Read Batak Simalungun HOSEA 7 Bible Online

HOSEA 7 - Batak Simalungun bible

HOSEA 7

¹“Sanggah sihol pasuangon-Ku bangsang-Ku, anjaha sihol pamalumon-Ku Israel, gabe talar ma dousa ni Efraim ampa hajahaton ni Samaria, ai ihorjahon sidea do panipuon, panangko mambongkari rumah, anjaha panrampok manrampasi i dalan-dalan.

²Seng ipingkirhon sidea, na mardingat do Ahu bani ganup hajahaton ni sidea. Sonari iinggoti pambahenanni do sidea, i lobei ni bohing-Ku do ai.

³Marhitei hajahaton ni sidea ipamalas sidea uhur ni raja, anjaha marhitei sipakulah-kulah ni sidea ipamegah kopala-kopala.

⁴Haganup sidea unsong-unsong do usih do sidea songon parmasakan ruti na dob pinamalas, tapi na so ginaraan ni tukang ruti lobei paima siap iagu topung anjaha kambang ai marhitei ubat ruti.

⁵Nini sidea, “Ari bosar ni rajanta!” Marmabuk-mabuk ma kopala-kopala minum anggur; iawas-awaskon raja ai do tanganni rap pakon sipanggeori ai. [54]

⁶Gajag do uhur ni sidea songon pamurunan laho manggeori; borngin songon na modom do ringis ni sidea, tapi patarni marjimbur ma ai songon gara ni apuy.

⁷Haganup sidea milas do songon pamurunan, ibonduti sidea do panggomgomini. Haganup do raja ni sidea madabuh, anjaha ise pe lang humbani sidea na dilo-dilo Bangku. [55]

⁸Ipasaor Efraim do dirini hubani bangsa-bangsa; songon roti na so pinagoling do Efraim.

⁹Halak na legan do mamangani gogohni, tapi seng mangahap ia ijai; uban ma bani uluni, tapi seng ibotoh ai.

¹⁰Gijang ni uhur ni Israel do saksi bani na mangimbangsi; tapi seng mulak sidea bani Jahowa, Naibata ni sidea, anjaha seng ipindahi Ia, age pe sonai haganupan ai.

¹¹Songon asas do Efraim, oto anjaha seng maruhur; dilo-dilo bani Masir, sai laho hu Assur. [56]

¹²Sanggah na laho sidea, Huhaltupkon do puhot-Ku manangkap sidea; Hutarik do sidea hu toruh songon manuk-manuk na i awang-awang; Huajar do sidea halani hajahaton ni sidea ai.

¹³Bursik ma sidea, ai lintun do sidea hun Bangku; magou ma sidea, ai marbalik do sidea hun Bangku; sihol do namin Ahu paluahkon sidea, tapi ladung do ihatahon sidea Bangku.

¹⁴Seng dilo-dilo sidea hu Bangku humbani uhur ni sidea, tapi bani podoman i panumbahan-panumbahan do sidea doruh-doruh; irariki sidea do dirini halani gandum ampa anggur, manlawan do sidea hu Bangku.

¹⁵Ahu do na mampargogohi tangan ni sidea, hape na jahat do ipingkiri sidea dompak Ahu.

¹⁶Dompak Baal do sidea laho, gabe songon sior sipangoto-otoi do sidea. Rasei do kopala-kopala ni sidea marhitei podang, halani hajungkaton ni dilah ni sidea. Ai ma na mambahen bador sidea i tanoh Masir.” [57]