Read Batak Simalungun HOSEA 4 Bible Online

HOSEA 4 - Batak Simalungun bible

HOSEA 4

¹Tangihon ma hata ni Jahowa, ale ginompar ni Israel, ai adong do paringoran ni Jahowa ampa pangisi ni tanoh in, “Ai seng dong hasintongan, seng dong haholongan, anjaha seng dong habotohon pasal Naibata i tanoh in,

²tapi bija do, ladung, pambunuhon, panangkoon ampa parbangkison; masa do odoh-odoh anjaha marompot mardurusan daroh.

³Halani ai marhoru do tanoh in, anjaha sagala pangisini hurleh, sonai homa binatang na i talun ampa manuk-manuk na i awang-awang; anjaha dengke na ibagas laut ai pe rasei do.

⁴Tapi ulang ma pala adong atap ise na maminsang, anjaha ulang ma pala adong na mangaduhon, ai ho do imbang-Ku martinggil, ale malim! [25]

⁵Maningon tartolsu do ho arian, nabi pe tompas do rap pakon ho borngin; anjaha inangmu pe bois do bahenon-Ku.

⁶Seda do bangsang-Ku halani hurang ni habotohon; halani itulakkon ho habotohon, tulakkonon-Ku do ho, ase ulang be ho malim Bangku. Halani lupa ho bani titah ni Naibatamu, lupa ma homa Ahu bani anakmu. [26]

⁷Lambin martambah-tambah sidea, lambin mardousai do sidea dompak Ahu. Ubahon-Ku do hasangapon ni sidea ai gabe habadoron. [27]

⁸Manggoluh do sidea humbani dousa ni bangsang-Ku, anjaha marosuh do sidea bani hajahatonni.” [28]

⁹Dos do na sihol masa bani malim ampa bani halak simbuei, “Marlulu ma Ahu bani sidea romban hubani parlahou ni sidea; anjaha mambalas do Ahu bani sidea halani pambahenan ni sidea. [29]

¹⁰Mangan pe sidea, tapi seng bosur, marbangkis pe sidea, tapi seng manggargar, halani itadingkon sidea Jahowa laho mandalankon parbangkison. [30]

¹¹Anggur ampa minuman koras, ai do na parseda uhur.

¹²Marpanungkun bani hayu-hayu do bangsang-Ku, anjaha tungkot ni sidea mambere bani sidea pangungkabon. Tongon, tonduy parbangkison do na pakahou sidea, marbalik do sidea humbani Naibata ni sidea, laho mangkorjahon parbangkison. [31]

¹³Bani pakpak ni dolog do sidea manggalang anjaha bani buntu-buntu manutung dahupa, sonai homa i toruh ni hayu buah, jajabi pakon baringin halani dear ni linggomni ai. Halani ai marriah-riahi do borunima anjaha marbangkisi parumaennima. [32]

¹⁴Tapi seng uhumon-Ku borunima halani na marriah-riahi atap parumaennima halani na marbangkisi ai, ai dalahi-dalahi pe mardomu-domu do rap pakon boru jalang, anjaha rap manggalang ampa boru jalang na i rumah-rumah panumbahan; anjaha bangsa na so maruhur ai maningon seda do.

¹⁵Age pe marriah-riah ho ale Israel, ulang namin dihut Juda marsalah! Ulang ma laho hanima hu Gilgal, ulang ma tangkog hu Bet-Awen, anjaha ulang ma marbija, mangkatahon, ʻSongon sintongni manggoluh Jahowa!ʼ [33]

¹⁶Tongon, songon lombu jalang na hengkeng, sonai do hengkeng ni Israel; mintor tarparmahan Jahowa ma sidea songon biribiri bani sampalan na bolag?

¹⁷Marpardomuan bani gana-gana do Efraim, paturut ma ia hujin.

¹⁸Siparmabuk-mabuk do sidea, sidalankon parriah-riahon, holongan do uhur ni sidea bani habadoron, ase humbani na boi gabe hasangapon bani sidea. [34]

¹⁹Logou do na manaluhon sidea marhitei habongni, anjaha gabe bador do sidea halani panggalangon ni sidea.”