Read Batak Simalungun HOSEA 14 Bible Online

HOSEA 14 - Batak Simalungun bible

HOSEA 14

¹Sai mulak ma, ale Israel hubani Jahowa Naibatamu, ai targompang pe ho, halani salahmu do. [113]

²Boan hanima ma hata sihatahononnima anjaha mulak ma bani Jahowa! Hatahon hanima ma hu Bani, “Sasap Ham ma haganup hajahatonnami, anjaha bahen Ham ma na madear bennami, ase iboan hanami galangan Bamu, ai ma buah ni bibirnami. [114]

³Sedo Assur sipangurupi bennami, seng be ra hanami mangajak huda; seng be ra hanami mangkatahon bani jadi-jadian ni tangannami: Ham Naibatanami! Bamu do dapotan idop ni uhur na tading maetek.”

⁴“Pamalumon-Ku do parbalikon ni sidea. Sihol do Ahu mangkaholongi sidea, tongon, domma surut ringis-Ku humbani sidea.

⁵Songon namur do Ahu bani Israel; marbunga do ia songon silundat, anjaha marurat songon hayu na i Libanon.

⁶Mangerbang do dangkahni; hajengesonni songon hayu Jetun, anjaha hamisbouonni songon Libanon. [115]

⁷Sai mulak do sidea, anjaha marianan i toruh ni linggom-Hu, gabe songon pohon do sidea, marbunga songon hayu anggur, anjaha tarbarita songon anggur na hun Libanon.

⁸Ale Efraim, bahen aha be bam gana-gana in? Ahu do na manangihon ampa na manatap ho; Ahu do songon hayu bolon, Ahu do harohan ni buahmu.

⁹Barang ise na maruhur, iparuhurhon ma in! Barang ise na marpangidah, ididah ma in! Tongon, pintor do dalan ni Jahowa anjaha halak parpintor mardalan ijai, tapi anggo halak parjahat tompas do ijai.” [116]