bani, tapi anak na so maruhur do ia, age pe roh panorangni seng ra luar ia hun partapaan. [109]

¹⁴ Tapi paluahon-Ku do sidea humbani kuasa ni nagori toruh, anjaha tobuson-Ku do sidea humbani hamatean. Ale hamatean, ija do sorodmu? Ale nagori toruh, ija do pangarsik-arsikonmu? Pambalason ponop do humbani matang-Ku. [110]

¹⁵Age marbuahi Efraim i tongah-tongah ni saninani, roh ma logou hapoltakan, ai ma logou humbani Jahowa, naik hun halimisan; gabe horah ma parigini anjaha marsik bah tubuhni; rampason ni ai ma arta-artani, sagala ugas-ugasni na maharga. [111]

¹⁶Maningon manaron do Samaria halani salahni, ai manlawan do ia dompak Naibata. Rasei do sidea bahenon ni podang, hona ropukan na etek-etek ni sidea, anjaha ibolahi boltok ni na boratan rumah.” [112]