Read Batak Simalungun HOSEA 5 Bible Online

HOSEA 5 - Batak Simalungun bible

HOSEA 5

¹“Tangar ma on, ale malim! Parimbagaskon ma, ale halak Israel! Tangihon ma, ale sipanrajai! Ai mangonai bannima do uhum in, ai gabe siding do hanima i Mispa, gabe puhot na tinaon i Tabor,

²anjaha ipabagas hanima do godung hamagouan na i Sittim, halani ai uhumon-Ku do hanima.

³Hutanda do Efraim, anjaha Israel seng ponop hun Bangku; tongon, sonari marriah-riah do Efraim anjaha hona butakan Israel. [35]

⁴Pambahenan ni sidea do mambahen lang boi be sidea mulak bani Naibata ni sidea. Ai tonduy parriah-riahon do ibagas uhur ni sidea, anjaha seng itandai sidea Jahowa. [36]

⁵Gijang ni uhur ni Israel do saksi na mangimbangsi; maningon tompas do Efraim halani hajahatonni. Juda pe tompas do rap pakonsi. [37]

⁶Roh do sidea mamboan biribiri ampa lombu ni sidea mangindahi Jahowa, tapi seng jumpah sidea Ia; domma surut Ia humbani sidea. [38]

⁷Mangosei do sidea dompak Jahowa, tongon anak salong-salongan do tinubuhkon ni sidea; halani ai boiskonon ni pesta poltak ni bulan do sidea ampa juma ni sidea.

⁸Sompul ma tanduk i Gibea, tarompit ai i Rama. Pahata ma tingting i Bet-Awen, hirjati ma Benjamin! [39]

⁹Gabe halimisan do Efraim bani panorang uhum ai; na sintong do na Hupabotohkon ai bani marga ni Israel.

¹⁰Gabe songon halak siosor parbalogan do kopala-kopala ni Juda; duruskonon-Ku do ringis-Ku bani sidea songon bah. [40]

¹¹Hona odoh-odoh do Efraim, maropuk bani paruhuman, halani marosuh ia mangihutkon gana-gana na lang ai. [41]

¹²Halani ai gabe doskon ngitngit do Ahu bani Efraim, anjaha songon burbur na parsedahon bani ginompar ni Juda.

¹³Dob ididah Efraim naboritni anjaha ididah Juda ugahni, laho do Efraim hu Assur, isuruh do suruhanni bani raja bolon ai. Tapi seng tarbahensi pamalum hanima atap tartambarisi ugahnima. [42]

¹⁴Ai gabe songon singa do Ahu bani Efraim janah songon anak ni singa bani ginompar ni Juda. Ahu, Ahu tongon manoroh, dob ai lintun hunjai. Ahu do na manaluhon, seng dong na boi paluahkon. [43]

¹⁵Mulak ma Ahu use bani ianan-Ku, paima itanda sidea salahni gabe ipindahi sidea bohing-Ku, anjaha ibagas hasosakan ni sidea ai pindahan ni sidea ma Ahu.” [44]